നിയമസഭയില്‍ വി.ശിവന്‍കുട്ടിയടക്കമുള്ള സി.പി.എം എം.എല്‍.എമാര്‍ സ്പീക്കറുടെ ഡയസും വിദേശ നിര്‍മ്മിത മൈക്ക് സെറ്റും അടക്കമുള്ള പൊതുമുതല്‍ നശിപ്പിച്ച കേസ് പിന്‍വലിക്കാന്‍ സര്‍ക്കാര്‍ കോടതില്‍ അപേക്ഷ സമര്‍പ്പിച്ചു. എന്നാല്‍ അപേക്ഷ അടിയന്തിരമായി പരിഗണിക്കേണ്ട കാര്യമില്ലെന്ന് തിരുവനന്തപുരം ചീഫ് ജുഡീഷ്യല്‍ മജിസ്‌ട്രേട്ട് ഷിജു ഷെയ്ക്ക് വ്യക്തമാക്കി. തുടര്‍ന്ന് ഹര്‍ജിയില്‍ സെപ്റ്റംബര്‍ രണ്ടിന് വിശദമായ വാദം ബോധിപ്പിക്കാന്‍ സര്‍ക്കാര്‍ അഭിഭാഷകയായ പ്രോസിക്യൂഷന്‍ ഡെപ്യൂട്ടി ഡയറക്ടര്‍ ബീനയോട് ഉത്തരവിട്ടു. 2015 ലാണ് കേസിനാസ്പദമായ സംഭവം നടന്നത്. 2011-16 ലെ ഇടത് എംഎല്‍എ മാരായ കെ.അജിത്, കുഞ്ഞമ്പു മാസ്റ്റര്‍ , കായിക മന്ത്രിയായ ഇ.പി.ജയരാജന്‍ , സി.കെ.സദാശിവന്‍ , വി.ശിവന്‍കുട്ടി , ഉന്നത വിദ്യാഭ്യാസ മന്ത്രിയായ കെ.റ്റി. ജലീല്‍ എന്നിവരാണ് നിയമസഭക്കകത്ത് സ്പീക്കറുടെ ഡയസ് കൈയ്യേറി നാശനഷ്ടം വരുത്തിയ കേസിലെ ഒന്നു മുതല്‍ അറു വരെയുള്ള പ്രതികള്‍.

കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് ധനമന്ത്രിയായിരുന്ന കെ.എം.മാണിയുടെ ബജറ്റ് അവതരണം തടസ്സപ്പെടുത്തുന്നതിനിടെയാണ് പൊതുമുതല്‍ നശിപ്പിച്ചത്. ബാര്‍കോഴ ആരോപണത്തിന്റെ മുള്‍മുനയില്‍ നിന്ന കെ.എം മാണിയുടെ ബജറ്റ് പ്രസംഗം തടസപ്പെടുത്താനും ഇവര്‍ ശ്രമിച്ചിരുന്നു. സാമാജികര്‍ പ്രതികളായ ക്രിമിനല്‍ കേസുകള്‍ വിചാരണ ചെയ്യാനായി സുപ്രീം കോടതി ഉത്തരവ് പ്രകാരം രൂപീകരിച്ച എറണാകുളം സ്‌പെഷ്യല്‍ കോടതിയിലേക്ക് 2018 ഏപ്രില്‍ 21ന് കൈമാറ്റ സാക്ഷ്യപത്രം തയ്യാറാക്കി തിരുവനന്തപുരം സി ജെ എം കോടതി അയച്ചിരുന്നു. എന്നാല്‍ ഓരോ ജില്ലയിലും പ്രത്യേക കോടതി രൂപീകരിക്കാന്‍ തുടര്‍ന്ന് തീരുമാനമുണ്ടായതിനെ തുടര്‍ന്നാണ് കേസ് റെക്കോര്‍ഡുകള്‍ തിരുവനന്തപുരം സിജെഎം കോടതിയിലേക്ക് തിരിച്ചയച്ചത്.ക്രിമിനല്‍ നടപടി ക്രമത്തിലെ വകുപ്പ് 321 പ്രകാരമാണ് സര്‍ക്കാര്‍ പിന്‍വലിക്കല്‍ ഹര്‍ജി സര്‍ക്കാര്‍ സമര്‍പ്പിച്ചത്. വിചാരണ കൂടാതെ പ്രതികളെ കുറ്റ വിമുക്തരാക്കി വിട്ടയക്കണമെന്നാണ് സര്‍ക്കാരിന്റെ ആവശ്യം.

കേസ് പിന്‍വലിക്കണമെന്ന് ആവശ്യപ്പെട്ട് വി. ശിവന്‍കുട്ടി 2018 ജനുവരിയില്‍ മുഖ്യമന്ത്രി പിണറായി വിജയനാണ് അപേക്ഷ നല്‍കിയിരുന്നു. തുടര്‍നടപടിക്കായി മുഖ്യമന്ത്രി നിയമവകുപ്പിന് അപേക്ഷ കൈമാറിയിരുന്നു. അനാവശ്യവും രാഷ്ട്രീയപ്രേരിതവുമാണ് കേസ് എന്നാണ് കത്തില്‍ പറയുന്നത്. സ്പീക്കറുടെ ഡയസിലെ ഉപകരണങ്ങളും ഫര്‍ണിച്ചറുകളുമടക്കം രണ്ട് ലക്ഷം രൂപയുടെ പൊതുമുതല്‍ നശിപ്പിച്ചുവെന്നാണ് കേസ്. പ്രതികള്‍ കോടതിയില്‍ ഹാജരായി ജാമ്യം എടുത്തിരുന്നു. നിയമസഭയില്‍ സ്പീക്കറുടെ ഡയസില്‍ കയറി മുദ്രാവാക്യം വിളിച്ച വി ശിവന്‍കുട്ടി എംഎല്‍എയെ അന്നത്തെ സ്പീക്കര്‍ സസ്‌പെന്‍ഡ് ചെയ്തിരുന്നു. ഒരു ദിവസത്തേക്കാണ് സസ്പന്‍ഡ് ചെയ്തത്. മറ്റ് നാല് പ്രതിപക്ഷ എംഎല്‍എമാര്‍ക്ക് താക്കീതും നല്‍കിയിരുന്നു. മാവേലിക്കര എം.എല്‍.എ ആര്‍ രാജേഷ്, കല്യാശ്യേരി എം.എല്‍.എ ടിവി രാജേഷ്, പൊന്നാനി എം.എല്‍.എ പി ശ്രീരമാകൃഷ്ണന്‍, കുന്നംകുളം എം.എല്‍.എ ബാബു എം പാലിശ്ശേരി എന്നിവരെയാണ് താക്കീത് ചെയ്തത്. പ്രതിപക്ഷ അംഗങ്ങള്‍ ഗുരുതര ചട്ടലംഘനം നടത്തിയതായി ഡെപ്യൂട്ടി സ്പീക്കര്‍ പാലോട് രവി പറഞ്ഞു.