10,000 പേര്‍ക്ക് ജോലി ലഭിക്കുമെന്ന് പ്രതീക്ഷിക്കുന്ന സംയോജിത ഉല്‍പാദന ക്ലസ്റ്റര്‍ (ഇന്റഗ്രേറ്റഡ് മാനുഫാക്ചറിങ് ക്ലസ്റ്റര്‍-ഐഎംസി) പാലക്കാട്ട് 1800 ഏക്കറില്‍ സ്ഥാപിക്കാന്‍ കേന്ദ്ര സര്‍ക്കാര്‍ അനുമതി. 10,000 കോടി രൂപയിലധികം നിക്ഷേപം പ്രതീക്ഷിക്കുന്ന, കോയമ്പത്തൂര്‍-കൊച്ചി വ്യവസായ ഇടനാഴിയുടെ ഭാഗമായാണ് ഐഎംസി സ്ഥാപിക്കുന്നത്. ഇത് കേരളത്തിന്റെ വ്യവസായക്കുതിപ്പിനു വഴിയൊരുക്കും.

ദേശീയ വ്യവസായ ഇടനാഴിയില്‍നിന്നു കേരളത്തെ ഒഴിവാക്കിയതിനെത്തുടര്‍ന്നു സംസ്ഥാനം പ്രത്യേക പദ്ധതി തയാറാക്കി കേന്ദ്രത്തെ സമീപിക്കുകയായിരുന്നു. ഇടനാഴിയുടെ ഭാഗമായി വികസിപ്പിക്കുന്ന 2 ഐഎംസികളിലൊന്നാണു പാലക്കാട്ടേത്; രണ്ടാമത്തേതു സേലത്താണ്. ഐഎംസി സ്ഥാപിക്കാന്‍ 2000 5000 ഏക്കര്‍ വേണമെന്നാണു വ്യവസ്ഥയെങ്കിലും കേരളത്തിലെ സാഹചര്യം കണക്കിലെടുത്ത് 1800 ഏക്കറായി കുറച്ചു. പാലക്കാട്ട് കണ്ണമ്പ്ര, ഉഴലപ്പതി, പുതുശ്ശേരി എന്നിവിടങ്ങളില്‍ ഭൂമി കണ്ടെത്തിയിട്ടുണ്ട്.

ചെന്നൈ-ബെംഗളൂരു വ്യവസായ ഇടനാഴി കോയമ്പത്തൂരിലേക്കും അവിടെ നിന്നു കൊച്ചിയിലേക്കും നീട്ടാനാണു നാഷനല്‍ ഇന്‍ഡസ്ട്രിയല്‍ കോറിഡോര്‍ ഡവലപ്‌മെന്റ് ആന്‍ഡ് ഇംപ്ലിമെന്റേഷന്‍ ട്രസ്റ്റ് (നിക്ഡിറ്റ്) അനുമതി നല്‍കിയത്.

പാലക്കാട് കേന്ദ്രീകരിച്ച് ദേശീയപാതയുടെ രണ്ടു വശങ്ങളിലായി 100 കിലോമീറ്റര്‍ നീളത്തിലായിരിക്കും സംയോജിത ഉല്‍പാദന ക്ലസ്റ്റര്‍ (ഐഎംസി) വരുന്നത്. പ്രത്യേക സാമ്പത്തിക മേഖലകളുടെ മാതൃകയില്‍ അതിലേറെ ആനുകൂല്യങ്ങള്‍ സംരംഭകര്‍ക്കു ലഭിക്കും വിധമാണ് ഐഎംഎസികള്‍ വിഭാവനം ചെയ്യുന്നത്.

ഇലക്ട്രോണിക്‌സ്, ഐടി, ഭക്ഷ്യസംസ്‌കരണം, പരമ്പരാഗത വ്യവസായങ്ങളെല്ലാമുള്ള ക്ലസ്റ്ററാകും വികസിപ്പിക്കുക. ലോജിസ്റ്റിക്‌സ് പാര്‍ക്ക്, വെയര്‍ഹൗസ്, കോള്‍ഡ് സ്റ്റോറേജ് തുടങ്ങിയവ പ്രതീക്ഷിക്കാം. കൊച്ചി തുറമുഖ സാമീപ്യം മൂലം ഐഎംസിക്കു പുറത്തും സംരംഭങ്ങള്‍ക്കു സാധ്യതയെന്ന് വ്യവസായ പ്രിന്‍സിപ്പല്‍ സെക്രട്ടറി ഡോ.കെ.ഇളങ്കോവന്‍.

കേന്ദ്ര, സംസ്ഥാന സര്‍ക്കാരുകള്‍ ചേര്‍ന്നു രൂപീകരിക്കുന്ന പ്രത്യേക ദൗത്യ കമ്പനിക്കായിരിക്കും (എസ്പിവി) നടത്തിപ്പു ചുമതല. ഭൂമിവിലയാണു കമ്പനിയില്‍ സംസ്ഥാനത്തിന്റെ ഓഹരി. സ്ഥലം വ്യവസായസൗഹൃദ രീതിയില്‍ കേന്ദ്ര സര്‍ക്കാര്‍ വികസിപ്പിക്കും. 870 കോടി രൂപയാണു കേന്ദ്ര വിഹിതം.