ആലത്തൂര്‍ എം.പി രമ്യാ ഹരിദാസിന് വാഹനം വാങ്ങാന്‍ യൂത്ത് കോണ്‍ഗ്രസ് പിരിവ് നടത്തുന്നത് അഴിമതി നടത്താനുള്ള പുതിയ ഉപാധിയാണെന്ന് ആക്ഷേപം. ഇതിനെതിരെ സി.പി.എമ്മും ബി.ജെ.പിയും രംഗത്തെത്തി. എന്നാല്‍ കോണ്‍ഗ്രസ്, യൂത്ത്‌കോണ്‍ഗ്രസ് കുടുംബങ്ങളില്‍ നിന്നും പ്രവര്‍ത്തകരില്‍ നിന്നും മാത്രമാണ് പിരിവ് നടത്തുന്നത് എന്നാണ് നേതൃത്വം നല്‍കുന്ന വിശദീകരണം. യൂത്ത് കോണ്‍ഗ്രസ് ആലത്തൂര്‍ പാര്‍ലമെന്റ് കമ്മിറ്റിയാണ് സംഭാവന കൂപ്പണ്‍ പുറത്ത് ഇറക്കിയിരിക്കുന്നത്. ഈടില്ലാതെ എം.പിമാര്‍ക്ക് വായ്പ നല്‍കണമെന്ന് ദേശസാല്‍ക്കൃത ബാങ്കുകള്‍ക്ക് നിര്‍ദേശമുണ്ട്. അത് ഉപയോഗിച്ച് വാഹനം വാങ്ങാമായിരുന്നിട്ടും പിരിവ് നടത്തുന്നത് പണം തട്ടാനുള്ള മാര്‍ഗ്ഗമാണെന്നാണ് ആക്ഷേപം. 

14 ലക്ഷം രൂപയുടെ വാഹനം വാ്ങ്ങാന്‍ ആയിരം രൂപയുടെ കൂപ്പണ്‍ അച്ചടിച്ച് യൂത്ത് കോണ്‍ഗ്രസ് മണ്ഡലം കമ്മിറ്റികള്‍ മുഖേനയാണ് പിരിവ് നടത്തുന്നതെന്ന് യൂത്ത് കോണ്‍ഗ്രസ് നേതൃത്വം പറയുന്നു. ജൂലായ് 25നുള്ളില്‍ ഓരോ മണ്ഡലം കമ്മിറ്റിയും രണ്ട് ലക്ഷം രൂപാ വിതം നല്‍കണമെന്നാണ് നിര്‍ദേശം. എംപിക്ക് പ്രതിമാസം 1.90 ലക്ഷംരൂപ ശമ്പളവും അലവന്‍സും ലഭിക്കും. പിന്നെന്തിനാണ് പണപിരിവെന്ന് പ്രവര്‍ത്തകര്‍ ചോദിച്ച് തുടങ്ങിയിട്ടുണ്ട്. എംപിയെന്ന നിലയില്‍ സെക്രട്ടറി, സ്റ്റാഫ്, ഓഫീസ് അലവന്‍സ് എന്നിവ വേറെ ലഭിക്കും. വിമാന, ട്രെയിന്‍യാത്ര സൗജന്യമാണ്. പാര്‍ലമെന്റ് കൂടുമ്പോള്‍ ബത്തയും ലഭിക്കും. അതിനാല്‍ പിരിവ് നടത്തുന്നത് ശരിയായ രീതിയല്ലെന്നാണ് ആരോപണം. 

