തുറിച്ചുനോക്കിയെന്ന് ആരോപിച്ച് സെക്യൂരിറ്റി ജീവനക്കാരനെ തല്ലിയ യുവതിക്കെതിരേ കേസെടുത്തു
കളമശേരി കുസാറ്റ് അനന്യ കോളജ് ഹോസ്റ്റല് വാര്ഡനായി ജോലിനോക്കുന്ന കണ്ണൂര് സ്വദേശിനി ആര്യ(34) ക്കെതിരെ ആലുവ പോലീസ് കേസെടുത്തു. സ്വകാര്യ ആശുപത്രിയിലെ സെക്യൂരിറ്റി ജീവനക്കാരന്റെ കരണത്ത് അടിച്ച സംഭവത്തിലാണ് യുവതിക്കെതിരേ നടപടി എടുത്തത്.
ആശുപത്രി അധികൃതരും സെക്യൂരിറ്റി ജീവനക്കാരന്റെ ഏജന്സിയും നല്കിയ പരാതിയുടെ അടിസ്ഥാനത്തിലാണ് കേസെടുത്തത്.
കഴിഞ്ഞ ഒന്നിനാണ് ആശുപത്രിയിലെത്തിയ രോഗിക്ക് കൂട്ടുവന്ന യുവതി സെക്യൂരിറ്റിയായ ആലപ്പുഴ സ്വദേശി റിങ്കു(26)വിനെ മര്ദിച്ചത്. വലിയ വാഹനങ്ങള്ക്ക് പാര്ക്ക് ചെയ്യാന് അസൗകര്യമുള്ളതിനാല് ഇവരെത്തിയ സ്കൂട്ടര് മാറ്റിവയ്പിച്ചിരുന്നു. പിന്നീടു സ്കൂട്ടര് എടുക്കാനെത്തിയപ്പോഴേക്കും നിരവധി ഇരുചക്രവാഹനങ്ങള് ഇരുവശവും പാര്ക്ക് ചെയ്തിരുന്നതിനാല് യുവതിക്കു സ്കൂട്ടര് എളുപ്പത്തില് എടുക്കാനായില്ല. സെക്യൂരിറ്റിക്കാരനാണ് വാഹനം പുറത്തേക്ക് എടുത്തത്.
അശ്രദ്ധയോടെ സ്കൂട്ടര് പുറത്തേക്കെടുത്തെന്ന് ആരോപിച്ച് യുവാവിന്റെ കവിളില് യുവതി അടിക്കുകയായിരുന്നു. ആശുപത്രിയുടെ സിസി ടിവി കാമറയില് പതിഞ്ഞ ദൃശ്യങ്ങള് സാമൂഹ്യ മാധ്യമങ്ങളില് ഉള്പ്പടെ വൈറലായിരുന്നു. തന്നെ തുറിച്ചുനോക്കിയതിനാണ് മര്ദിച്ചതെന്ന യുവതിയുടെ വിശദീകരണം പോലീസ് സിസി ടിവി ദൃശ്യങ്ങളുടെ അടിസ്ഥാനത്തില് തള്ളിക്കളഞ്ഞിരുന്നു.
ഒത്തുതീര്പ്പു ശ്രമത്തിന് അഭിഭാഷകനോടൊപ്പം പോലീസ് സ്റ്റേഷനിലെത്തിയ യുവതി സെക്യൂരിറ്റി ജീവനക്കാരനോട് വീണ്ടും മോശമായി പെരുമാറിയതോടെ പരാതിയില് ഉറച്ചുനില്ക്കാന് ഏജന്സി തീരുമാനിക്കുകയായിരുന്നു. മര്ദിച്ചതിനും അസഭ്യം പറഞ്ഞിനുമാണ് യുവതിക്കെതിരേ കേസെടുത്തിരിക്കുന്നത്.
https://www.facebook.com/Malayalivartha
