കോണ്‍ഗ്രസിലെ ഏറ്റവും ശ്രദ്ധേയമായ നേതാക്കളിലൊരാളായി ശശി തരൂര്‍ മാറുകയാണ്. ശശി തരൂരിന്റെ ചില നിലപാടുകളാണ് അദ്ദേഹത്തെ ദേശീയ ശ്രദ്ധയിലെത്തിക്കുന്നത്. അന്ധമായ മോദി വിരോധം നല്ലതല്ലെന്ന ശശി തരൂരിന്റെ പ്രസ്താവന കേരള നേതാക്കള്‍ ചോദ്യം ചെയ്തിരുന്നു. ഇതിനെ തുടര്‍ന്ന് കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ റിപ്പോര്‍ട്ടും ആവശ്യപ്പെട്ടിരുന്നു. താനാണ് ഏറ്റവും വലിയ മോദി വിമര്‍ശകനെന്ന് പറഞ്ഞ് ശശി തരൂര്‍ തടിയൂരി.

അതേസമയം ഇതിന്റെ പേരില്‍ കേരള നേതാക്കള്‍ ശശി തരൂരുമായി കൊമ്പു കോര്‍ത്തിരുന്നു. അവസാനം കെ. മരുളീധരന്‍ ഇതേറ്റെടുത്തതോടെ കൈവിട്ടുപോയി. പന്നികളുമായി ചര്‍ച്ചയ്ക്കില്ലെന്ന തരുരിന്റെ പ്രസ്താവന മറ്റൊരു തലത്തിലാക്കി. അങ്ങനെ ആ വിവാദം അവസാനിച്ചപ്പോള്‍ മറ്റൊരു പ്രസ്താവനയുമായി ശശി തരൂര്‍ രംഗത്തെത്തി.

ഇതിനിടെ കോണ്‍ഗ്രസ് പാര്‍ട്ടി നയത്തെയും ചോദ്യം ചെയ്ത് ശശി തരൂര്‍ രംഗത്തെത്തി. കോണ്‍ഗ്രസ് പാര്‍ട്ടിയിലൂടെ തന്റെ ഭാവി മെച്ചപ്പെടുത്താമെന്ന് കരുതിയല്ല പാര്‍ട്ടിയിലേക്ക് വന്നതെന്നാണ് തരൂര്‍ പറഞ്ഞത്. കോണ്‍ഗ്രസ് പാര്‍ട്ടി പ്രവര്‍ത്തനത്തിലൂടെ തന്റെ ആശയങ്ങള്‍ മികച്ച രീതിയില്‍ സമൂഹത്തിന് മുന്നിലേക്ക് പകര്‍ന്നു കൊടുക്കാനാകും എന്ന വിശ്വാസത്തിലാണ് പാര്‍ട്ടിയിലേക്ക് വന്നത്. കേവലം സീറ്റിന് വേണ്ടിയോ വോട്ടിന് വേണ്ടിയോ തന്റെ നിലപാടുകള്‍ അടിയറ വെക്കാനില്ല. ആജീവനന്തകാലം കോണ്‍ഗ്രസില്‍ തന്നെ തുടരാമെന്ന പ്രതീക്ഷയിലല്ല പാര്‍ട്ടിയില്‍ ചേര്‍ന്നതെന്നും തരൂര്‍ വ്യക്തമാക്കി.

