കാലങ്ങളായി തോട്ടുവരമ്പിനെ മാത്രം ആശ്രയിച്ചു വഴിനടന്നിരുന്ന ആറോളം കുടുംബങ്ങളെ ദുരിതത്തിലാക്കി സ്വകാര്യ വ്യക്തി മതില്‍ നിര്‍മിച്ചു. എറണാകുളം ജില്ലയിലെ കിഴക്കമ്പലം താമരച്ചാല്‍ വലിയതോടിനു സമീപത്ത് താമസിക്കുന്ന കുടുംബങ്ങളാണ് വഴിയില്ലാതെ വിഷമിക്കുന്നത്.

പഞ്ചായത്തും കിഴക്കമ്പലം ട്വന്റി-20 എന്ന എന്‍.ജി.ഒ-യും ചേര്‍ന്ന് നടപ്പാക്കുന്ന തോട് വികസനത്തിന്റെ ഭാഗമായി താമരച്ചാല്‍ വലിയതോടിന്റെ ഇരുവശങ്ങളും കരിങ്കല്‍കെട്ടി സംരക്ഷണഭിത്തി ഒരുക്കിയിരുന്നു. ഇതോടെ വഴിക്ക് കൂടുതല്‍ വീതി ലഭിച്ചത് പ്രദേശവാസികള്‍ക്ക് ഏറെ ആശ്വാസമായിരുന്നു. ഇതിനിടെയാണ് സ്വകാര്യ വ്യക്തി തന്റെ സ്ഥാപനത്തിന്റെ മറവില്‍ തോട്ടുവരമ്പ് കൈയേറി മതില്‍ നിര്‍മിച്ചത്.

ഇതോടെ ഓട്ടോറിക്ഷയിലെങ്കിലും വീട്ടിലെത്താം എന്ന ഏറെ നാളത്തെ ആഗ്രഹം ഈ കുടുംബങ്ങള്‍ക്ക് വെറും വ്യാമോഹമായി അവശേഷിച്ചു. 40 വര്‍ഷത്തിലേറെയായി ഈ കുടുംബങ്ങള്‍ തോട്ടുവരമ്പിനെയാണ് ആശ്രയിച്ചിരുന്നത്. അസുഖം ബാധിച്ചാല്‍ പെട്ടെന്ന് ആശുപത്രിയില്‍ എത്തിക്കാന്‍ പോലും കഴിഞ്ഞിരുന്നില്ല. ഇത്തരത്തില്‍ ഒരാളെ ആശുപത്രിയില്‍ എത്തിക്കാന്‍ കഴിയാതെ മരിച്ചിരുന്നു. സ്‌കൂളിലേക്കു പോകുന്ന കുട്ടികള്‍ തോട്ടില്‍ വീണ് അപകടപ്പെടുമെന്ന ആശങ്കയും ഇവര്‍ക്കുണ്ട്.