കുറിയര്‍ സ്ഥാപനത്തില്‍ നിന്ന് മുളക് സ്‌പ്രേ അടിച്ച് കവര്‍ച്ച നടത്തിയ കേസിലെ മുഖ്യ ആസൂത്രകനും ഗുണ്ടയുമായ പനമ്പാലം സ്വദേശി ജെയ്‌സ് മോന്‍ ( അലോട്ടി-25 ) പിടിയിലായി. അനേകം ഫാന്‍സ് ഗ്രൂപ്പുകളുള്ള അലോട്ടി സമൂഹ മാധ്യമങ്ങളില്‍ സജീവം. അലോട്ടിയുടെ പേര് പച്ച കുത്തിയ യുവാക്കള്‍ ഇതിന്റെ ചിത്രങ്ങള്‍ ഈ വാട്‌സാപ് ഗ്രൂപ്പുകളില്‍ ഇട്ടിട്ടുണ്ട്. ഇതൊക്കെ അറിഞ്ഞ പോലീസ് ഞെട്ടി.

ഇയാളോടുള്ള ആരാധന മൂത്ത് ഗുണ്ടാപ്രവര്‍ത്തനത്തിന് ഇറങ്ങിയവരും ഇക്കൂട്ടത്തിലുണ്ട്. അലോട്ടി നേരിട്ടാണ് 'ആരാധകരെ' കവര്‍ച്ചയ്ക്കും, ക്വട്ടേഷനും അയക്കുന്നത. 'അലോട്ടി സ്‌കെച്ച്' എന്നാണ് ഇത്തരം ഓപ്പറേഷനു ഇവര്‍ നല്‍കിയിരിക്കുന്ന ഓമനപ്പേര്‍. പിടിക്കപ്പെട്ടാല്‍ ജാമ്യത്തില്‍ ഇറക്കാന്‍ അലോട്ടി നേരിട്ടെത്തും.

കോട്ടയത്തെ കുറിയര്‍ സ്ഥാപനത്തില്‍ നിന്ന് മുളക് സ്‌പ്രേ അടിച്ച് ഒരു ലക്ഷം രൂപ കവര്‍ന്ന കേസിലെ മുഖ്യ ആസൂത്രകനും ഗുണ്ടയുമായ അലോട്ടിയുടെ പക്കല്‍ നിന്ന് 32 തിരകള്‍, വിദേശ നിര്‍മിത കത്തി, കൈക്കോടാലി തുടങ്ങിയ ആയുധങ്ങളും കണ്ടെടുത്തു. നഗരത്തിലെ ലോഡ്ജ് മാനേജരെ കുത്തിക്കൊലപ്പെടുത്തിയതുള്‍പ്പെടെ 19 ക്രിമിനല്‍ കേസ് അലോട്ടിക്കെതിരെയുണ്ട്. ഇയാള്‍ക്കെതിരെ കാപ്പയും (ഗുണ്ടാ ആക്ട്) ചുമത്തുമെന്ന് പൊലീസ് പറഞ്ഞു.

നഗരത്തിലെ കുറിയര്‍ സ്ഥാപനത്തില്‍ ജീവനക്കാരുടെ മുഖത്ത് മുളക് സ്‌പ്രേ അടിച്ച ശേഷം വേളൂര്‍ കൊച്ചുപറമ്പില്‍ ബാദുഷ(20) തിരുവാര്‍പ്പ് കൈച്ചേരില്‍ അഖില്‍ ടി.ഗോപി (20) എന്നിവര്‍ ഒരു ലക്ഷം രൂപയുമായി കടന്നത് ഇക്കഴിഞ്ഞ 16-നാണ്. ഇവരെ ചോദ്യം ചെയ്തപ്പോഴാണ് കവര്‍ച്ചയുടെ മുഖ്യ ആസൂത്രകനെക്കുറിച്ച് വിവരം ലഭിക്കുന്നത്.

ഇയാള്‍ കുടുംബസമേതം താമസിക്കുന്ന കൊച്ചുമറ്റം പള്ളിവാതുക്കലില്‍ നിന്നാണ് അറസ്റ്റ് ചെയ്തത്. മുളക് സ്‌പ്രേയും മറ്റ് വിദേശ നിര്‍മിത ആയുധങ്ങളും ഓണ്‍ ലൈന്‍ വഴിയാണ് വാങ്ങിയിരുന്നത്. ഓണ്‍ലൈന്‍ വഴി നഗരത്തിലെ കുറിയര്‍ സ്ഥാപനത്തില്‍ എത്തുന്ന സാധനങ്ങള്‍ വാങ്ങുന്നതിന് ഇയാള്‍ ഈ സ്ഥാപനത്തില്‍ എത്തിയിരുന്നു.