തുടര്‍ചികിത്സയ്ക്ക് കാരുണ്യ ബനവലന്റ് ഫണ്ടില്‍ നിന്നും സാമ്പത്തിക സഹായം നല്‍കുമെന്ന ഉറപ്പ് സര്‍ക്കാര്‍ പിന്‍വലിച്ചത് സാധാരണക്കാരോട് കാട്ടുന്ന ക്രൂരതയാണെന്നു പ്രതിപക്ഷ നേതാവ് രമേശ് ചെന്നിത്തല പറഞ്ഞു. കാരുണ്യ ബെനവലന്റ് ഫണ്ട് പ്രകാരം സഹായം നല്‍കിയാല്‍ ബാധ്യത ആശുപത്രികള്‍ക്കാണെന്ന സര്‍ക്കുലര്‍ അടിയന്തരമായി പിന്‍വലിക്കണം. തികച്ചും ജനവിരുദ്ധമായ സര്‍ക്കാര്‍ നടപടിയാണിത്.

ചികിത്സാസഹായത്തിനു ജൂണ്‍ 30 വരെ അപേക്ഷ നല്‍കിയവര്‍ക്ക് കാരുണ്യ ബെനവലന്റ് ഫണ്ടില്‍ നിന്നും സഹായം ഡിസംബര്‍ 31 വരെ ലഭിക്കുമെന്ന ആരോഗ്യമന്ത്രിയുടെ ഉറപ്പിന്റെ ലംഘനം ആണ്. ആരോഗ്യ സുരക്ഷാ പദ്ധതിയും കാരുണ്യ ബനവലന്റ് ഫണ്ടും തമ്മിലുള്ള ആശയക്കുഴപ്പം ഇതുവരെ പരിഹരിച്ചിട്ടില്ല. പരിഹാരം ഇനിയും അകലെയായതിനാല്‍ ആശുപത്രികള്‍ രോഗികളെ മടക്കി അയക്കുകയാണ്.

യുഡിഎഫ് സര്‍ക്കാര്‍ കൊണ്ടുവന്ന കാരുണ്യ പദ്ധതി പ്രത്യേകമായി നിലനിര്‍ത്തി അതിനാവശ്യമായ ഫണ്ട് അടിയന്തരമായി നല്‍കണമെന്നും പ്രതിപക്ഷ നേതാവ് ആവശ്യപ്പെട്ടു.കാരുണ്യബനവലന്റ് ഫണ്ട് വഴിയുള്ള തുടര്‍ചില്‍സാ സഹായത്തിനുള്ള തുക എവിടെ നിന്ന് ലഭിക്കുമെന്നു വ്യക്തമാക്കാതെ സര്‍ക്കാര്‍ ഒളിച്ചു കളിക്കുന്നത് മൂലം പതിനായിരക്കണക്കിന് രോഗികളാണ് വഴിയാധാരമാകുന്നത്. ഉടന്‍ പരിഹരിക്കുമെന്ന് മന്ത്രിമാരുടെ വാചകമടിയല്ലാതെ ഒന്നും നടക്കുന്നുമില്ല. കാരുണ്യ ചികിത്സയോട് പല ആശുപത്രികളും പുറംതിരിഞ്ഞു നില്‍ക്കുന്നതിനാല്‍ രോഗികള്‍ നേരിടുന്ന ബുദ്ധിമുട്ട് സര്‍ക്കാര്‍ കണ്ണ് തുറന്നു കാണണമെന്ന് രമേശ് ചെന്നിത്തല പറഞ്ഞു.