തമിഴ്‌നാട്ടില്‍ ഗോവധം നിരോധിച്ചുകൊണ്ടുള്ള മദ്രാസ് ഹൈക്കോടതി ഉത്തരവിനെതിരെ സുപ്രീംകോടതിയെ സമീപിച്ച് തമിഴ്‌നാട് സര്‍ക്കാര്‍. മേയ് 28ന് ബക്രീദിന് മുന്നോടിയായുള്ള ഹൈക്കോടതി ഉത്തരവ് 1958ലെ മൃഗസംരക്ഷണ നിയമത്തിന് വിരുദ്ധമാണെന്നാണ് സര്‍ക്കാരിന്റെ വാദം.

10 വയസിന് മുകളില്‍ പ്രായമുള്ളതും പ്രജനനത്തിനും അനുയോജ്യമല്ലാത്തതുമായ പശുക്കളെ അറുക്കാന്‍ നിലവിലെ നിയമപ്രകാരം അനുമതിയുണ്ട്. എന്നാല്‍ ഹൈക്കോടതി ഇതിന്മേല്‍ ഏര്‍പ്പെടുത്തിയ പൂര്‍ണ നിരോധനം നിയമപരമായ പരിധിക്കപ്പുറമുള്ളതാണെന്ന് സര്‍ക്കാര്‍ സുപ്രീംകോടതിയില്‍ സമര്‍പ്പിച്ച ഹര്‍ജിയില്‍ ചൂണ്ടികാട്ടുന്നു.

ഹര്‍ജിക്കാരന്‍ ആവശ്യപ്പെട്ടത് കോയമ്പത്തൂരില്‍ ബക്രീദ് ദിവസം പൊതുസ്ഥലങ്ങളില്‍ മൃഗങ്ങളെ അറുക്കുന്നത് തടയാന്‍ മാത്രമായിരുന്നെന്നും എന്നാല്‍ മദ്രാസ് ഹൈക്കോടതി തമിഴ്‌നാട്ടിലുടനീളം ഗോവധം നിരോധിച്ചുകൊണ്ട് ഉത്തരവിറക്കുകയായിരുന്നെന്നും ഹര്‍ജിയില്‍ ചൂണ്ടിക്കാട്ടുന്നുണ്ട്.

കോയമ്പത്തൂരിലെ പൊതുസ്ഥലങ്ങളില്‍ ബക്രീദ് പ്രമാണിച്ച് പശുക്കളെ അറുക്കുന്നത് തടയണമെന്ന് ആവശ്യപ്പെട്ട് ഹിന്ദു മക്കള്‍ കക്ഷി ജനറല്‍ സെക്രട്ടറി കെ സൂര്യ പ്രശാന്ത് നല്‍കിയ പൊതുതാല്‍പ്പര്യ ഹര്‍ജിയിലാണ് മദ്രാസ് ഹൈക്കോടതിയുടെ അവധിക്കാല ബെഞ്ച് മേയ് 27ന് ഉത്തരവിട്ടത്.

അതേസമയം വിഷയത്തില്‍ കോടതിയെ സമീപിക്കാന്‍ വൈകിയെന്ന് ആരോപിച്ച് ഡിഎംകെ ഉള്‍പ്പെടെയുള്ള പ്രതിപക്ഷ പാര്‍ട്ടികള്‍ വിജയ് സക്കാരിനെതിരെ രംഗത്തെത്തി. എന്നാല്‍ നിയമവിദഗ്ധരുമായി ആലോചിക്കാന്‍ സമയം വേണ്ടിവന്നതിനാലാണ് വിഷയത്തില്‍ ഇടപടാന്‍ വൈകിയതെന്നാണ് ടിവികെ സര്‍ക്കാരിന്റെ വിശദീകരണം.