അനധികൃത ബോര്‍ഡുകള്‍ക്കെതിരെ സംസ്ഥാന വ്യാപകമായി കര്‍ശന നടപടിക്ക് സര്‍ക്കാര്‍ ഒരുങ്ങുന്നു
അനധികൃത ബോര്‍ഡുകള്‍ക്കെതിരെ സംസ്ഥാന വ്യാപകമായി കര്‍ശന നടപടിക്ക് സര്‍ക്കാര്‍ ഒരുങ്ങുന്നു. ബാനറുകളും ബോര്‍ഡുകളും സ്ഥാപിച്ചവരെ കൊണ്ടുതന്നെ നീക്കം ചെയ്യാനും പിഴ ഈടാക്കാനും തദ്ദേശ സെക്രട്ടറിമാര്‍ക്ക് നിര്‍ദേശം നല്‍കി. ഇതിനായി കേസ് രജിസ്റ്റര്‍ ചെയ്ത്, റവന്യൂ റിക്കവറി നടപടികള്‍ സ്വീകരിക്കണമെന്നും ആവശ്യപ്പെട്ടിട്ടുണ്ട്.
അനധികൃത ബോര്‍ഡുകളും മറ്റും പൊതുസ്ഥലത്തോ പൊതുമാലിന്യ നിക്ഷേപസംസ്‌കരണ സ്ഥലത്തോ നിക്ഷേപിക്കാന്‍ പാടില്ല. പകരം അത് സ്ഥാപിച്ചവര്‍ക്കുതന്നെ മടക്കി നല്‍കി പിഴ ഈടാക്കാനാണ് ഉത്തരവ്.
ഹൈകോടതിയുടെ ആവര്‍ത്തിച്ചുള്ള നിര്‍ദേശത്തിന്റെ അടിസ്ഥാനത്തിലാണ് ജൂലൈ 20ന് പുതിയ ഉത്തരവിറക്കിയത്. നേരത്തേയും നിര്‍ദേശം നല്‍കിയിരുന്നെങ്കിലും ഫലപ്രദമായിരുന്നില്ല. അനധികൃത ഫ്‌ലക്‌സ് ബോര്‍ഡുകളും ബാനറുകളും സ്ഥാപിക്കാന്‍ സഥാപനങ്ങളെയോ ഏജന്‍സികളെയോ സംഘടനകളെയോ വ്യക്തികളെയോ അനുവദിക്കരുതെന്ന് പുതിയ നിര്‍ദേശത്തില്‍ പറയുന്നു.
തദ്ദേശസ്ഥാപനങ്ങളുടെ അനുമതിയോടെ അംഗീകൃത സ്ഥലത്ത് നിയമവിധേയമായി സ്ഥാപിക്കുന്നവ നിര്‍ദിഷ്ടസമയത്തിന് ശേഷം മാറ്റുന്നെന്ന് ഉറപ്പാക്കണം. സ്ഥാപിക്കുന്നവര്‍ക്ക് തന്നെയാണ് മാറ്റാനുള്ള ചുമതല. അനധികൃതമായി ബോര്‍ഡുകള്‍ സ്ഥാപിക്കുന്ന പരസ്യ ഏജന്‍സികളുടെ ലൈസന്‍സ് റദ്ദാക്കണം. കലക്ടര്‍മാര്‍ തദ്ദേശസ്ഥാപനപരിധിയില്‍ അനധികൃത ഫ്‌ലക്‌സ് ബോര്‍ഡുകളും കൊടികളും ഹോര്‍ഡിങ്ങുകളും ഉണ്ടോ എന്ന് പരിശോധിക്കണം. ഉത്തരവുകള്‍ നടപ്പാക്കുന്നതില്‍ വിഴ്ചവരുത്തുന്നവരുടെ വിവരങ്ങള്‍ സഹിതം സര്‍ക്കാറിന് റിപ്പോര്‍ട്ട് ചെയ്യണം.
https://www.facebook.com/Malayalivartha
