കണ്‍വെന്‍ഷന്‍ സെന്ററിന് അനുമതി ലഭിക്കാത്തിനെ തുടര്‍ന്ന് പ്രവാസി വ്യവസായി ആത്മഹത്യ ചെയ്ത സംഭവത്തില്‍ ആന്തൂര്‍ നഗരസഭാ ചെയര്‍പേഴ്‌സണും ഉദ്യോഗസ്ഥര്‍ക്കും സര്‍ക്കാരിന്റെ ക്ലീന്‍ ചിറ്റ്. സംഭവം വിവാദമായതിനെ തുടര്‍ന്ന് ഹൈക്കോടതി സ്വമേധയാ കേസ് എടുത്തതിനെ തുടര്‍ന്ന് തദ്ദേശസ്വയംഭരണ വകുപ്പ് സമര്‍പ്പിച്ച സത്യവാങ്മൂലത്തിലാണ് ക്ലീന്‍ ചിറ്റ് നല്‍കിയത്. ഇത് സംബന്ധിച്ച് മാധ്യമങ്ങളില്‍ വന്ന വാര്‍ത്ത കളവാണെന്നും സത്യവാങ്മൂലത്തില്‍ ചൂണ്ടിക്കാട്ടുന്നു. അനുമതി ലഭിക്കുന്നതിന് മുമ്പേ കണ്‍വെന്‍ഷന്‍ സെന്ററിന്റെ നിര്‍മാണപ്രവര്‍ത്തനങ്ങള്‍ ആരംഭിച്ചിരുന്നു. കെട്ടിടത്തിന്റെ പ്ലാന്‍ നിരവധി തവണ മാറ്റി. പില്ലറുകള്‍ കോണ്‍ക്രീറ്റ് ഉപയോഗിച്ച് നിര്‍മിക്കണമെന്ന് നിര്‍ദ്ദേശിച്ചിട്ടും ഉരുക്കാണ് ഉപയോഗിച്ചത്. ഇത്തരത്തിലുള്ള നിയമലംഘനങ്ങള്‍ കണ്ടെത്തിയതിനാലാണ് ലൈസന്‍സ് നല്‍കാന്‍ വൈകിയത്. നഗരസഭാ ജാഗ്രതയോടെയാണ് പ്രവര്‍ത്തിച്ചത്- സത്യവാങ്മൂലത്തില്‍ പറയുന്നു. 

കണ്‍വെന്‍ഷന്‍ സെന്ററിന് അനുമതി ലഭിക്കാത്തതാണ് ആത്മഹത്യയ്ക്ക് കാരണമെന്ന് അന്വേഷണ സംഘം വ്യക്തമാക്കിയിരുന്നു. അതും ഹൈക്കോടതിയിലെ സത്യവാങ്മൂലവും പരസ്പ്പരവിരുദ്ധമാണ്. കണ്‍വെന്‍ഷന്‍ സെന്ററിന്റെ അനുമതിയുമായി ബന്ധപ്പെട്ടുള്ള പ്രശ്‌നങ്ങളാണ് ആത്മഹത്യയ്ക്കു കാരണമായതെന്നാണ് ഇതുവരെയുള്ള അന്വേഷണത്തില്‍ വ്യക്തമായെന്ന് ഡിവൈഎസ്പി വിഎ കൃഷ്ണദാസ് മാധ്യമങ്ങളോട് പ്രതികരിച്ചിരുന്നു. അതിന് മുമ്പ് അന്വേഷണ സംഘം നഗരസഭായിലെത്തി ചെയര്‍പേഴ്‌സണ്‍ ശ്യാമളയെ ചോദ്യം ചെയ്തിരുന്നു. ഇവരെയും ഉദ്യോഗസ്ഥരെയും രക്ഷിക്കാനുള്ള നീക്കമാണ് തദ്ദേശസ്വയംഭരണ വകുപ്പ് നടത്തുന്നത്. അതിന്റെ ഭാഗമായാണ് ഹൈക്കോടതിയില്‍ ഇത്തരത്തിലൊരു സത്യവാങ്മൂലം നല്‍കിയതെന്ന് അറിയുന്നു. 

