ബന്ദിപ്പൂര്‍ ദേശീയ പാതയിലൂടെയുള്ള യാത്രാ നിരോധനത്തിനെതിരായി നടത്തിയ നിരാഹാരസമരമടക്കുള്ള പ്രതിഷേധ പരിപാടി അവസാനിപ്പിച്ചു. ഗതാഗത മന്ത്രി എ.കെ. ശശീന്ദ്രന്‍ സമരപന്തലില്‍ നേരിട്ടെത്തി സര്‍ക്കാരിന്റെ പിന്തുണ വാഗ്ദാനം ചെയ്തതോടെയാണ് ബത്തേരിയില്‍ യുവജന കൂട്ടായ്മ സംഘടിപ്പിച്ച സമരം അവസാനിപ്പിക്കാന്‍ തീരുമാനിച്ചത്.മന്ത്രിമാരായ എ.കെ ശശീന്ദ്രനും ടി.പി രാമകൃഷ്ണനും സമരപ്പന്തലിലെത്തി സമരക്കാരെ കാണുകയും ബന്ദിപ്പൂര്‍ യാത്രാ നിരോധനത്തില്‍ സര്‍ക്കാര്‍ വയനാടിനോടൊപ്പമാണെന്നും സുപ്രീം കോടതിയില്‍ കേന്ദ്ര വനം പരിസ്ഥിതി മന്ത്രാലയം നല്‍കുന്ന സത്യവാങ് മൂലം എതിരായാല്‍ കേരളസര്‍ക്കാര്‍ ഇടപെടുമെന്നും മികച്ച അഭിഭാഷകരെ നിയോഗിക്കുമെന്നു എ.കെ ശശീന്ദ്രന്‍ ഉറപ്പുനല്‍കുകയും ചെയ്തു. ഒക്ടോബര്‍ 18 നാണ് രാത്രി യാത്രാ നിരോധനം സംബന്ധിച്ച കേസ് സുപ്രീം കോടതി പരിഗണിക്കുന്നത്.

മന്ത്രിമാരുടെ ഉറപ്പിന്റെ അടിസ്ഥാനത്തില്‍ സമരത്തിന്റെ ഒന്നാംഘട്ടം അവസാനിപ്പിക്കാനാണ് നിലവില്‍ തീരുമാനമായിരിക്കുന്നത്. പന്ത്രണ്ടാം ദിവസമെത്തിയ പ്രക്ഷോഭത്തിന്റെ ഒന്നാം ഘട്ടം അവസാനിപ്പിക്കുന്നെങ്കിലും പകല്‍ കൂടി ഗതാഗതം നിയന്ത്രണം കൊണ്ടു വരാനുള്ള ഉത്തരവ് കോടതി ആവര്‍ത്തിച്ചാല്‍ വീണ്ടും സമരം ചെയ്യുമെന്ന് സമരക്കാര്‍ ആവര്‍ത്തിക്കുന്നു.