ചങ്ങനാശേരിയ്ക്കടുത്ത് പായിപ്പാട്ട് ഗൃഹനാഥനെ മരിച്ച നിലയില്‍ കണ്ടെത്തിയ സംഭവം കൊലപാതകമെന്നു തെളിഞ്ഞു. മദ്യപിക്കാന്‍ 100 രൂപ ആവശ്യപ്പെട്ടു മകന്‍ നടത്തിയ ആക്രമണത്തിലാണ് പിതാവ് മരിച്ചതെന്ന് തെളിഞ്ഞതിനാല്‍ മകന്‍ ജോസഫ് തോമസിനെ (അനി -35) ചങ്ങനാശേരി ഡിവൈഎസ്പി എസ്.സുരേഷ് കുമാര്‍, തൃക്കൊടിത്താനം സിഐ സാജു വര്‍ഗീസ് എന്നിവരുടെ നേതൃത്വത്തിലുള്ള സംഘം അറസ്റ്റ് ചെയ്തു. വാഴപ്പറമ്പില്‍ തോമസ് വര്‍ക്കിയാണ് (കുഞ്ഞപ്പന്‍-76) മരിച്ചത്.

സ്വാഭാവിക മരണമെന്ന നിഗമനത്തില്‍ 19-ന് രാവിലെ 11-മണിയ്ക്ക് സംസ്‌കരിക്കാന്‍ തീരുമാനിച്ച മൃതദേഹം, നാട്ടുകാരില്‍ ചിലരുടെ സംശയത്തിന്റെ അടിസ്ഥാനത്തില്‍ പൊലീസെത്തി പോസ്റ്റ്‌മോര്‍ട്ടത്തിന് അയയ്ക്കുകയായിരുന്നു. വൈകിട്ട് 6.30-നാണ് സംസ്‌കാരം നടത്തിയത്. പോസ്റ്റ്‌മോര്‍ട്ടം റിപ്പോര്‍ട്ടിന്റെ അടിസ്ഥാനത്തില്‍ നടത്തിയ ചോദ്യം ചെയ്യലിലാണ് പ്രതി കുറ്റം സമ്മതിച്ചത്. കോടതി അനിയെ റിമാന്‍ഡ് ചെയ്തു.

കുഞ്ഞപ്പനും മക്കളായ അനിയും സിബിയുമാണു വീട്ടില്‍ താമസിച്ചിരുന്നത്. കുഞ്ഞപ്പന്റെ ഭാര്യ ചിന്നമ്മ മകള്‍ക്കൊപ്പം റാന്നിയിലെ വീട്ടിലാണ് കഴിഞ്ഞിരുന്നത്. ഇരട്ടസഹോദരങ്ങളായ അനിയും സിബിയും മദ്യലഹരിയില്‍ പിതാവ് കുഞ്ഞപ്പനുമായി വഴക്കുണ്ടാക്കുന്നതു പതിവാണ്.

17-ാം തീയതി രാവിലെ കുഞ്ഞപ്പന്‍ ബാങ്ക് അക്കൗണ്ടിലെ പെന്‍ഷന്‍ തുക 1000 രൂപ പിന്‍വലിച്ചിരുന്നു. അനിയുടെ ഒപ്പമാണ് പെന്‍ഷന്‍ തുക വാങ്ങാന്‍ പോയത്. തിരികെ എത്തിയപ്പോള്‍ 200 രൂപ വീതം അനിക്കും സിബിക്കും കുഞ്ഞപ്പന്‍ നല്‍കി. വൈകിട്ട് മദ്യപിച്ച ശേഷം വീട്ടില്‍ എത്തിയ അനി വീണ്ടും 100 രൂപ കുഞ്ഞപ്പനോട് ആവശ്യപ്പെട്ടു. ഇതിനു വിസമ്മതിച്ച കുഞ്ഞപ്പനെ അനി ഉപദ്രവിക്കാന്‍ തുടങ്ങി.

