ആലപ്പുഴയില് നായുടെ കടിയേറ്റവര് പ്രതിരോധ കുത്തിവയ്പ് എടുക്കണം, ആക്രമണം നടത്തിയ നായയ്ക്ക് പേവിഷബാധ സ്ഥീരീകരിച്ചു
തിരുവല്ല റീജിയണല് ലബോറട്ടറിയിലെ പരിശോധനയില്, ആലപ്പുഴ നഗരത്തിലും പരിസരങ്ങളിലും നിരവധി മനുഷ്യരേയും മൃഗങ്ങളേയും കടിച്ച നായയില് ഒരെണ്ണത്തിന് പേവിഷബാധ ഉണ്ടെന്ന് സ്ഥിരീകരിച്ച സാഹചര്യത്തില് ജനങ്ങള് ജാഗ്രത പാലിക്കണമെന്ന് അധികൃതര് മുന്നറിയിപ്പ് നല്കി.
നാട്ടുകാര് പിടികൂടിയ മറ്റൊരു നായ മൃഗസംരക്ഷണ വകുപ്പിന്റെ നിരീക്ഷണത്തിലാണ്. ഈ നായ പേ വിഷബാധയുടെ ലക്ഷണങ്ങള് കാണിച്ചിട്ടില്ലെന്ന് അധികൃതര് പറഞ്ഞു. പിടികൂടിയ ഏഴു നായകള് കൂടി നിരീക്ഷണത്തിലുണ്ട്. അതിനിടെ ഹരിപ്പാട് കരുവാറ്റയില് സ്കൂള് വിദ്യാര്ഥികള് ഉള്പ്പടെ ഏഴു പേര്ക്ക് തെരുവുനായയുടെ കടിയേറ്റു.
താമല്ലാക്കല് നന്ദനം വീട്ടില് അമൃത (അഞ്ച്), കരുവാറ്റ പുത്തന്കണ്ടത്തില് കീര്ത്തന (13), ലേഖ നിവാസില് അഞ്ജലി (14), കാര്ത്തികപ്പള്ളി വലിയപറമ്പ് ആദര്ശ് ഭവനത്തില് അശ്വിന് (17) , കുമാരപുരം ഷഹീല മന്സിലില് സജിത (38), മകള് സെല്മാ ഫാത്തിമ (ആറ്), റാന്നി ഇരിക്കുളം മുല്ലന്താനം വീട്ടില് രാജി (30) എന്നിവര്ക്കാണ് തെരുവുനായ്ക്കളുടെ കടിയേറ്റത്.
കരുവാറ്റ ഹൈസ്കൂള് ജംഗ്ഷനിലായിരുന്നു വൈകുന്നേരം നാലോടെ തെരുവുനായ ആക്രമണം. അതേസമയം നായയുടെ കടിയേറ്റവര് ആലപ്പുഴ മെഡിക്കല് കോളജ് ആശുപത്രി, ജനറല് ആശുപത്രി എന്നിവിടങ്ങളില് ചികിത്സയിലാണ്. നായയുടെ കടിയേറ്റവര് കൃത്യമായ പ്രതിരോധ കുത്തിവെയ്പിന് വിധേയമാകണമെന്നും ഡോക്ടറുടെ നിര്ദേശപ്രകാരം തുടര്നടപടികള് സ്വീകരിക്കണമെന്നും അധികൃതര് അറിയിച്ചു.
വളര്ത്തു മൃഗങ്ങള്ക്ക് കടിയേറ്റിട്ടുണ്ടോയെന്ന് നിരീക്ഷിക്കണമെന്ന് ജില്ല കളക്ടര് അറിയിച്ചു. ഏതെങ്കിലും വളര്ത്തു മൃഗത്തിന്റെ കടിയോ നഖ ക്ഷതമോ ഏറ്റാലും ആശുപത്രിയിലെത്തി ചികിത്സ തേടണം. ആളുകള് ഇക്കാര്യത്തില് പരിഭ്രാന്തരാകാതെ ജാഗ്രതപാലിക്കുകയാണ് വേണ്ടതെന്ന് അധികൃതര് പറയുന്നു.
https://www.facebook.com/Malayalivartha