ഉദ്യോഗസ്ഥതലത്തില്‍ വീഴ്ച സംഭവിച്ചതായി അന്വേഷണസംഘം കണ്ടെത്തിയിരുന്നു. കെട്ടിടത്തിന് ലൈസസ് നല്‍കണമെന്ന് നഗരസഭാ എഞ്ചിനിയറിംഗ് വിഭാഗം ശുപാര്‍ശ ചെയ്തിട്ടും സെക്രട്ടറി നടപടി സ്വീകരിച്ചില്ലെന്ന് ഡിവൈ.എസ്.പിയുടെ നേതൃത്വത്തിലുള്ള അന്വേഷണ സംഘം കണ്ടെത്തിയിരുന്നു. വിഷയത്തില്‍ നഗരസഭാ ചെയര്‍പേഴ്‌സണ്‍ ഇടപെട്ടതായി യാതൊരു തെളിവും ലഭിച്ചിട്ടില്ലെന്നും ഡിവൈ.എസ്.പി പ്രതികരിച്ചിരുന്നു. എന്നാല്‍ ചെയര്‍പേഴ്‌സന്റെ ഭാഗത്ത് നിന്ന് വീഴ്ചയുണ്ടായെന്ന് സി.പി.എം സംസ്ഥാന സമിതി അംഗം പി. ജയരാജന്‍ പരസ്യമായി കുറ്റപ്പെടുത്തിയിരുന്നു. ആന്തൂര്‍ നഗരസഭാ സെക്രട്ടറി നിരുത്തരവാദപരമായ സമീപനമാണ് സ്വീകരിച്ചതെന്നും ഇവരെ തിരുത്താന്‍ നഗരസഭാ അധ്യക്ഷയായ പി കെ ശ്യാമളയ്ക്ക് സാധിച്ചില്ലെന്നും പി ജയരാജന്‍ രാഷ്ട്രീയ വിശദീകരണ യോഗത്തില്‍ വ്യക്തമാക്കിയിരുന്നു. 

നഗരസഭാ ഉദ്യോഗസ്ഥരെ നിയന്ത്രിക്കാനും കാര്യമായി ഇടപെടാനും പി.കെ ശ്യാമളയ്ക്ക് സാധിച്ചില്ല. ജനപ്രതിനിധികള്‍ക്ക് പിരിമിതി ഉണ്ട്. പക്ഷെ, ഉദ്യോഗസ്ഥര്‍ പറയുന്നത് മാത്രം കേട്ട് നടക്കുന്നതല്ല ജനപ്രതിനിധികളുടെ ഉത്തരവാദിത്വം? ഉദ്യോഗസ്ഥര്‍ക്ക് മേല്‍ ഇടപെടുകയാണ് ചെയ്യേണ്ടത്. അക്കാര്യത്തില്‍ മുന്‍സിപ്പാലിറ്റിക്ക് വീഴ്ച പറ്റിയെന്നും ജയരാജന്‍ ചൂണ്ടിക്കാട്ടിയിരുന്നു. എന്നാല്‍ ജയരാജന്റെ നിലപാട് സംസ്ഥാന സെക്രട്ടറി കോടിയേരി ബാലകൃഷ്ണന്‍ തിരുത്തി. ശ്യാമളയുടെ ഭാഗത്ത് വീഴ്ചയുണ്ടായിട്ടില്ലെന്നും ജയരാജന്‍ പറഞ്ഞത് ഏത് സാഹചര്യത്തിലാണെന്ന് അറിയില്ലെന്നും അദ്ദേഹം മാധ്യമങ്ങളോട് പറഞ്ഞിരുന്നു. അത് തന്നെയാണ് തദ്ദേശസ്വയംഭരണ വകുപ്പിന്റെ സത്യവാങ്മൂലത്തില്‍ പറയുന്നത്.