സംഭാവന നിര്‍ബന്ധിത പണപ്പിരിവാക്കാനാണെങ്കില്‍ സഹകരിക്കില്ലെന്ന് പാര്‍ട്ടി അനുഭാവികള്‍ നിപാടെടുത്തിട്ടുണ്ട്. എന്നിട്ടും പരിവ് നിര്‍ത്താന്‍ നേതൃത്വം തയാറായിട്ടില്ല. 1,400 ലീഫുകളാണ് ആകെ അച്ചടിച്ചിട്ടുള്ളതെന്ന് യൂത്ത് കോണ്‍ഗ്രസ് ഭാരവാഹികള്‍ പറയുന്നു. 14 ലക്ഷത്തോളം രൂപ പിരിച്ച് എംപിക്ക് വാഹനം വാങ്ങി നല്‍കുകയാണ്് യൂത്ത് കോണ്‍ഗ്രസ് ലക്ഷ്യം. ഇത് കോണ്‍ഗ്രസ് കുടുംബങ്ങളില്‍ നിന്ന് മാത്രമുള്ള പിരിവാണെന്നും പുറത്തുനിന്നുള്ളവരില്‍ നിന്ന് പണം വാങ്ങുന്നില്ലെന്നുമാണ് യൂത്ത് കോണ്‍ഗ്രസ് ആലത്തൂര്‍ പാര്‍ലമെന്റ് കമ്മിറ്റിയുടെ ന്യായീകരണം. ഇതേ ന്യായീകരണവുമായി അനില്‍അക്കര എം.എല്‍.എയും രംഗത്തെത്തിയിട്ടുണ്ട്. തീരെ പാവപ്പെട്ട കുടുംബത്തില്‍ ജനിച്ച രമ്യാഹരിദാസിന് തെരഞ്ഞെടുപ്പ് സമയത്ത് പാര്‍ട്ടി പ്രവര്‍ത്തകരും അനുഭാവികളും മറ്റും വസ്ത്രങ്ങള്‍ വരെ വാങ്ങി കൊടുത്തിരുന്നു.

'ആലത്തൂര്‍ എംപി കുമാരി രമ്യ ഹരിദാസിന് വാഹനം വാങ്ങാനുള്ള സംഭാവന രശീത്' എന്ന് അച്ചടിച്ച കൂപ്പണില്‍ യൂത്ത് കോണ്‍ഗ്രസ് പാര്‍ലമെന്റ് മണ്ഡലം പ്രസിഡന്റ് പാളയം പ്രദീപാണ് ഒപ്പിട്ടിരിക്കുന്നത്. മണ്ഡലത്തിലെ യൂത്ത് കോണ്‍ഗ്രസ് നേതാക്കള്‍ തമ്മിലുള്ള ചേരിപ്പോരാണ് സംഭവം വിവാദമാക്കിയതെന്നും ആക്ഷേപമുണ്ട്. കേരളത്തില്‍ ഇതുവരെ ഉണ്ടാകാത്ത സംഭവമാണിതെന്ന് പാര്‍ട്ടി പ്രവര്‍ത്തകര്‍ പറയുന്നു. കെ.പി.സി.സി വിചാരിച്ചാല്‍ വാഹനം വാങ്ങി നല്‍കാം അല്ലെങ്കില്‍ ബാങ്ക് വായ്പ നല്‍കുന്നുണ്ട്. അതിനെയൊന്നും ആശ്രയിക്കാതെ ജനങ്ങളെ ബുദ്ധിമുട്ടിക്കുന്ന യൂത്ത് കോണ്‍ഗ്രസ് നടപടി നിലവിലുള്ള ജനപിന്തുണ നഷ്ടപ്പെടുത്തുമെന്ന് ആശങ്കയുണ്ട്. പാര്‍ലമെന്റ് തെരഞ്ഞെടുപ്പില ചരിത്രവിജയം ആറ് നിയമസഭാ ഉപതെരഞ്ഞെടുപ്പുകളിലും ആവര്‍ത്തിക്കണമെങ്കില്‍ ജനഹിതം അറിഞ്ഞ് നേതൃത്വം പ്രവര്‍ത്തിക്കണമെന്നും ഇവര്‍ ആവശ്യപ്പെടുന്നു.