വല്ലാത്തൊരു മാനസികാവസ്ഥയിലാണ് പാലാക്കാര്‍. ഓര്‍മ്മവച്ച കാലം മുതല്‍ക്കേ പാലയെങ്കില്‍ മാണിസാര്‍, മാണിസാറെങ്കില്‍ പാല എന്നതായിരുന്നു ചിത്രം. ഇപ്പോള്‍ മാണി സാറില്ലാത്ത പാലയ്ക്ക് വേണ്ടി വോട്ട് ചെയ്യുകയാണ്. അതിനാല്‍ തന്നെ പതിനായിരങ്ങള്‍ മാണിസാറിനെ സ്മരിച്ച് കൊണ്ടാണ് പോളിംഗ് ബൂത്തിലേക്ക് പോകുന്നത്. രാവിലെ തന്നെ പോളിംഗ് ബൂത്തുകളില്‍ വോട്ടര്‍മാരുടെ നീണ്ട നിരയാണ് കാണാന്‍ കഴിയുന്നത്.

അതേസമയം മാണി സാറിന്റെ പിന്‍ഗാമിയായി മത്സരിക്കുന്ന ജോസ് ടോമാണ് ഏവരുടേയും ശ്രദ്ധാ കേന്ദ്രം. ജന്മനാടായ മീനച്ചില്‍ പഞ്ചായത്തില്‍ ജോസ് ടോമിന് ആവേശകരമായ വരവേല്‍പ്പാണ് നല്‍കിയത്. മാണി സാറിന്റെ കല്ലറയില്‍ പ്രണാമം അര്‍പ്പിച്ച ശേഷമാണ് ജോസ് ടോം ബൂത്തിലേക്ക് വോട്ട് രേഖപ്പെടുത്താന്‍ എത്തിയത്. വല്ലാത്തൊരു വൈകാരിക നിമിഷമായിരുന്നു അത്. എല്ലായിപ്പോഴും മാണി സാറിന്റെ വിജയത്തിന് വേണ്ടി ഓടി നടന്ന ടോം ഇപ്പോള്‍ മാണി സാറിന്റെ വിയോഗത്താല്‍ വന്ന സ്ഥാനാര്‍ത്ഥിയാണ്. അതിനാല്‍ തന്നെ പ്രാര്‍ത്ഥിക്കുമ്പോള്‍ ജോസ് ടോമിന്റെ കണ്ഠമിടറിയിരുന്നു.

മാണി സാറിന്റെ ഭാര്യ കുട്ടിയമ്മ ജോസ് ടോമിന് എല്ലാ വിജയാശംസകളും നേര്‍ന്നു. ഉപതിരഞ്ഞെടുപ്പില്‍ യു.ഡി.എഫ്. സ്ഥാനാര്‍ഥി വിജയിക്കുമെന്ന് പൂര്‍ണവിശ്വാസമുണ്ടെന്ന് കുട്ടിയമ്മ വ്യക്തമാക്കി. ജോസ് ടോം വന്‍ ഭൂരിപക്ഷത്തില്‍ ജയിക്കും. മാണി സാറിന്റെ പിന്‍ഗാമിയാണ് ജോസ് ടോം എന്നും അവര്‍ പറഞ്ഞു. പാലാ സെന്റ് തോമസ് സ്‌കൂളിലെ പോളിങ് ബൂത്തില്‍ വോട്ട് രേഖപ്പെടുത്തിയ ശേഷമാണ് കുട്ടിയമ്മ ഇക്കാര്യം വ്യക്തമാക്കിയത്.

