ഇടവേള കഴിഞ്ഞു ഇനി ക്ലൈമാക്സ്... നടിയെ ആക്രമിച്ച കേസില് വഴിത്തിരിവ്; ഒരു കാരണവശാലും ദിലീപിന് ദൃശ്യങ്ങള് നല്കരുതെന്ന് ആക്രമിക്കപ്പെട്ട നടി; ദിലീപിന് അനുകൂലമായി സര്ക്കാര് നിലപാടെടുക്കുമോയെന്ന ആശങ്കയെ തുടര്ന്ന് നടി സ്വകാര്യ ഹര്ജി നല്കി
ഒരിടവേളയ്ക്ക് ശേഷം കൊച്ചിയില് നടി ആക്രമിക്കപ്പെട്ട കേസ് വീണ്ടും ഉയരുകയാണ്. കേസില് സുപ്രീം കോടതിയിയുടെ ഇടപെടല് ആവശ്യപ്പെട്ട് നടി ഹര്ജി നല്കിയിരിക്കുകയാണ്. നിര്ണായക തെളിവായ മെമ്മറി കാര്ഡിന്റെ പകര്പ്പ് പ്രതി ദിലീപിനു ഒരു കാരണവശാലും നല്കരുതെന്നാവശ്യപ്പെട്ടാണ് നടി സുപ്രീം കോടതിയെ സമീപിച്ചിരിക്കുന്നത്. അതേസമയം ഇരയ്ക്കു വേണ്ടി പ്രോസിക്യൂഷന് അഭിഭാഷനുള്ളതിനാല് സ്വകാര്യഹര്ജി സ്വീകരിക്കണോയെന്ന കാര്യത്തില് കോടതി സംസ്ഥാന സര്ക്കാരിന്റെ നിലപാടാരായുകയും ചെയ്തു.
അതേസമയം ദിലീപിന് അനുകൂലമായി സര്ക്കാര് നിലപാടെടുക്കുമോയെന്ന ആശങ്ക മൂലമാണു നടി സ്വകാര്യ ഹര്ജി സമര്പ്പിച്ചതെന്നാണ് വിലയിരുത്തല്. പീഡനദൃശ്യം പകര്ത്തിയ മെമ്മറി കാര്ഡിന്റെ പകര്പ്പാവശ്യപ്പെട്ടു ദിലീപ് നല്കിയ ഹര്ജി സുപ്രീം കോടതി പരിഗണിക്കുന്നുണ്ട്. അതേസമയം ദൃശ്യം കൈമാറുന്നതു തന്റെ അന്തസിനെ ബാധിക്കുമെന്നാണു നടിയുടെ വാദിക്കുന്നത്.
സ്വകാര്യതയ്ക്കു ഭംഗമുണ്ടാക്കുന്ന തെളിവുകള് പുറത്തുവിടരുതെന്ന സുപ്രീം കോടതി വിധിയും സ്വകാര്യത മൗലികാവകാശമാണെന്ന വിധിയും ഹര്ജിയില് ചൂണ്ടിക്കാട്ടിയാണ് ഹര്ജി സമര്പ്പിച്ചിരിക്കുന്നത്. പ്രതിക്കു സമൂഹത്തിലുള്ള സ്വാധീനമുപയോഗിച്ച് തന്റെ വ്യക്തിത്വം കളങ്കപ്പെടുത്താന് സാധ്യതയുണ്ടെന്നും നടി പറയുന്നു. മെമ്മറി കാര്ഡിന്റെ പകര്പ്പ് കൊടുത്താല് ദൃശ്യം സാമൂഹിക മാധ്യമങ്ങളില് പ്രചരിപ്പിക്കാനിടയുണ്ടെന്ന പേടിയും പങ്കുവയ്ക്കുന്നു. മുദ്രവച്ച കവറില് സ്വന്തം പേര് പരാമര്ശിക്കാതെയാണു നടി ഹര്ജി നല്കിയിരിക്കുന്നത്. പേര് പരാമര്ശിക്കരുതെന്നു നടി ആവശ്യപ്പെട്ടിട്ടുള്ളതിനാല് കോടതി രേഖയിലും ഉത്തരവിലുമെല്ലാം അഭിഭാഷകന്റെ പേരാകും ഉണ്ടാകുക.
