ഓട്ടോ ഡ്രൈവര്‍ എലത്തൂര്‍ എസ്.കെ.ബസാര്‍ നാലൊന്നുകണ്ടി രാജേഷ് (43) മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ കഴിഞ്ഞ ദിവസം മരിച്ചു. ദേഹത്തു പെട്രോള്‍ ഒഴിച്ചു തീ കൊളുത്തി ആത്മഹത്യയ്ക്കു ശ്രമിച്ചതിനെ തുടര്‍ന്നാണ് ആശുപത്രിയില്‍ പ്രവേശിപ്പിച്ചത്. മര്‍ദനത്തില്‍ ആന്തരികായവങ്ങള്‍ക്ക് ക്ഷതമേറ്റതാണ് മരണകാരണമെന്നാണ് ആരോപണം.

ഇക്കഴിഞ്ഞ 15-നാണ് എലത്തൂര്‍ കോട്ടേടത്തു ബസാറില്‍ ഒരു സംഘം സിപിഎം, സിഐടിയു പ്രവര്‍ത്തകര്‍ രാജേഷിനെ മര്‍ദിച്ചത്. ഇതിനു പിന്നാലെ രാജേഷ് ഓട്ടോയില്‍ സൂക്ഷിച്ചിരുന്ന പെട്രോള്‍ ഒഴിച്ചു തീ കൊളുത്തുകയായിരുന്നു. സംഭവത്തില്‍ സിപിഎം മുന്‍ പഞ്ചായത്തംഗവും സിഐടിയു യൂണിറ്റ് സെക്രട്ടറിയുമടക്കം 4 പേര്‍ ഇതുവരെ അറസ്റ്റിലായി. 2 പേരെ തിരിച്ചറിയുകയും ചെയ്തിട്ടുണ്ട്.

സിപിഎം, സിഐടിയു പ്രവര്‍ത്തകരുടെ തൊഴില്‍വിലക്കിലും മര്‍ദനത്തിലും മനംനൊന്ത് ജീവനൊടുക്കിയ ഭര്‍ത്താവിന്റെ ഓര്‍മകളില്‍ രജിഷ വിതുമ്പി. രജിഷ 8 വര്‍ഷം മുന്‍പാണ് രാജേഷിന്റെ ജീവിതത്തിലേക്കു വന്നത്. എസ്‌കെ ബസാറിനു സമീപത്തുള്ള ഓടു മേഞ്ഞ കൊച്ചുവീട്ടില്‍ ഇനി രജിഷ തനിച്ചാണ്. 'ആരെയും ബുദ്ധിമുട്ടിക്കാതെ ജോലി ചെയ്തു ജീവിക്കണമെന്നു മാത്രമല്ലേ രാജേഷട്ടന്‍ ആഗ്രഹിച്ചുള്ളു'വെന്നു അകത്തെ ഇരുട്ടുവീണ മുറിയില്‍ തന്നെ കാണാനെത്തുന്നവരോടൊക്കെ രജിഷ ചോദിച്ചുകൊണ്ടേയിരുന്നു.

ജീവിക്കാന്‍ അവര്‍ സമ്മതിക്കില്ലെന്ന് ഉറപ്പുള്ളതുകൊണ്ടാണു മരിക്കാന്‍ തീരുമാനിച്ചതെന്ന് ആശുപത്രിക്കിടക്കയില്‍ രാജേഷേട്ടന്‍ എന്നോടു പറഞ്ഞു. ഭാര്യയെയും കൊന്നുകളയുമെന്ന് ഭീഷണിപ്പെടുത്തിയിരുന്നു. കല്ലുമ്മക്കായ ശേഖരിച്ചു വില്‍ക്കുന്ന പണിയായിരുന്നു ആദ്യം. ഇതില്‍ നിന്നു കാര്യമായ വരുമാനമില്ലാതായതോടെ 3 മാസം മുന്‍പ് ബാങ്കില്‍ നിന്നു 1.5 ലക്ഷം രൂപ വായ്പയെടുത്ത് ഓട്ടോ വാങ്ങി. എന്നാല്‍ സിഐടിയുവില്‍ അംഗത്വം എടുക്കാതെ സ്റ്റാന്‍ഡില്‍ പ്രവേശിപ്പിക്കില്ലെന്ന് നേതാക്കള്‍ പറഞ്ഞു. മൂന്നു സ്ഥലത്തു മാറി മാറി ഓട്ടോയിട്ടെങ്കിലും അവിടെ നിന്നെല്ലാം പുറത്താക്കി. എങ്കിലും ചില പരിചയക്കാരൊക്കെ ഓട്ടം വിളിക്കുമായിരുന്നു. അങ്ങനെ പോകുമ്പോള്‍ സിഐടിയു അംഗങ്ങളായ ഓട്ടോ ഡ്രൈവര്‍മാര്‍ ഓട്ടോറിക്ഷകള്‍ കുറുകെയിട്ടു വണ്ടി തടയും. ഇതിനു പുറമെയായിരുന്നു കൊല്ലുമെന്ന ഭീഷണി.' രജിഷ പറഞ്ഞു.

ഓട്ടോറിക്ഷ വാങ്ങിയിട്ട് മൂന്നു മാസമായി എങ്കിലും ഒരു ദിവസം പോലും ജോലി ചെയ്യാന്‍ അവര്‍ സമ്മതിച്ചില്ല. ഓട്ടോ സ്റ്റാന്‍ഡില്‍ വാഹനമിടാന്‍ അനുവദിച്ചില്ലെന്നു മാത്രമല്ല, ആ ഓട്ടോയില്‍ കയറരുതെന്നു വീടിനടുത്തുള്ളവരെ വിലക്കുകയും ചെയ്തു.' രജിഷ പറഞ്ഞുകൊണ്ടേ ഇരിക്കുന്നു!