കേരളത്തില്‍ ഒരു ദിവസം ശരാശരി 1 ലക്ഷം ജയില്‍ ചപ്പാത്തി വിറ്റുപോകുന്നതില്‍ പകുതിയും സംഭാവന ചെയ്യുന്നത് തിരുവനന്തപുരം ആണ്. ഉപഭോക്താക്കളെ ജയില്‍ ചപ്പാത്തിയുടെ ആരാധകരാക്കിയത് വിലക്കുറവും ഗുണമേന്മയുമാണ്. 15 ചാക്കിലേറെ ഗോതമ്പുപൊടി തിരുവനന്തപുരം സെന്‍ട്രല്‍ ജയിലില്‍ ചപ്പാത്തി നിര്‍മാണത്തിന് ഉപയോഗിക്കുന്നുണ്ടെന്നാണ് കണക്ക്.

മൂന്നു ലക്ഷത്തോളം രൂപയുടെ ഭക്ഷണ വില്‍പനയാണിവിടെ പ്രതിദിനം നടക്കുന്നത്. തിരുവനന്തപുരം കൂടാതെ കണ്ണൂര്‍, കൊല്ലം, എറണാകുളം, തൃശൂര്‍ ഉള്‍പ്പെടെയുള്ള പ്രധാന ജയിലുകളുടെയും ചപ്പാത്തി ഹിറ്റാണ്. ഭക്ഷണ വില്‍പനയിലൂടെ മാത്രം എറണാകുളം ജില്ലാജയില്‍ മാസം എട്ടു ലക്ഷത്തിലേറെ രൂപ വരുമാനമുണ്ടാക്കുന്നുണ്ട്. തൃശൂരില്‍ ആറു ലക്ഷത്തിലേറെ രൂപയാണ് ലാഭം. കൊല്ലം ജില്ലാ ജയിലിനു പ്രതിദിനം അരലക്ഷം രൂപയുടെ വില്‍പനയുണ്ട്.

ആലപ്പുഴയിലാകട്ടെ ബിരിയാണി വില്‍പനയാണ് കൂടുതല്‍. നിലവില്‍ എട്ടു ജില്ലകളില്‍ ജയില്‍ ഭക്ഷണം ഓണ്‍ലൈന്‍ ഭക്ഷ്യശൃംഖലകളുമായി ബന്ധിപ്പിച്ചിട്ടുണ്ട്. ഇവയില്‍ നിന്നു മികച്ച വരുമാനം ലഭിക്കുന്നതും ജയില്‍ വകുപ്പിനു പ്രോത്സാഹനമായി മാറി. ലാഭമായി ലഭിക്കുന്ന തുക സര്‍ക്കാരിലേക്ക് അടയ്ക്കുകയാണു പതിവ്. ഇതിന്റെ പകുതി ജയില്‍ വികസനത്തിനും തടവുകാരുടെ ക്ഷേമത്തിനും ഉപയോഗിക്കാനുള്ള അനുമതി സര്‍ക്കാര്‍ പരിഗണനയിലാണ്.