കോന്നിയില്‍ ഒന്നാംഘട്ട പ്രചരണം അവസാനിക്കാറാകുമ്പോള്‍ അഭിപ്രായഭിന്നതകള്‍ മറന്ന് മൂന്ന് മുന്നണികളും മുന്നേറുന്നു. സി.പി.എമ്മിലെ യുവരക്തം ജനീഷും അയ്യപ്പഭക്തരുടെ വികാരമായ കെ.സുരേന്ദ്രനും കോണ്‍ഗ്രസിലെ പ്രമുഖനേതാവുമായ മോഹന്‍രാജും തികഞ്ഞ ആത്മവിശ്വാസത്തിലാണ്. ഇന്ന് മൂതല്‍ മൂന്ന് മുന്നണികളും ഭവന സന്ദര്‍ശനം ആരംഭിച്ചു. കഴിഞ്ഞ തവണ കോണ്‍ഗ്രസിലെ അടൂര്‍പ്രകാശ് 20,748 വോട്ടിന്റെ ഭൂരിപക്ഷത്തിനാണ് വിജയിച്ചത്. അത് മറികടന്നാലേ സി.പി.എമ്മിനും ബി.ജെ.പിക്കും വിജയിക്കാനാകൂ. കോണ്‍ഗ്രസിലെ തമ്മിലടി എങ്ങനെ പ്രതിഫലിക്കുമെന്ന് പ്രവചിക്കാനാകില്ല. പ്രമുഖ കോണ്‍ഗ്രസ് നേതാക്കളടക്കം താമസിക്കാതെ മണ്ഡലത്തില്‍ എത്തുന്നുണ്ട്. തെരഞ്ഞെടുപ്പ് കണ്‍വെന്‍ഷനില്‍ എത്തില്ലെന്ന് പറഞ്ഞ അടൂര്‍പ്രകാശ് എത്തിയതോടെ മോഹന്‍രാജും മറ്റ് സ്ഥാനാര്‍ത്ഥികളും ആത്മവിശ്വസത്തിലാണ്.

2016ലെ നിയമസഭാ തെരഞ്ഞെടുപ്പില്‍ നിന്ന് 2019ലെ പാര്‍ലമെന്റ് തെരഞ്ഞെടുപ്പിലേക്ക് വരുമ്പോള്‍ വലിയ കുതിച്ചുചാട്ടമാണ് ബി.ജെ.പി നടത്തിയത്. 16,000 വോട്ടില്‍ നിന്ന് 42,000 വോട്ടാണ് കെ.സുരേന്ദ്രന്‍ പെട്ടിയിലാക്കിയത്. അത് ബി.ജെ.പിക്ക് വലിയ പ്രതീക്ഷയാണ് നല്‍കുന്നത്. ശബരിമല സമരത്തില്‍ ഭക്തര്‍ക്കൊപ്പം നില്‍ക്കുകയും മാസങ്ങളോളം ജയിലില്‍ കിടക്കുകയും ചെയ്ത കെ.സുരേന്ദ്രന്‍ ഹൈന്ദവര്‍ക്കിടയില്‍ വലിയ വികാരമായി മാറിയതിന്റെ തെളിവാണ് വോട്ട് ഇരട്ടിയിലധികം വര്‍ദ്ധിച്ചത്. നായര്‍, ഈഴവ വോട്ടുകള്‍ താമരയിലാണ് വീണത്. എന്നാല്‍ ഇത്തവണ അത് ഉണ്ടാകില്ലെന്ന പ്രതീക്ഷിലാണ് സി.പി.എം. ബി.ഡി.ജെ.എസ് എന്‍.ഡി.എയില്‍ നിന്ന് അകന്ന് നില്‍ക്കുന്നതും എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന് ബി.ജെ.പിയും കോണ്‍ഗ്രസുമായുള്ള അഭിപ്രായ ഭിന്നത രൂക്ഷമായതും തങ്ങള്‍ക്ക് അനുകൂലമായ അന്തരീക്ഷം സൃഷ്ടിച്ചിരിക്കുകയാണെന്ന് സി.പി.എം പ്രവര്‍ത്തകര്‍ പറയുന്നു.

