തൃശൂരിലെ പഴയന്നൂര്‍ രാജ് ബാറില്‍ ജെര്‍മന്‍ ഷെപ്പേര്‍ഡ് നായ്ക്കളുമായി വന്ന് ബാര്‍ അടിച്ചു തകര്‍ത്ത കേസില്‍ രണ്ടു പേര്‍ പിടിയില്‍. പൂങ്കുന്നം വൈശാഖ്, അഞ്ചേരി വൈശാഖ് എന്നിവരാണ് അറസ്റ്റിലായത്. 4 ജര്‍മന്‍ ഷെപ്പേര്‍ഡ് നായ്ക്കളും വടിവാളുകളുമായി എത്തിയ യുവാക്കള്‍ കഴിഞ്ഞ മാസം 20-ന് രാത്രി പത്തേമുക്കാലോടെയാണ് പഴയന്നൂര്‍ രാജ് ബാര്‍ ഹോട്ടല്‍ ബാര്‍ അടിച്ചു തകര്‍ത്ത് ഭീകരാന്തരീക്ഷം സൃഷ്ടിച്ചത്.

ബില്‍ തുകയായ 950 രൂപ നല്‍കാന്‍ പണമില്ലാത്തതിനാല്‍ ബാറിലെ സപ്ലയര്‍ 2 യുവാക്കളുടെ മൊബൈല്‍ ഫോണുകള്‍ പിടിച്ചുവച്ചതാണ് ആക്രമണത്തിനു പ്രകോപനമായത്. സ്ഥലംവിട്ട യുവാക്കള്‍ രാത്രി നായ്ക്കളുമായി തിരിച്ചെത്തി വന്‍അക്രമം അഴിച്ചുവിടുകയായിരുന്നു.

കഴിഞ്ഞ മാസം 20-ന് വൈകിട്ട് നാലരയോടെയാണ് പഴയന്നൂര്‍ സ്വദേശികളായ യുവാക്കള്‍ ബാറിലെത്തിയത്. രാത്രി 9 മണി വരെ മദ്യപാനം തുടര്‍ന്നു. 950 രൂപയായിരുന്നു ബില്‍ തുക. പണമാവശ്യപ്പെട്ടപ്പോള്‍ കയ്യിലില്ലെന്നായിരുന്നു ഇവരുടെ മറുപടി. ഇതോടെ സപ്ലയര്‍ ഇവരുടെ ഫോണ്‍ വാങ്ങിയ ശേഷം പണം തന്നാലേ തിരികെ നല്‍കൂ എന്നു നിലപാടെടുത്തു.

ഒന്നും മിണ്ടാതെ പുറത്തേക്കുപോയ യുവാക്കള്‍ രാത്രി പത്തേമുക്കാലോടെ തിരിച്ചെത്തുകയായിരുന്നു. 4 ജര്‍മന്‍ ഷെപ്പേര്‍ഡ് നായ്ക്കളുമായിട്ടായിരുന്നു വരവ്. കയ്യില്‍ വടിവാളുകളും ഉണ്ടായിരുന്നു. റസ്റ്ററന്റിന്റെ ചില്ലുകള്‍ അടിച്ചുതകര്‍ത്ത ശേഷം ലോക്കല്‍ ബാറിനുള്ളില്‍ വടിവാള്‍ വീശി ആള്‍ക്കാരെ ഓടിച്ചു. കംപ്യൂട്ടറുകളും മറ്റ് ഉപകരണങ്ങളും അടിച്ചുതകര്‍ത്ത് വധഭീഷണി മുഴക്കി മടങ്ങിപ്പോവുകയായിരുന്നു.