എല്‍.ഡി.എഫും യു.ഡി.എഫും അഴിമിതി മൂടിയവയ്ക്കാന്‍ പരസ്പരം സഹകരിക്കുന്ന നയം ജനങ്ങളില്‍ നിന്നും മറച്ചുപിടിക്കാനാണ് ഉപതെരഞ്ഞെടുപ്പില്‍ വോട്ടുകച്ചവടം എന്ന മുദ്രാവാക്യം ഉയര്‍ത്തി പ്രചരണത്തെ വഴിതിരിച്ചുവിടുന്നതെന്ന് ബിജെപി വക്താവ് എം.എസ് കുമാര്‍. ഇത് രാഷ്ട്രീയ പാപ്പരത്തമാണ്. ബിജെപി ഇത് ജനങ്ങള്‍ക്ക് മുന്നില്‍ തുറന്ന് കാണിക്കും. പാലാരിവട്ടം പാലം നിര്‍മ്മിച്ചതില്‍ അഴിമതിയുണ്ടെന്നും അന്ന് പൊതുമരാമത്ത് മന്ത്രിയായിരുന്ന ഇബ്രാഹിം കുഞ്ഞിന് അതില്‍ പങ്കുണ്ടെന്നും ഇപ്പോള്‍ റിമാന്റില്‍ കഴിയുന്ന പൊതുമരാമത്ത് സെക്രട്ടറി പോലീസിന് മുമ്പാകെ മൊഴി നല്‍കിയിട്ടും ഇബ്രാഹിം കുഞ്ഞിനെ പ്രതിചേര്‍ക്കാനോ അറസറ്റ് ചെയ്യാനോ സര്‍ക്കാര്‍ തയ്യാറായിട്ടില്ല.

സര്‍ക്കാര്‍ നടത്തിക്കൊണ്ടിരിക്കുന്ന കിയാല്‍, കിഫ്ബി പോലുള്ള ഗുരുതരമായ അഴിമതിയെപറ്റി ഈ തെരഞ്ഞെടുപ്പ് സമയത്ത് യുഡിഎഫും മിണ്ടുന്നില്ല. അഴിമതി മറച്ചുവയ്ക്കുന്ന കാര്യത്തില്‍ രണ്ടു മുന്നണികളും കാണിക്കുന്ന പരസ്പര ധാരണ ഈ ഉപതെരഞ്ഞെടുപ്പില്‍ നടക്കുകയാണ്. ഇത് ബിജെപി തുറന്ന് കാണിക്കും. വോട്ട് കച്ചവടമെന്ന് പറയുന്നവര്‍ സ്വയം ആത്മപരിശോധന നടത്തണം. തിരുവനന്തപുരം പാര്‍ലമെന്റ് മണ്ഡലത്തില്‍ സിപിഐ നേതാക്കളായ കെ.വി സുരേന്ദ്രനാഥ്, പി.കെ വാസുദേവന്‍ നായര്‍, പന്ന്യന്‍ രവീന്ദ്രന്‍ തുടങ്ങി പ്രമുഖ നേതാക്കള്‍ ജയിച്ചതാണ്. ആ മണ്ഡലത്തിലാണ് സിപിെഎയുടെ സ്ഥാനാര്‍ത്ഥി സി.ദിവാകരന്‍ കഴിഞ്ഞ തെരഞ്ഞെടുപ്പില്‍ ദയനീയമായി പരാജയപ്പെട്ടത്. സിപിഎമ്മാണോ, സിപിഐയാണോ ആ തെരഞ്ഞെടുപ്പില്‍ വോട്ട് കച്ചവടം നടത്തിയതെന്ന് വ്യക്തമാക്കണമെന്നും അദ്ദേഹം ആവശ്യപ്പെട്ടു.

സഹകരണ സ്ഥാപനം വഴി 8.5 ശതമാനം പലിശയ്ക്ക് കടം സ്വീകരിക്കാന്‍ സാധിക്കുമെന്നിരിക്കെ 9.45 ശതമാനത്തിന് കിഫ്ബിയിലേയ്ക്ക് പണം സമാഹരിക്കുന്നത് കേരളത്തെ കുത്തുവാളയെടുപ്പിക്കും. ഇതിന് പിന്നില്‍ വന്‍കള്ളക്കളിയുണ്ട്. അത് തെരഞ്ഞെടുപ്പില്‍ പ്രതിപക്ഷം ചര്‍ച്ചയാക്കുന്നില്ല. കഴിഞ്ഞ സര്‍ക്കാരിന്റെ കാലത്ത് രാഷ്ട്രീയ നേത്യത്വത്തിന്റെ അഴിമതിക്കെതിരെ ഈ സര്‍ക്കാര്‍ നടപടി സ്വീകരിക്കുന്നുമില്ല. ഇതെല്ലാം വിസ്മ്യതിയിലാക്കാനാണ് വോട്ട് കച്ചവട വിവാദം കുത്തിപ്പൊക്കുന്നത്. ഇത് വോട്ടര്‍മാര്‍ തിരിച്ചറിയും. പാലാ തെരഞ്ഞെടുപ്പില്‍ ഇരു മുന്നണികള്‍ക്കും വോട്ട് കുറഞ്ഞു. ബിജെപി്ക്ക് വോട്ട് കുറഞ്ഞിട്ടില്ല. അനാവശ്യ വിവാദമുണ്ടാക്കി യാഥാര്‍ത്ഥ്യത്തില്‍ നിന്നും ഒളിച്ചോടാനാണ് ഇരു മുന്നണികളും ശ്രമിക്കുന്നത്. ഇത് കേരളത്തിലെ ജനങ്ങള്‍ തിരിച്ചറിച്ചയും. രമേശ് ചെന്നിത്തലയ്ക്ക് തെരഞ്ഞെടുപ്പ് സമയം മാത്രമാണ് ശബരിമലയെക്കുറിച്ച് ഓര്‍മ്മവരുന്നത്. എന്നാല്‍ ബിജെപിയ്ക്ക് എല്ലാകാലത്തുമുള്ള വിഷയാണ് ശബരിമലയെന്നും എം.എസ് കുമാര്‍ പറഞ്ഞു.

സി.പി.എമ്മും ബി.ജെ.പിയും വോട്ട് കച്ചവടമാണെന്ന് യു.ഡി.എഫും കോണ്‍ഗ്രസും ബി.ജെ.പിയും വോട്ട് മറിക്കുന്നെന്ന് സി.പി.എമ്മും ആരോപണം ഉന്നയിക്കുന്ന പശ്ചാത്തലത്തിലാണ് ബി.ജെ.പി നയംവ്യക്തമാക്കിയത്. കോന്നിയില്‍ സി.പി.എം ബി.ജെ.പിയെ സഹായിക്കുമെന്നും പകരം വട്ടിയൂര്‍ക്കാവില്‍ സി.പി.എം സ്ഥാനാര്‍ത്ഥിയ ജയിപ്പിക്കുമെന്നാണ് കോണ്‍ഗ്രസ് ആരോപിക്കുന്നത്. കുമ്മനം രാജശേഖരനെ മത്സരിപ്പിക്കാത്ത് അതുകൊണ്ടാണെന്നും കോണ്‍ഗ്രസ് ആക്ഷേപിക്കുന്നു. ആരോപണങ്ങള്‍ കേവലം ഇലക്ഷന്‍ പ്രചരണം മാത്രമാണോ എന്ന് കാത്തിരുന്ന് കാണാം.