പാലാരിവട്ടം കേസിലെ വിജിലന്സ് അഭിഭാഷകന് ഭീഷണിയെ തുടര്ന്ന് പോലീസ് സുരക്ഷ ഏര്പ്പെടുത്തി
വാഹനം തടഞ്ഞ് ഭീഷണിപ്പെടുത്തിയതിനെ തുടര്ന്ന് പാലാരിവട്ടം കേസിലെ വിജിലന്സ് അഭിഭാഷകന് എ രാജേഷിന് പോലീസ് സുരക്ഷ ഏര്പ്പെടുത്തി. കഴിഞ്ഞ ശനി, ഞായര് ദിവസങ്ങളില് ചിലര് പരസ്യമായി വാഹനം തടഞ്ഞ് ഭീഷണിപ്പെടുത്തിയതായി അഭിഭാഷകന് പറഞ്ഞു.
പാലാരിവട്ടം കേസില് മുന് പൊതുമരാമത്ത് സെക്രട്ടറി ടി.ഒ സൂരജ് ഉള്പ്പെടയുള്ള പ്രതികള് 35 ദിവസമായി ജയിലിലാണ്. ഈ സാഹചര്യത്തില് വിജിലന്സിന്റെ ഹൈക്കോടതിയിലെ സ്പെഷ്യല് ഗവണ്മെന്റ് പ്ലീഡറായ എ രാജേഷിന് കഴിഞ്ഞ ദിവസങ്ങളില് ഇത്തരത്തിലുള്ള അനുഭവമുണ്ടായത്ഗൗരവമായാണ് സര്ക്കാര് കാണുന്നത്.
ശനിയാഴ്ച രാത്രി പത്തിന് മുളവുകാട് ഭാഗത്തുകൂടി യാത്രചെയ്യവെ രാജേഷിന്റെ കാറ് തമിഴ്നാട് രജിസ്ട്രേഷനിലുള്ള വാഹനത്തിലെത്തിയവര് തടയുകയും ആക്രമണത്തിന് മുതിരുകയും ചെയ്തിരുന്നു. ഞായറാഴ്ച പാലാരിവട്ടം റിനൈസണ്സ് ഹോട്ടലിന് സമീപത്തുവച്ചായിരുന്നു രണ്ടാമത്തെ കയ്യേറ്റ ശ്രമം. അന്ന് കേസിന്റെ പേര് പറഞ്ഞാണ് അക്രമികള് ഭീഷണിപ്പെടുത്തിയത്.
അക്രമികള് എത്തിയ വാഹനത്തിന്റെ ഫോട്ടോ അഭിഭാഷകന് പകര്ത്തിയിരുന്നു.ഫോട്ടോ പോലീസിന് കൈമാറും. രണ്ടാമത്തെ സംഭവവും ഉണ്ടായതോടെ രാജേഷ് വിജിലന്സ് ഡയറക്ടറെ വിവരം അറിയിക്കുകയായിരുന്നു.ഇതേത്തുടര്ന്നാണ് പോലീസ് സുരക്ഷ നല്കാനുള്ള തീരുമാനം.
https://www.facebook.com/Malayalivartha