അതോടെ ഈ വിവാദം കെട്ടടുങ്ങിയതാണ്. എന്നാല്‍ അമേരിക്കയിലെ ഹൂസ്റ്റണില്‍ പ്രധാനമന്ത്രി നരേന്ദ്രമോദി പങ്കെടുക്കുന്ന ഹൗഡി മോദി പരിപാടിയെ ചുറ്റിപ്പറ്റിയാണ് പുതിയ വിവാദം ഉണ്ടായിരിക്കുന്നത്. ഇക്കാര്യത്തില്‍ മോദിയെ വിമര്‍ശിച്ച കോണ്‍ഗ്രസ് നേതാവ് രാഹുല്‍ ഗാന്ധിയുടെ നിലപാടിനെ തള്ളിയാണ് ശശി തരൂര്‍ രംഗത്തെത്തിയിരിക്കുന്നത്. പ്രതിപക്ഷത്തെ എംപിയെന്ന നിലയില്‍ നരേന്ദ്രമോദിയുടെ നയങ്ങളെയും പ്രസ്താവനകളെയും നടപടികളെയും വിമര്‍ശിക്കാനും വീഴ്ചകള്‍ തുറന്നുകാണിക്കാനും തനിക്ക് അവകാശമുണ്ട്. എന്നാല്‍ അദ്ദേഹം വിദേശ രാജ്യങ്ങളില്‍ പോകുമ്പോള്‍ ഇന്ത്യയെ പ്രതിനിധീകരിച്ചാണ് പോകുന്നത്. അദ്ദേഹം അപ്പോള്‍ സ്വീകരിക്കപ്പെടേണ്ടത് നല്ല രീതിയിലാണ്. പ്രധാനമന്ത്രിയെന്ന നിലയില്‍ അദ്ദേഹത്തിന് ബഹുമാനം ലഭിക്കേണ്ടതുണ്ട്. ഇത്തരം വിമര്‍ശനം കോണ്‍ഗ്രസ് നടത്തുന്നത് നല്ലതല്ലെന്നാണ് തരൂരിന്റെ അഭിപ്രായം.

നരേന്ദ്ര മോദിയെ കുറിച്ച് വിമര്‍ശനാത്മകമായി ഒന്നും പറയാനില്ല. രാജ്യത്തിനുള്ളില്‍ നടക്കുന്ന കാര്യങ്ങളില്‍ മാത്രമാണ് മോദി വിമര്‍ശനം അര്‍ഹിക്കുന്നത്. അദ്ദേഹത്തിന് നിരവധി പിഴവുകളുണ്ട്. നയങ്ങള്‍ പലതും ജനദ്രോഹപരമാണ്. അത് ആവശ്യ സമയത്ത് കോണ്‍ഗ്രസ് ഉയര്‍ത്തി കാണിക്കണം. എന്നാല്‍ പ്രധാനമന്ത്രിയെന്ന നിലയില്‍ മോദിക്ക് എല്ലാവിധ ബഹുമാനവും നല്‍കണം. അത് രാജ്യത്തിന് ആവശ്യമാണ്.

ഹൗഡി മോദി വെറും തട്ടിപ്പാണെന്ന് കോണ്‍ഗ്രസ് വിമര്‍ശിച്ചിരുന്നു. മുന്‍കൂട്ടി സ്‌പോണ്‍സേഡ് ചെയ്ത പരിപാടി കൊണ്ട് സംരംഭകര്‍ ഇന്ത്യയിലേക്ക് എത്തില്ലെന്നായിരുന്നു രാഹുല്‍ ഗാന്ധിയുടെ വിമര്‍ശനം. ഹൗഡി ഇന്ത്യന്‍ എക്കോണമി റാലിയില്‍ ഓഹരി വിപണിയിലെ കുതിപ്പിനായി പ്രധാനമന്ത്രി എന്താണ് ചെയ്യുക എന്ന കാര്യം അതിശയകരമാണ്. ഹൂസ്റ്റണിലെ പരിപാടി ലോകത്തിലെ ഏറ്റവും ചെലവേറിയ പരിപാടികളിലൊന്നാണ്. എന്നാല്‍ പ്രിയപ്പെട്ട മോദി ഇന്ത്യയെ എത്തിച്ച സാമ്പത്തിക കുഴപ്പത്തിന്റെ യാഥാര്‍ത്ഥ്യം ഒരു പരിപാടി കൊണ്ടും മറച്ചുവെക്കാനാവില്ലെന്നുമായിരുന്നു രാഹുല്‍ പറഞ്ഞത്. ഇതിനേയാണ് ശശി തരൂര്‍ പൊളിച്ചടുക്കിയത്. ഇതോടെ ശശി തരൂരിന് വലിയ കയ്യടിയാണ് ലഭിക്കുന്നത്. പലരും മോദി ഭക്തനായും തരൂരിനെ വ്യാഖ്യാനിക്കുന്നുണ്ട്.