നാല്പ്പത്തിയൊമ്പതാമത് സംസ്ഥാന ചലച്ചിത്ര പുരസ്കാരങ്ങള് വിതരണം ചെയ്തു... കേരള സര്ക്കാരിന്റെ പരമോന്നത ചലച്ചിത്ര ബഹുമതിയായ ജെ സി ഡാനിയല് പുരസ്കാരം നടി ഷീല മുഖ്യമന്ത്രിയില് നിന്നും ഏറ്റുവാങ്ങി
നാല്പ്പത്തിയൊമ്പതാമത് സംസ്ഥാന ചലച്ചിത്ര പുരസ്കാരങ്ങള് വിതരണം ചെയ്തു. മുഖ്യമന്ത്രി പിണറായി വിജയന് ജേതാക്കള്ക്ക് പുരസ്കാരങ്ങള് നല്കി. ചടങ്ങില് സാംസ്കാരിക വകുപ്പ് മന്ത്രി എ കെ ബാലന് അധ്യക്ഷത വഹിച്ചു. കേരള സര്ക്കാരിന്റെ പരമോന്നത ചലച്ചിത്ര ബഹുമതിയായ ജെ സി ഡാനിയല് പുരസ്കാരം നടി ഷീല മുഖ്യമന്ത്രിയില് നിന്നും ഏറ്റുവാങ്ങി.
2018ലെ പുരസ്കാരമാണ് ഷീലയ്ക്ക് ലഭിച്ചത്. അവാര്ഡ് പുസ്തകപ്രകാശനം കെ ടി ഡി സി ചെയര്മാന് എം വിജയകുമാര് സംഘാടക സമിതി ജനറല് കണ്വീനര് വി ശിവന്കുട്ടിയ്ക്കു നല്കി നിര്വഹിച്ചു. ചലച്ചിത്രമേഖലയിലെ പന്ത്രണ്ട് മുതിര്ന്ന കലാകാരന്മാരെ വേദിയില് പ്രത്യേകം ആദരിച്ചു. മികച്ച നടന്മാര്ക്കുള്ള പുരസ്കാരം ജയസൂര്യയും സൗബിന് ഷാഹിറും പങ്കിട്ടു. ക്യാപ്റ്റന്, ഞാന് മേരിക്കുട്ടി എന്നീ ചിത്രങ്ങളിലെ അഭിനയത്തിനാണ് ജയസൂര്യയ്ക്ക് പുരസ്കാരം. സുഡാനി ഫ്രം നൈജീരിയ എന്ന ചിത്രമാണ് സൗബിനെ പുരസകാരത്തിന് അര്ഹനാക്കിയത്. മികച്ച നടിക്കുള്ള പുരസ്കാരം നിമിഷ സജയന് മുഖ്യമന്ത്രിയില് നിന്നും ഏറ്റുവാങ്ങി. ചോല, ഒരു കുപ്രസിദ്ധ പയ്യന് എന്നീ ചിത്രങ്ങളിലെ പ്രകടനത്തിനാണ് നിമിഷയെ പുരസ്കാരം തേടിയെത്തിയത്.
കാന്തന് ദ ലവര് ഓഫ് കളര് ആണ് മികച്ച സിനിമ. സി. ഷെരീഫ് ആണ് ചിത്രം സംവിധാനം ചെയ്തതും നിര്മിച്ചതും. മികച്ച രണ്ടാമത്തെ കഥാചിത്രത്തിനുള്ള പുരസ്കാരം നേടിയ ഒരു ഞായറാഴ്ച്ചയുടെ നിര്മ്മാതാവ് ശരത് ചന്ദ്രന് നായര്ക്കു വേണ്ടി മുരളീ ചന്ദ്രന് ഏറ്റുവാങ്ങി. മികച്ച സംവിധായകനുള്ള പുരസ്കാരം ശ്യാമപ്രസാദും (ഒരു ഞായറാഴ്ച) മികച്ച നവാഗത സംവിധായകനുള്ള പുരസ്കാരം സക്കറിയ മുഹമ്മദും (സുഡാനി ഫ്രം നൈജീരിയ) സ്വന്തമാക്കി. അഞ്ച് പുരസ്കാരങ്ങളാണ് സുഡാനി ഫ്രം നൈജീരിയക്ക് ലഭിച്ചത്. മികച്ച തിരക്കഥ, മികച്ച സ്വഭാവനടിമാര്, ജനപ്രിയ ചിത്രം എന്നീ വിഭാഗങ്ങളിലും സുഡാനി ഫ്രം നൈജീരിയ തിളങ്ങി.
മികച്ച ഗായികയ്ക്കുള്ള പുരസ്കാരം ശ്രേയ ഘോഷാലിനു വേണ്ടി സംഗീത സംവിധായകന് എം ജയചന്ദ്രന്റെ ഭാര്യ പ്രിയ ഏറ്റുവാങ്ങി.വേണു സംവിധാനം ചെയ്ത കാര്ബണ് എന്ന ചിത്രവും അഞ്ച് പുരസ്കാരങ്ങള് നേടിയിരുന്നു. എം.പദ്മകുമാര് സംവിധാനം ചെയ്ത ജോസഫിലെ അഭിനയത്തിന് ജോജു ജോര്ജ്ജ് മികച്ച സ്വഭാവ നടനുള്ള പുരസ്കാരം നേടി. മികച്ച ബാലതാരത്തിനുള്ള പുരസ്കാരം മാസ്റ്റര് റിഥുനും (അപ്പുവിന്റെ സത്യാന്വേഷണം) അബനി ആദിയും നേടി. പന്ത് എന്ന ചിത്രത്തിലെ പ്രകടനത്തിനാണ് അബനി ആദി പുരസ്കാരം നേടിയത്. ഇത് രണ്ടാം തവണയാണ് മികച്ച ബാലതാരത്തിനുള്ള പുരസ്കാരം അബനി സ്വന്തമാക്കുന്നത്.
https://www.facebook.com/Malayalivartha
