മരടിലെ താമസക്കാര്‍ ഫ്‌ലാറ്റില്‍ നിന്നും ഒഴിഞ്ഞുപോകാനുള്ള സര്‍ക്കാര്‍ അനുവദിച്ച സമയപരിധി ഇന്ന് അവസാനിക്കും........ പകരം താമസസൗകര്യം ലഭിക്കാത്തതിനാല്‍ ഒഴിഞ്ഞു പോകില്ലെന്ന നിലപാട് ആവര്‍ത്തിക്കുകയാണ് ഫ്‌ളാറ്റുടമകള്‍...
മരടിലെ ഫ്‌ളാറ്റുകളില്‍നിന്നു താമസക്കാര്‍ ഒഴിഞ്ഞുപോകാന്‍ സര്‍ക്കാര്‍ അനുവദിച്ച സമയപരിധി ഇന്ന് അവസാനിക്കും. എന്നാല്‍ പകരം താമസസൗകര്യം ലഭ്യമാവാത്തതിനാല്‍ ഒഴിഞ്ഞു പോകില്ലെന്ന നിലപാട് ആവര്‍ത്തിച്ച് ഫ്‌ളാറ്റുടമകള്‍. സര്‍ക്കാര്‍ വാഗ്ദാനം നല്‍കിയതു പ്രകാരം താമസ സൗകര്യം ലഭിച്ചില്ലെന്ന കാരണം ചൂണ്ടിക്കാട്ടിയാണ് ഫ്‌ളാറ്റുടമകള്‍ പ്രതിഷേധിക്കുന്നത്. പൊളിക്കാന്‍ സുപ്രീംകോടതി ഉത്തരവിട്ട നാലു ഫ്‌ളാറ്റ് സമുച്ചയങ്ങളിലെ അഞ്ചു കെട്ടിടങ്ങളില്‍ താമസിക്കുന്ന മുന്നൂറ്റമ്പതോളം കുടുംബങ്ങളില്‍ വാടകക്കാര്‍ ഉള്‍പ്പെടെ നൂറോളം കുടുംബങ്ങള്‍ മാത്രമാണ് ഇതുവരെ ഒഴിഞ്ഞുപോയിരിക്കുന്നത്. ഇന്നലെ വരെ ഒഴിഞ്ഞവരുടെ പട്ടിക തയ്യാറാക്കി നഗരസഭ ജില്ലാ ഭരണകൂടത്തിനു കൈമാറി.
ജില്ലാ ഭരണകൂടവുമായും മറ്റും നടത്തിയ ചര്‍ച്ചയില്‍, പകരം താമസസൗകര്യം ഒരുക്കാന്‍ സഹായിക്കുമെന്നു വാക്കു നല്‍കിയിരുന്നു. എന്നാല്‍, ബദല്‍ താമസ സൗകര്യം കണ്ടെത്താന്‍ നല്‍കിയ ഫ്‌ളാറ്റുകളുടെ പട്ടികയിലെ ഫോണ്‍ നമ്പരുകളില്‍ ബന്ധപ്പെടുന്നവര്‍ക്ക്, ഇവിടെ ഒഴിവില്ലെന്ന മറുപടിയാണു ലഭിക്കുന്നതെന്നും ഇത്തരം സാഹചര്യത്തില്‍ രണ്ടാഴ്ചത്തെ സമയമെങ്കിലും തങ്ങള്‍ക്ക് അനുവദിക്കണമെന്ന ആവശ്യം ഫ്‌ലാറ്റുടമകള്‍ ആവര്‍ത്തിക്കുന്നു.
എന്നാല്‍ കൂടുതല്‍ സമയം വേണമെന്ന ഉടമകളുടെ ആവശ്യം മരട് നഗരസഭാ അധികൃതര്‍ തള്ളി. സമയപരിധിക്കകം ഒഴിഞ്ഞില്ലെങ്കില്‍ വീണ്ടും വൈദ്യുതിബന്ധം വിച്ഛേദിക്കുന്നത് ഉള്‍പ്പെടെയുള്ള നടപടികള്‍ ആരംഭിക്കുമെന്നും, സമയപരിധി നീട്ടി നല്‍കില്ലെന്നും മരട് നഗരസഭാ സെക്രട്ടറി വ്യക്തമാക്കി.
https://www.facebook.com/Malayalivartha