പാര്‍ലമെന്റ് തെരഞ്ഞെടുപ്പ് കാലത്തുണ്ടായ രാഷ്ട്രീയ സ്ഥിതിയല്ല കേരളത്തില്‍ ഇപ്പോഴുള്ളതെന്ന് സി.പി.എം നേതാക്കള്‍ തന്നെ പറയുന്നു. പാലായിലെ വിജയം അതാണ് വ്യക്തമാക്കുന്നതെന്നും അവര്‍ പറയുന്നു. എന്നാല്‍ പാലായിലേത്ത് കേരളാ കോണ്‍ഗ്രസുകാര്‍ തമ്മിലുള്ള പോരിന്റെ ഫലമായി ഉണ്ടായ വീഴ്ചയാണെന്ന് കോണ്‍ഗ്രസ് ചൂണ്ടിക്കാട്ടുന്നു. എന്‍എസ് എസ് ആകട്ടെ സമദൂരനിലപാടാണ് സ്വീകരിച്ചിരിക്കുന്നത്. അത് കോണ്‍ഗ്രസിന് ഗുണം ചെയ്യും. വിജയഘടകമാകുന്ന ക്രസിത്യന്‍ വോട്ടുകളാണ് ഇടത്, വലതു മുന്നണികള്‍ പെട്ടിയില്‍ വീഴ്ത്താന്‍ കിണഞ്ഞ് പരിശ്രമിക്കുന്നത്. സഭാ വിഷയങ്ങളിലും കോടതിവിധിയിലും ബിജെപി സ്വീകരിച്ച നിലപാട് മുന്‍ നിര്‍ത്തി ക്രിസ്ത്യന്‍ വെട്ടുകള്‍ നേടാന്‍ ബിജെപിയും ശ്രമിക്കുന്നുണ്ട്.

ഇടതുപക്ഷ സ്ഥാനാര്‍ഥിയായ കെയു ജനീഷ് കുമാര്‍ മണ്ഡലത്തില്‍ നിന്നുളള ആളാണ്. ഡിവൈ.എഫ് ഐ നേതാവായ ജനീഷ് കുമാറിനെതിരെ സിപിഎമ്മിന്‍ നിന്നു തന്നെ ചില എതിര്‍പ്പുകള്‍ ഉയര്‍ന്നിരുന്നു. ജില്ലയ്ക്ക്് പുറത്തു നിന്നുളള നേതാക്കളാണ് പ്രചരണത്തിന് നേതൃത്വം നല്‍കുന്നത്. കോണ്‍ഗ്രസ് സ്ഥാനാര്‍ഥി പി മോഹന്‍രാജിനെതിരെ ചില കോണുകളില്‍ നിന്ന് വിമത ശബ്ദം ഉയര്‍ന്നെങ്കിലും അതിനെയെല്ലാം മറികടന്നെന്നാണ് നേതാക്കള്‍ പറയുന്നത്. സ്ഥാനാര്‍ത്ഥിയായ ശേഷം പാര്‍ട്ടി തീരുമാനപ്രകാരം മറ്റു പലര്‍ക്കും വേണ്ടി മാറി കൊടുത്തയാളാണ് മോഹന്‍രാജ്. അതിനാല്‍ കോണ്‍ഗ്രസ് പ്രവര്‍ത്തകര്‍ അദ്ദേഹത്തിനൊപ്പമുണ്ട്.

കോന്നി കോട്ട ബി.ജെ.പിക്ക് പിടിച്ചെടുക്കാനുള്ള ആത്മവിശ്വാസം നല്‍കിയ നേതാവാണ് കെ.സുരേന്ദ്രന്‍. സുരേന്ദ്രനെ മത്സരിപ്പിക്കാന്‍ ജില്ലയിലെ ചില നേതാക്കള്‍ക്ക് എതിര്‍പ്പുണ്ടായിരുന്നു. എന്നാല്‍ ആര്‍.എസ്എസ് അതിനെയെല്ലൊം മറികടക്കുന്ന പ്രവര്‍ത്തനവുമായി മണ്ഡലത്തില്‍ സജീവമാണ്. അതിനാല്‍ കോന്നിയില്‍ അങ്ങനെ ആര്‍ക്കം ഈസി വാക്കോവറല്ല, കിണഞ്ഞ് പരിശ്രമിച്ചാലേ കോന്നീക്കാരുടെ കരളില്‍ ഇടംനേടാനാവൂ. അതില്‍ ആര് വിജയിക്കുമെന്ന് നിലവിലെ സാഹചര്യത്തില്‍ പ്രവചിക്കാനാവില്ല.