വീട്ടില്‍ ഉണ്ടായിരുന്ന സിബി മര്‍ദനം തടയാന്‍ എത്തിയപ്പോള്‍ അനി സിബിയുടെ ഇടതു തുടയില്‍ കടിച്ചതോടെ സിബി പിന്‍മാറി അടുത്ത മുറിയില്‍ പോയി കിടന്നുറങ്ങി. ബഹളം തുടര്‍ന്ന അനി കുഞ്ഞപ്പനെ പിടിച്ചു തള്ളി. ഭിത്തിയിലും തുടര്‍ന്ന് കട്ടിലിന്റെ പിടിയിലും തല ഇടിച്ചു വീണ കുഞ്ഞപ്പനെ അനി തറയില്‍ ഇട്ടു ചവിട്ടുകയും കഴുത്ത് ഞെരിക്കുകയും ചെയ്തു. കുറച്ചു സമയത്തിനു ശേഷം കുഞ്ഞപ്പനെ കട്ടിലില്‍ കിടത്തിയ ശേഷം അനി കിടന്നുറങ്ങി. 18-ന് രാവിലെ അനിയും സിബിയും വീട്ടില്‍ നിന്നു പോയി. ഉച്ചയോടെ വീട്ടിലെത്തിയ ബന്ധുക്കളാണ് മുറിക്കുള്ളില്‍ കുഞ്ഞപ്പന്‍ അനക്കമില്ലാതെ കിടക്കുന്നതു കണ്ടത്. ഈ സമയം വീട്ടില്‍ മറ്റാരും ഉണ്ടായിരുന്നില്ല. നാട്ടുകാരുടെ സഹായത്തോടെ കുഞ്ഞപ്പനെ നാലുകോടി സെന്റ് റീത്താസ് ആശുപത്രിയില്‍ എത്തിച്ചെങ്കിലും മരണം സംഭവിച്ചു.

മൃതദേഹം മോര്‍ച്ചറിയില്‍ നിന്ന് എടുക്കാന്‍ 19-ന് രാവിലെ എത്തിയ ചിലര്‍ തലയുടെ പിന്‍വശത്തു രക്തം കട്ടപിടിച്ചു കിടക്കുന്നതു കണ്ട് സംശയം തോന്നി വിവരം പൊലീസില്‍ അറിയിക്കുകയായിരുന്നു. സ്വമേധയാ കേസെടുത്ത പൊലീസ് വീട്ടിലെത്തി സംസ്‌കാരച്ചടങ്ങുകള്‍ നിര്‍ത്തിവയ്ക്കണമെന്നും മൃതദേഹം പോസ്റ്റ്‌മോര്‍ട്ടം ചെയ്യണമെന്നും ആവശ്യപ്പെടുകയായിരുന്നു.

പോസ്റ്റ്‌മോര്‍ട്ടം റിപ്പോര്‍ട്ടില്‍ കുഞ്ഞപ്പന്റെ ശരീരത്തില്‍ 30 മുറിവുകളുള്ളതായാണ് കണ്ടെത്തിയത്. ഇതില്‍ 8 എണ്ണം ഗുരുതരമാണ്. കഴുത്തിലെ അസ്ഥികള്‍ ഒടിഞ്ഞു. ഇടതുവശത്തെ 2 വാരിയെല്ലുകള്‍ ഒടിഞ്ഞിട്ടുണ്ട്. ഇത് ചവിട്ടിയതിനിടയില്‍ സംഭവിച്ചതാകാമെന്നു പൊലീസ് പറഞ്ഞു. വയറില്‍ ഉള്‍പ്പെടെ 3 ഭാഗത്ത് ചതവുകളും കണ്ടെത്തി. രാത്രി 11-ന് മുന്‍പായി മരണം സംഭവിച്ചതായി റിപ്പോര്‍ട്ടില്‍ പറയുന്നു.

സംഭവശേഷം തറയില്‍ ഉണ്ടായിരുന്ന രക്തക്കറ അനി മായ്ക്കാന്‍ ശ്രമിച്ചിരുന്നു. ഫൊറന്‍സിക് വിദഗ്ധര്‍ നടത്തിയ പരിശോധനയില്‍ ഇതു കണ്ടെത്തി. ഭിത്തിയില്‍ നിന്ന് രക്തക്കറയും മുടിയുടെ അംശവും പരിശോധനയില്‍ കണ്ടെത്തി. പിടിച്ചുമാറ്റാന്‍ ശ്രമിച്ചപ്പോള്‍ അനി കടിച്ചതായി സിബി പൊലീസിനോടു സമ്മതിച്ചിട്ടുണ്ട്. തൃക്കൊടിത്താനം എസ്‌ഐ സാബു സണ്ണി, എഎസ്‌ഐമാരായ ശ്രീകുമാര്‍, സാബു, ക്ലീറ്റസ്, ഷാജിമോന്‍, സിപിഒ ബിജു എന്നിവരാണ് അന്വേഷണം നടത്തിയത്.