ഇനിയെല്ലാം ഏമാന്റെ കൈയ്യില്.... ഭക്തരോടൊപ്പമാണോയെന്ന് ചോദിച്ചാല് അതെ ഭക്തവിരുദ്ധര്ക്കെതിരെയാണോയെന്ന് ചോദിച്ചാല് നൂറുവട്ടം അതേ; ശബരിമല വിവാദത്തോളം ശ്രദ്ധ നേടിയ ദേവസ്വം ബോര്ഡ് പ്രസിഡന്റ് എ പത്മകുമാര് ആകാംക്ഷയില്; പത്മകുമാറിന്റെ കാലാവധി നവംബറില് അവസാനിക്കും
ശബരിമല യുവതീ പ്രവേശന വിഷയത്തില് നിന്ന നില്പില് കാലുമാറി എന്നതു കൊണ്ടു തന്നെ തിരുവിതാംകൂര് ദേവസ്വം ബോര്ഡ് പ്രസിഡന്റ് എ. പത്മകുമാര് വിവാദത്തിലുമായി. പത്രക്കാരുടെ മുമ്പില് താന് ഭക്തര്ക്കൊപ്പമാണെന്ന് പറഞ്ഞ ശേഷം മുഖ്യമന്ത്രിയെ കണ്ടു വരുമ്പോള് മലക്കം മറിഞ്ഞത് പലവട്ടം ചര്ച്ചയായി. അതിനാല് തന്നെ നവംബറില് കാലാവധി അവസാനിക്കുന്ന പ്രസിഡന്റിന്റെ കാര്യം ആകാംക്ഷയിലാണ്. അതേസമയം പത്മകുമാറിന്റെ കാലാവധി രണ്ടുവര്ഷം കൂടി നീട്ടാന് സര്ക്കാര് തീരുമാനിച്ചതായാണ് സൂചന.
സി.പി.എം. പത്തനംതിട്ട ജില്ലാ സെക്രട്ടേറിയറ്റ് അംഗം കൂടിയായ പത്മകുമാര് ശബരിമല യുവതീപ്രവേശന വിഷയത്തില് സര്ക്കാരിനോട് ഇടഞ്ഞതോടെ പാര്ട്ടിയിലും ഒറ്റപ്പെട്ടിരുന്നു. പിന്നീടു ജില്ലാ സെക്രട്ടേറിയറ്റില്നിന്നു പുറത്താകുന്ന സ്ഥിതിയായതോടെ അദ്ദേഹം സര്ക്കാരിനും പാര്ട്ടിക്കും വഴങ്ങി.
ലോക്സഭാ തെരഞ്ഞെടുപ്പില് ഇടതുപക്ഷത്തിനേറ്റ കനത്തതിരിച്ചടി, ശബരിമല വിഷയത്തിന്റെ പ്രത്യാഘാതമാണെന്നു തിരിച്ചറിഞ്ഞതോടെയാണു പത്മകുമാറിനു കാലാവധി നീട്ടിനല്കാന് തീരുമാനിച്ചതെന്നാണു സൂചന. ഇപ്പോഴത്തെ ബോര്ഡില് പ്രസിഡന്റ് പത്മകുമാറിന്റെയും അംഗം കെ.പി. ശങ്കര്ദാസിന്റെയും കാലാവധിയാണു നവംബറില് അവസാനിക്കുന്നത്. ശങ്കര്ദാസിന്റെ കാലാവധി നീട്ടുന്ന കാര്യത്തില് തീരുമാനമായിട്ടില്ല.
ശബരിമല യുവതീപ്രവേശത്തോടു മാനസികമായി വിയോജിച്ചിരുന്ന പത്മകുമാറിനെ സി.പി.എം. സംസ്ഥാന സെക്രട്ടറി കോടിയേരി ബാലകൃഷ്ണന് ഉള്പ്പെടെ തള്ളിപ്പറഞ്ഞിരുന്നു. ദേവസ്വം കമ്മിഷണറായിരുന്ന എന്. വാസുവുമായും അദ്ദേഹം ശീതസമരത്തിലായിരുന്നു. ഒടുവില് സര്ക്കാരിനു വഴങ്ങിയതോടെയാണ് അദ്ദേഹത്തിന് ഒരവസരംകൂടി നല്കാന് സി.പി.എമ്മും തീരുമാനിച്ചത്.
പമ്പയില് പ്രളയാനന്തര പുനര്നിര്മാണം ഉള്പ്പെടെ പുരോഗമിക്കുന്നതിനാല് പുതിയ പ്രസിഡന്റിനെക്കാള് നല്ലതു പത്മകുമാര് തുടരുന്നതാണെന്ന വിലയിരുത്തലുമുണ്ട്. അതേസമയം പത്മകുമാറിനെ പത്തനംതിട്ട ജില്ലാ സെക്രട്ടേറിയറ്റില് തുടരാന് അനുവദിക്കുന്നതു സംബന്ധിച്ചു ചര്ച്ച നടക്കുന്നതേയുള്ളെന്നാണു സി.പി.എം. കേന്ദ്രങ്ങള് നല്കുന്ന സൂചന.
ശബരിമല വിവാദം കത്തുന്ന സമയത്ത് പത്മകുമാര് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനെ കണ്ട് രാജി സന്നദ്ധത അറിയിച്ചതാണ്. സുപ്രീംകോടതിയില് ദേവസ്വം ബോര്ഡ് എടുത്ത നിലപാടിനോട് വിയോജിച്ച് പത്മകുമാര് പ്രതികരിച്ചത് ദേവസ്വം ബോര്ഡിനുള്ളില് തന്നെ ആശയക്കുഴപ്പങ്ങളുണ്ടാക്കിയിരുന്നു. ബോര്ഡ് അംഗങ്ങളില് ഒരു വിഭാഗം പത്മകുമാറിനെതിരെ തിരിയുകയും ഭിന്നത രൂക്ഷമാവുകയും ചെയ്തിരുന്നു. ഇതോടെ പത്മകുമാറിനെ ബോര്ഡ് പ്രസിഡന്റ് സ്ഥാനത്തുനിന്ന് നീക്കണമെന്ന ആവശ്യവും ഒരു കൂട്ടര് മുന്നോട്ട് വച്ചിരുന്നു. പത്മകുമാര് സ്വീകരിച്ച നിലപാടുകള് ബോര്ഡിനും സര്ക്കാരിനും പ്രതിസന്ധിയുണ്ടാക്കുകയും ചെയ്തു. ഇത് കണക്കിലെടുത്ത് അദ്ദേഹത്തെ മാറ്റണമെന്ന് പൊതു അഭിപ്രായവും രൂപപ്പെട്ടു. പാര്ട്ടിക്കുള്ളിലും ഈ അഭിപ്രായം ശക്തമായിരിന്നു. പകരം അഡ്വ. രാജഗോപാലന് നായരെ പ്രസിഡന്റ് സ്ഥാനത്തേക്കെത്തിക്കാനും അണിയറയില് നീക്കം നടന്നിരുന്നു. എന്നാല് കാലം മാറിയതോടെ പത്മകുമാര് വീണ്ടും സിപിഎമ്മിന് ഇഷ്ടക്കാരനായി മാറിയിരിക്കുകയാണ്.
"
https://www.facebook.com/Malayalivartha