കോഴിക്കോടുള്ള അഭിഭാഷകന് മുഖേനയാണു നടി ഹര്ജി നല്കിയിരിക്കുന്നത്. നേരത്തേ ഹൈക്കോടതിയില് ദിലീപിന് അനുകൂലമായ ചില നിലപാടുകള് സര്ക്കാര് സ്വീകരിച്ചത് ഏറെ ചര്ച്ചയായിരുന്നു. അതേസമയം മെമ്മറി കാര്ഡിന്റെ പകര്പ്പ് നല്കരുതെന്നാണ് സര്ക്കാര് ഹൈക്കോടതിയില് നിലപാടെടുത്തത്.
കൊച്ചിയില് നടി ആക്രമിക്കപ്പെട്ട കേസ് ഏറെ നാടകീയത നിറഞ്ഞതായിരുന്നു. തൃശൂര് നഗരത്തില് നിന്ന് എറണാകുളത്തേക്കുള്ള യാത്രാമദ്ധ്യേ യാണ് പീഡിപ്പിക്കപ്പെടുകയും ആക്രമണ ദൃശ്യങ്ങള് മൊബൈല് ഫോണില് പകര്ത്തപ്പെടുകയും ചെയ്തത്. നടി ആക്രമിക്കപ്പെട്ട സംഭവത്തില് നടന് ദിലീപ് ആദ്യം മുതലേ സംശയത്തിന്റെ നിഴലില് നില്ക്കുകയും ഒടുവില് പോലീസ് അറസ്റ്റ് ചെയ്യുകയും ചെയ്തു. 85 ദിവസം റിമാന്ഡില് കഴിഞ്ഞ ദിലീപിന് പിന്നീട് സോപാധികജാമ്യം കിട്ടി. നടിയെ ആക്രമിക്കുവാന് വാടകഗുണ്ടകളെ ഏര്പ്പെടുത്തിയെന്നും ഇതില് ലൈംഗിക അതിക്രമം ഉള്പ്പെടെ അതീവ ഗുരുതരമായ കുറ്റങ്ങള് ദിലീപ് ചെയ്തെന്നാണ് പ്രോസിക്യൂഷന് ആരോപിച്ചത്.
2017 ഫെബ്രുവരി പതിനേഴിനാണ് കേസിന് ആസ്പദമായ പ്രധാന സംഭവങ്ങള് നടക്കുന്നത്. തൃശൂരില്നിന്നു എറണാകുളത്തേയ്ക്ക് ടെമ്പോ ട്രാവലറില് സഞ്ചരിക്കവേയാണ് നടി ആക്രമിക്കപ്പെട്ടത്. വണ്ടി ഓടിച്ചിരുന്നത് മാര്ട്ടിന് എന്നു പേരുള്ള ഒരു ഡ്രൈവറായിരുന്നു. നടി സഞ്ചരിച്ചിരുന്ന കാറിന് പിന്നില് വാന് ഇടിപ്പിച്ചായിരുന്നു ഗുണ്ടകള് ആക്രമണത്തിനു തുടക്കം കുറിച്ചത്. പള്സര് സുനി എന്ന ക്രിമിനല് ഉള്പ്പെടെയുള്ള ആക്രമി സംഘം നടിയുമായി കാറില് ഒരു മണിക്കൂറിലധികം നഗരത്തിലൂടെ കറങ്ങിയിരുന്നു. ഇതിനിടെ അവര് നടിയെ ക്രൂരമായി പീഡിപ്പിക്കുകയും ദൃശ്യങ്ങള് മൊബൈലില് പകര്ത്തുകയും ചെയ്തു. ശേഷം കാര് ഉപേക്ഷിച്ച് സംഘം കടന്നുകളയുകയും ചെയ്തു.
സംഭവം നടന്നതിനുശേഷം നടി ആദ്യം അഭയം തേടിയത് സംവിധായകന് ലാലിന്റെ ഭവനത്തിലായിരുന്നു. താമസിയാതെ സ്ഥലം എം.എല്.എ കൂടി സ്ഥലത്തെത്തിയതോടെ കാര്യങ്ങള് തുറന്നുപറയാന് നടി ധൈര്യപ്പെട്ടു. അതോടെയാണ് സംഭവം പുറത്തറിഞ്ഞത്.
"
https://www.facebook.com/Malayalivartha
