പാര്ട്ടി അറിയാതെ സഹകരണ സംഘം രൂപീകരിച്ച് ആശുപത്രി വാങ്ങിയ എം.എല്.എയെ ഔദ്യോഗിക സ്ഥാനങ്ങളില് നിന്ന് സി.പി.ഐ മാറ്റി, തനിക്ക് തെറ്റുപറ്റിയെന്ന് ചാത്തന്നൂര് എം.എല്.എ ജി.എസ് ജയലാല്
പാര്ട്ടി അറിയാതെ സഹകരണ സംഘം രൂപീകരിച്ച് ആശുപത്രി വാങ്ങിയ എം.എല്.എയെ ഔദ്യോഗിക സ്ഥാനങ്ങളില് നിന്ന് സി.പി.ഐ മാറ്റി. തനിക്ക് തെറ്റുപറ്റിയെന്ന് ചാത്തന്നൂര് എം.എല്.എ ജി.എസ് ജയലാല് സംസ്ഥാന സെക്രട്ടറിയേറ്റിലും സെക്രട്ടറിയോടും വിശദീകരണം നല്കിയെങ്കിലും ഫലമുണ്ടായില്ല. പാര്ട്ടി ഘടകങ്ങളിലൊന്നും ചര്ച്ച ചെയ്യാതെ ഏകപക്ഷീയമായി നടപടി എടുത്തത് അംഗീകരിക്കാനാവില്ലെന്ന നിലപാടിലാണ് പാര്ട്ടി. കൊല്ലം ജില്ലാ കമ്മിറ്റിയും ജില്ലാ സെക്രട്ടറിയേറ്റും ഈ വിഷയത്തില് വിശദീകരണം തേടിയിരുന്നു. സംസ്ഥാന കൗണ്സില് അംഗമായ ജയലാലിനെ ഒഴിവാക്കിയത് അദ്ദേഹത്തിന് വലിയ തിരിച്ചടിയാണ്.
സഹകരണ സംഘം രൂപീകരിച്ച് പാര്ട്ടി അറിയാതെ സ്വകാര്യ ആശുപത്രി വാങ്ങിയ സംഭവത്തില് സിപിഐയുടെ ചാത്തന്നൂര് എംഎല്എ ജിഎസ് ജയലാലിനെതിരെ പാര്ട്ടി നടപടി. ജയലാലിനെ പാര്ട്ടിയുടെ തെരഞ്ഞെടുക്കപ്പെട്ട സ്ഥാനങ്ങളില് നിന്ന് ഒഴിവാക്കാന് സിപിഐ സംസ്ഥാന നിര്വാഹക സമിതിയില് തീരുമാനമായി. നേരത്തെ ജില്ലാ കമ്മിറ്റിയും ജില്ലാ സെക്രട്ടറിയേറ്റും എംഎല്എയോട് വിശദീകരണം ചോദിച്ചിരുന്നു. എംഎല്എ അധ്യക്ഷനായ സാന്ത്വനം ഹോസ്പിറ്റല് കോ ഓപറേറ്റീവ് സൊസൈറ്റിയാണ് കൊല്ലം മേവറത്തെ അഷ്ടമുടി ആശുപത്രി വാങ്ങാന് തീരുമാനിച്ചത്. ഇതിനായി ഒരു കോടി അഡ്വാന്സും നല്കി. ബാക്കി നാല് കോടി രൂപയ്ക്ക് ഓഹരി സമാഹരിക്കാന് അനുവാദം നല്കണമെന്ന് ആവശ്യപ്പെട്ട് സംസ്ഥാന നേതൃത്വത്തിന് കത്ത് നല്കിയപ്പോഴാണ് ഇക്കാര്യം പാര്ട്ടി അറിയുന്നത് .
അതോടെ വിവാദമായി. സംസ്ഥാന സെക്രട്ടറി കാനം രാജേന്ദ്രന് നേരിട്ട് പങ്കെടുത്ത ജില്ലാ എക്സിക്യുട്ടീവ് യോഗം ജയലാലിനോട് വിശദീകരണം തേടിയിരുന്നു. ഇക്കാര്യത്തില് വിശദ റിപ്പോര്ട്ട് വേണമെന്ന് സംസ്ഥാന കൗണ്സില് ജില്ലാ കമ്മറ്റിയെ ചുമതലപ്പെടുത്തിയിരുന്നു . ആ റിപ്പോര്ട്ടിന്റെ അടിസ്ഥാനത്തിലാണ് സംസ്ഥാന നിര്വാഹക സമിതി യോഗം ജയലാലിനെതിരെ നടപടിയെടുത്തത്. മുന് മുഖ്യമന്ത്രി സി.അച്യുതമേനോന്റെ പേരിലുള്ള സഹകരണ ആശുപത്രി മാസങ്ങളായി പൂട്ടിക്കിടക്കുമ്പോഴാണ് അഞ്ചേകാല് കോടി രൂപയ്ക്കു സ്വകാര്യ ആശുപത്രി സ്വന്തമാക്കാനുള്ള ശ്രമം ക്ഷമിക്കാനാവില്ലെന്ന് ഭൂരിപക്ഷം നേതാക്കളും നിലപാടെടുത്തു.
ജയലാല് പ്രസിഡന്റായി സാന്ത്വനം ഹോസ്പിറ്റല് കോ ഓപ്പറേറ്റീവ് സൊസൈറ്റി എന്ന പേരില് രൂപീകരിച്ച സഹകരണ സംഘമാണു കൊല്ലം ബൈപാസ് റോഡരികില് മേവറത്തുള്ള സ്വകാര്യ ആശുപത്രി വാങ്ങാന് തീരുമാനിച്ചത്.
കൊല്ലം നഗരത്തിനടുത്തു പ്രവര്ത്തിച്ചിരുന്ന സി. അച്യുതമേനോന് സ്മാരക സഹകരണ ആശുപത്രി പുനരുജ്ജീവിപ്പിച്ചു കൂടുതല് ഓഹരി സമാഹരിക്കാന് പാര്ട്ടി തീരുമാനിച്ചതിനിടെയാണ്, ജയലാലിന്റെ നേതൃത്വത്തില് സഹകരണ ആശുപത്രിക്കായി ഓഹരി സമാഹരണം തുടങ്ങിയത്. അത് നേതൃത്വത്തെ ചൊടിപ്പിച്ചു. സ്വന്തം നിലയില് ഇത്രയും വലിയ സംരംഭം ആരംഭിക്കുന്നതിന് പിന്നില് വലിയ സാമ്പത്തിക ഇടപാടുകളുണ്ടെന്ന് ആക്ഷേപം ഉയര്ന്നിട്ടുണ്ട്. പാര്ട്ടി നേതാക്കള്ക്കും അംഗങ്ങള്ക്കും സാമ്പത്തിക അച്ചടക്കം വേണമെന്ന് കഴിഞ്ഞ പാര്ട്ടി കോണ്ഗ്രസില് വ്യക്തമാക്കിയിരുന്നു. ഇതൊക്കെ അറിയാവുന്ന സംസ്ഥാന നിര്വാഹക സമിതി അംഗം തന്നെ വഴിവിട്ട സാമ്പത്തിക ഇടപാടിന് ശ്രമിച്ചത് ഗുരുതരമായ അച്ചടക്ക ലംഘനമാണെന്നാണ് വിലയിരുത്തുന്നത്.
https://www.facebook.com/Malayalivartha
