സംസ്ഥാനത്ത് നിർമാണം പൂർത്തിയായിവരുന്ന ആറുവരി ദേശീയപാതകളുടെ സുരക്ഷയും ഗതാഗത സുഗമതയും മുൻനിർത്തി, പുതിയ യാത്രാനിയന്ത്രണവുമായി മോട്ടോർ വാഹന വകുപ്പ്. പുതുക്കിയ ഉത്തരവനുസരിച്ച് റൂട്ട് ബസുകൾക്ക് ആറുവരി പാതകളിൽ പ്രവേശനമില്ല.

സ്വകാര്യ ബസുകളും കെഎസ്ആർടിസിയുടെ സാധാരണ സർവീസുകളും ഇനിമുതൽ ദേശീയപാതയുടെ മെയിൻ ക്യാരേജ് ഒഴിവാക്കി സർവീസ് റോഡുകൾ വഴിമാത്രമേ സർവീസ് നടത്താവൂ. എന്നാൽ, യാത്രക്കാരുടെ സൗകര്യാർത്ഥം ദീർഘദൂര സർവീസുകൾക്ക് പുതിയ ഉത്തരവിൽ ഇളവ് അനുവദിച്ചിട്ടുണ്ട്. കെഎസ്ആർടിസിയുടെ സൂപ്പർഫാസ്റ്റ്, എക്‌സ്പ്രസ്, മിന്നൽ, ഡീലക്‌സ് തുടങ്ങിയ സൂപ്പർക്ലാസ് ദീർഘദൂര സർവീസുകൾക്ക് തടസ്സമില്ലാതെ ആറുവരിപ്പാതകൾ ഉപയോഗിക്കാം.

ഹൈവേകളിലെ വേഗത നിലനിർത്തുന്നതിനും ലോക്കൽ ഗതാഗതം സർവീസ് റോഡുകളിലേക്ക് തിരിച്ചുവിടുന്നതിനുമാണ് ഈ ക്രമീകരണമുള്ളത്.
നിയമം ലംഘിച്ച് സാധാരണ റൂട്ട് ബസുകൾ ആറുവരി പാതയിലൂടെ സർവീസ് നടത്തിയാൽ കർശന നടപടി സ്വീകരിക്കുമെന്ന് ട്രാൻസ്‌പോർട്ട് കമ്മീഷണർ നാഗരാജു ചകിലം മുന്നറിയിപ്പ് നൽകുകയും ചെയ്തു.

ഇത്തരം നിയമലംഘനങ്ങൾ കണ്ടെത്തിയാൽ ബസിന്റെ പെർമിറ്റ് റദ്ദാക്കാനും, ഉത്തരവാദികളായ ഡ്രൈവറുടെയും കണ്ടക്ടറുടെയും ലൈസൻസ് സസ്‌പെൻഡ് ചെയ്യാനുമാണ് മോട്ടോർ വാഹന വകുപ്പിന്റെ തീരുമാനമുള്ളത്.