ആറംഗ സംഘത്തിലൂടെ ചരിത്രഭാഗ്യം തേടിയെത്തിയ ശിവന്‍കുട്ടിയുടെ ലോട്ടറി എജന്‍സിക്ക് തൊട്ടതെല്ലാം പൊന്നാവുന്ന വര്‍ഷമാണ് ഇത്. ഈ വര്‍ഷം ഇതിപ്പോള്‍ മൂന്നാമത്തെ തവണയാണ് ശിവന്‍കുട്ടിയുടെ ഏജന്‍സിയില്‍ നിന്നും വിറ്റ ടിക്കറ്റിന് ഒന്നാം സമ്മാനം ലഭിക്കുന്നത്.

6 വര്‍ഷമായി കരുനാഗപ്പള്ളി ഒട്ടത്ത് മുക്കില്‍ പ്രവര്‍ത്തിച്ചിരുന്ന സബ് ഏജന്‍സി 2 വര്‍ഷം മുമ്പാണ് ലാലാജി ജംക്ഷനിലേക്ക് മാറ്റിയത്. മൂത്ത മകന്‍ ശ്രീമോന്‍ ആയൂര്‍വേദ ഡോക്ടറാണ്. ഇളയ മകന്‍ ശരത്തും ഭാര്യ ഉഷാകുമാരിയും ശിവന്‍കുട്ടിയോടൊപ്പം സഹായികളായി രംഗത്തുണ്ട്.

ഈ വര്‍ഷം കാരുണ്യയുടെ 80 ലക്ഷവും നിര്‍മലിന്റെ 70 ലക്ഷവും ഒന്നാം സമ്മാനങ്ങളുള്ള ടിക്കറ്റുകള്‍ ശിവന്‍കുട്ടിയുടെ ഏജന്‍സിയില്‍ നിന്നു കൊടുത്തതാണ്. വിവിധ സ്ഥലങ്ങളിലായി 5 സബ് ഏജന്‍സികളുണ്ട്.

ജേതാക്കളായ റോണിയും വിവേകും രതീഷും ചേര്‍ന്നു ടിക്കറ്റ് വാങ്ങാന്‍ തയാറെടുത്തതോടെ രാജീവനും രംജിനും ഒപ്പം ചേര്‍ന്നു. ആറു പേരെങ്കിലും വേണമെന്ന അഭിപ്രായം വന്നതോടെ മനസില്ലാ മനസ്സോടെയാണ് സുബിനും സംഘത്തില്‍ ചേര്‍ന്നത്. പക്ഷേ, ഭാഗ്യം ഇങ്ങനെ ഞെട്ടിക്കുമെന്ന് സംഘം കരുതിയില്ല.

ലോട്ടറി വില്‍പന നടത്തിയ എസ്.സിദ്ദിഖ്, ലോട്ടറി ഏജന്റ് പി.ശിവന്‍കുട്ടി

ടിവിയില്‍ ആദ്യം ലോട്ടറി ഫലം വാര്‍ത്തയായി വന്നതോടെയാണ് ഇവര്‍ ടിക്കറ്റ് പരിശോധിച്ചത്. തുടര്‍ന്നു ഫലം ഉറപ്പാക്കാന്‍ നേരെ ലോട്ടറി വില്‍പനക്കാരനായ സിദ്ദീഖിനരികിലെത്തി. ഭാഗ്യത്തിന്റെ വിളി സത്യമാണെന്ന് ബോധ്യപ്പെട്ടതോടെ ആര്‍പ്പുവിളിയായി. ഭാഗ്യവാന്‍മാരെ കാണാനും അഭിനന്ദിക്കാനും വിവരങ്ങള്‍ ശേഖരിക്കാനും എത്തിയവരെക്കൊണ്ടു ദേശീയപാത തിരക്കിലായി.

വിജയികളില്‍ 3 പേര്‍ മാത്രമാണു വിവാഹിതര്‍. രണ്ടാഴ്ച മുന്‍പു പിതാവ് മരിച്ച സങ്കടം മാറാത്ത അവസ്ഥയിലാണു രംജിന്‍. സ്വന്തമായി വീടില്ലാത്തവരും ഇക്കൂട്ടത്തിലൂണ്ട്. കടങ്ങളും പ്രശ്‌നങ്ങളും പരിഹരിച്ചു കുടുംബാംഗങ്ങള്‍ക്കു നല്ലൊരു ജീവിതം നല്‍കാമെന്ന പ്രതീക്ഷയിലാണിവര്‍.