അമ്പൂരിയില്‍ യുവതിയെകൊന്നുകുഴിച്ചുമൂടിയ സംഭവത്തില്‍ അറസ്റ്റിലായ മൂന്നാംപ്രതിയുടെ റിമാന്‍ഡ് റിപ്പോര്‍ട്ടില്‍ ഉള്ളത് നിര്‍ണായക വിവരങ്ങള്‍. രാഖിയും മുഖ്യപ്രതി അഖിലേഷും വിവാഹിതരായിരുന്നുവെന്നാണ് പൊലീസിന്റെ കണ്ടെത്തല്‍. രാഖി ജോലിചെയ്യുന്ന എറണാകുളത്ത് വച്ചാണ് ഇവര്‍ വിവാഹിതരായത്. പ്രണയത്തില്‍ നിന്ന് പിന്‍മാറാത്തതുകൊണ്ടാണ് കൊലപാതകത്തില്‍ കലാശിച്ചതെന്ന ഈഹങ്ങള്‍ തെറ്റിക്കുന്നതാണ് റിപ്പോര്‍ട്ട്. 

ഒരു ക്ഷേത്രത്തില്‍ വച്ചായിരുന്നു വിവാഹചടങ്ങ് നടന്നത്. പിന്നീട് നാലുമാസത്തോളം ഒരുമിച്ച് ജീവിക്കുകയും ചെയ്തു. ഇതിനിടയിലാണ് അഖിലിന് വീട്ടുകാര്‍ വിവാഹം ആലോചിച്ച് തുടങ്ങിയതും തിരുവനന്തപുരം സ്വദേശിയായ ഒരു പെണ്‍കുട്ടിയുമായി വിവാഹം ഉറപ്പിച്ചതും. ഇത് രാഖി എതിര്‍ത്തതോടെയാണ് കൊലപാതകത്തിലേക്ക് വഴിവയ്ക്കുന്നത്.
കൊച്ചിയില്‍ നിന്ന് വീട്ടിലെത്തിയ രാഖിയെ അഖില്‍ അമ്ബൂരിയിലെ വീട്ടിലേക്ക് ക്ഷണിച്ചുവരുത്തുകയായിരുന്നു. വീടുകാണിക്കാന്‍ രാഖിയെ കൊണ്ടുപോകാമെന്ന് പറഞ്ഞ് വിശ്വസിപ്പിച്ച് കാറില്‍ കയറ്റി. ഇതിന് ശേഷമായിരുന്നു കൊലപാതകം. അഖിലിന്റെ സഹോദരന്‍ രാഹുല്‍ ആദ്യം രാഖിയെ കഴുത്ത് ഞെരിച്ചു ബോധം കെടുത്തി. പിന്നീട് അഖില്‍ കയറുകൊണ്ട് കഴുത്തില്‍ കുരുക്കിട്ട് ശ്വാസം മുട്ടിച്ച് കൊല്ലുകയായിരുന്നു.
എന്നാല്‍ കൊല്ലപ്പെട്ട ദിവസം രാഖിയെ കണ്ടിരുന്നെന്നും കൊലപാതകത്തില്‍ തനിക്ക് പങ്കില്ലെന്നുമാണ് അഖില്‍ ഫോണില്‍ മാധ്യമങ്ങളോട് പ്രതികരിച്ചത്. വിവാഹം കഴിച്ചിരുന്ന കാര്യം അഖില്‍ വ്യക്തമാക്കിയിരുന്നില്ല. അതേസമയം രണ്ടാം പ്രതി രാഹുല്‍ കീഴടങ്ങിയെന്ന രാഹുലിന്റെ അച്ഛന്റെ വാദവും പൊലീസ് നിഷേധിച്ചു.