അമിതഭാരം കയറ്റിയോടുന്ന ചരക്കുവാഹനങ്ങള്‍ക്ക് ഇനി പിടിവീഴും. പിടിവീണാലോ ഡ്രൈവര്‍ക്ക് ആറ് മാസം അകത്തു കിടക്കാം. മൂന്ന് വര്‍ഷത്തേക്ക് ലൈസന്‍സും റദ്ദാവും. കേന്ദ്ര ഗതാഗതമന്ത്രാലയം സംസ്ഥാന ആര്‍.ടി.സികള്‍ക്കയച്ച സര്‍ക്കുലറിലാണ് ഇതുസംബന്ധിച്ച നിര്‍ദേശമുള്ളത്.
റോഡുകള്‍ പൊതുസ്വത്താണെന്നും അമിതഭാരം കയറ്റിയോടുന്നത് മൂലം ദേശീയപാതക്കടക്കം തകരാറുണ്ടാകുകയാണെന്നും സര്‍ക്കുലറില്‍ ചൂണ്ടിക്കാട്ടുന്നു. ഇതിനുപുറമെ പൊതുമുതല്‍ നശിപ്പിച്ചതിന് വാഹന ഉടമക്കെതിരെ കേസെടുക്കാനും പിഴ ചുമത്താനും നിര്‍ദേശമുണ്ട്.

ചരക്കുവാഹനങ്ങളുടെ ശേഷിക്കനുസരിച്ച് കയറ്റാവുന്ന ലോഡിന്റെ അളവ് (ഗ്രോസ് വെഹിക്കിള്‍ വെയിറ്റ്ജി.വി.ഡബ്ല്യു) പെര്‍മിറ്റില്‍ കാണിച്ചിരിക്കും. ഈ അളവ് അധികരിച്ച് ഭാരം കയറ്റുന്ന വാഹനങ്ങള്‍ക്കാണ് കടുത്ത നടപടി വരുന്നത്. നിലവില്‍ ഇത്തരം കുറ്റങ്ങള്‍ക്ക് മൂന്ന് മാസം ലൈസന്‍സ് റദ്ദാക്കലാണ് നടപടി. അമിതഭാരം കയറ്റിപ്പോകുന്ന ചെറുതും വലുതുമായ ലോറികള്‍ അപകടങ്ങള്‍ക്കിടയാക്കുന്നതായി വ്യാപക പരാതിയുണ്ട്. ഇത്തരം ചട്ടലംഘനങ്ങള്‍ പിടികൂടാന്‍ പൊലീസോ മോട്ടോര്‍ വാഹന വകുപ്പോ ശ്രമിക്കാറുമില്ല. ചെറിയ വാഹനങ്ങളില്‍ പോലും നിയമപ്രകാരം അനുവദിച്ചതിന്റെ ഇരട്ടിയിലധികം ഭാരം കയറ്റിപ്പോകുന്നത് പതിവ് കാഴ്ചയാണ്.
വാഹനത്തിന്റെ ഇരുവശങ്ങളിലേക്കും തള്ളിനില്‍ക്കുന്ന നിലയില്‍ ചരക്കുകള്‍ കൊണ്ടുപോകുന്നത് മറ്റ് വാഹനങ്ങള്‍ക്കും ബുദ്ധിമുട്ടുണ്ടാക്കാറുണ്ട്. ഇതരസംസ്ഥാനങ്ങളില്‍നിന്ന് മണല്‍, സിമന്റ്, കമ്പി തുടങ്ങിയ നിര്‍മാണവസ്തുക്കളുമായെത്തുന്ന ലോറികളും നിയമം ലംഘിക്കുന്നു. എംസാന്‍ഡുമായി പോകുന്ന ലോറികള്‍ മിക്കവാറും 15 ടണ്‍ വരെയാണ് അധികമായി കയറ്റുന്നത്.