പാലായില്‍ ആദ്യമണിക്കൂറില്‍ ഏഴ് ശതമാനം പോളിങ് രേഖപ്പെടുത്തി. രാവിലെ ഏഴുമണി മുതല്‍ വൈകീട്ട് ആറുമണി വരെയാണ് വോട്ടെടുപ്പ്. എല്‍.ഡി.എഫ്. സ്ഥാനാര്‍ഥി മാണി സി. കാപ്പന്‍ കാനാട്ടുപാറ ഗവ.പോളിടെക്‌നിക്ക് കോളേജിലെ 119ാം ബൂത്തില്‍ ആദ്യ വോട്ടറായി വോട്ട് രേഖപ്പെടുത്തി. ഭാര്യ ആലീസ്,മക്കളായ ടീന, ദീപ എന്നിവരും അദ്ദേഹത്തോടൊപ്പം വോട്ട് ചെയ്യാനെത്തിയിരുന്നു.

യു.ഡി.എഫ്. സ്ഥാനാര്‍ഥി ജോസ് ടോം പുലിക്കുന്നേല്‍ മീനച്ചില്‍ പഞ്ചായത്തിലെ കൂവത്തോട് ഗവ.എല്‍.പി. സ്‌കൂളില്‍ വോട്ട് രേഖപ്പെടുത്തി.പാലായില്‍ നൂറുശതമാനം വിജയം ഉറപ്പാണെന്ന്അദ്ദേഹംപറഞ്ഞു. ഉപതിരഞ്ഞെടുപ്പില്‍ തികഞ്ഞ വിജയപ്രതീക്ഷയുണ്ടെന്ന് എന്‍.ഡി.എ. സ്ഥാനാര്‍ഥി എന്‍. ഹരിയും പ്രതികരിച്ചു.

124 ചാവറ സ്‌കൂള്‍ ബൂത്തില്‍ സഹായം ആവശ്യമുള്ളവര്‍ക്ക് പോളിംഗ് ഓഫീസര്‍ സഹായം നിഷേധിച്ചതായി പരാതി വന്നു. ഓശാന അന്തേവാസികളായ 4 പേര്‍ വോട്ട് ചെയ്യാതെ മടങ്ങിയതായി വിവരം. രാമപുരം പഞ്ചായത്തിലെ ഏഴാച്ചേരി 21 നമ്ബര്‍ ബൂത്തിലും വോട്ടിംഗ് മെഷീനില്‍ വെളിച്ചമില്ലെന്ന് പരാതി. പ്രായമായവര്‍ സ്ഥാനാര്‍ത്ഥിയുടെ പേരും ചിഹ്നവും കാണാതെ തപ്പിത്തടയുകയാണെന്ന പരാതിയും ഉയരുന്നു.

രണ്ടിടത്ത് മോക് പോളിങ്ങിനിടെ സാങ്കേതികത്തകരാര്‍ കണ്ടെത്തിയതിനെത്തുടര്‍ന്ന് വി.വി.പാറ്റ് യന്ത്രങ്ങള്‍ മാറ്റി പുതിയ യന്ത്രങ്ങള്‍ സ്ഥാപിച്ചു. വലവൂര്‍ ഗവ.യു.പി. സ്‌കൂളിലെ 95ാം നമ്ബര്‍ ബൂത്തിലും പനമറ്റം ഗവ.എച്ച്.എസ്.എസിലെ 171-ാം നമ്ബര്‍ ബൂത്തിലുമാണ് പുതിയ യന്ത്രങ്ങള്‍ സ്ഥാപിച്ചത്. പാലാ മണ്ഡലത്തില്‍ ആകെ 179107 വോട്ടര്‍മാരാണുള്ളത്. 76 ബൂത്തുകളാണ് വോട്ടെടുപ്പിന് സജ്ജീകരിച്ചിരിക്കുന്നത്. പാലാ സെന്റ് തോമസ് ടി.ടി.ഐ.യിലെ 131ാം നമ്ബര്‍ ബൂത്തിലാണ് ഏറ്റവും കൂടുതല്‍ വോട്ടര്‍മാരുള്ളത്. 1380 പേര്‍. 203 പേരുള്ള തലനാട് പഞ്ചായത്തിലെ 61ാം നമ്ബര്‍ ബൂത്തിലാണ് ഏറ്റവും കുറവ് വോട്ടര്‍മാരുള്ളത്.