പ്രധാനമന്ത്രി നരേന്ദ്രമോദിയെ സ്തുതിച്ച് വിവാദച്ചുഴിയില്‍ അകപ്പെട്ട തിരുവനന്തപുരം എം.പി ശശി തരൂര്‍ ആര്‍.എസ്.എസ് വോട്ട് ആഭ്യര്‍ത്ഥിച്ചത് വിവാദമാകുന്നു. വട്ടിയൂര്‍ക്കാവിലെ ബിജെപിയുടെ സ്ഥാനാര്‍ത്ഥി നിര്‍ണയത്തില്‍ അതൃപ്തിയുളള ആര്‍എസ്എസുകാര്‍ യുഡിഎഫിന് വോട്ട് ചെയ്യണമെന്ന് ശശി തരൂര്‍ ആവശ്യപ്പെട്ടതാണ് പുതിയ വിവാദത്തിന് കാരണം. വട്ടിയൂര്‍ക്കാവില്‍ ത്രികോണമത്സരമാണ്. അത് ലോക്‌സഭാ തിരഞ്ഞെടുപ്പിലുള്‍പ്പെടെ കണ്ടതാണ്. ബിജെപിക്ക് തിരുവനന്തപുരത്തിന്റെ പല ഭാഗങ്ങളിലും ശക്തമായ സാന്നിധ്യമുണ്ട്. ആര്‍എസ്എസ് വോട്ട് വേണ്ട എന്ന് പറയാനാകില്ലെന്നും ശശി തരൂര്‍ പറഞ്ഞു. തങ്ങള്‍ക്ക് വേണ്ടത് വ്യക്തികളുടെ വോട്ടാണ്. ആര്‍എസ്എസുകാര്‍ക്ക് ബിജെപി സ്ഥാനാര്‍ത്ഥിയെ താല്‍പര്യം ഇല്ലെങ്കില്‍ യുഡിഎഫിന് വോട്ട് തരട്ടെ എന്നും തരൂര്‍ കൂട്ടിച്ചേര്‍ത്തു.

കുമ്മനം രാജശേഖരന് പകരം ജില്ലാ പ്രസിഡന്റ് എസ്.സുരേഷിനെ സ്ഥാനാര്‍ത്ഥിയാക്കിയത് ആര്‍.എസ്.എസിനും ബി.ജെ.പി പ്രവര്‍ത്തകരും തുടക്കത്തില്‍ എതിര്‍ത്തിരുന്നു. കുമ്മനം സ്ഥാനാര്‍ത്ഥിയാകുമെന്ന് അദ്ദേഹം മുതിര്‍ന്ന നേതാവ് ഒ. രാജഗോപാലും വ്യക്തമാക്കിയതിന് ശേഷമാണ് എസ്. സുരേഷ് സ്ഥാനാര്‍ത്ഥിയായത്. കുമ്മനവുമായി എതിര്‍പ്പുള്ള രണ്ട് ബി.ജെ.പി നേതാക്കളാണ് അദ്ദേഹത്തെ തഴഞ്ഞത്. ഇക്കാര്യത്തില്‍ ആര്‍.എസ്.എസിന് ശക്തമായ എതിര്‍പ്പുണ്ട്. ഇതേ തുടര്‍ന്ന് തരൂര്‍ ആര്‍.എസ്.എസ് വോട്ടുകള്‍ യു.ഡി.എഫ് സ്ഥാനാര്‍ത്ഥി കെ.മോഹന്‍കുമാറിന് നല്‍കണമെന്ന് തരൂര്‍ ആവശ്യപ്പെട്ടത്. ആര്‍.എസ്.എസിന് കൂടുതല്‍ വോട്ടുകളുള്ള കേരളത്തിലെ ചുരുക്കം ചില മണ്ഡലങ്ങളില്‍ ഒന്നാണ് വട്ടിയൂര്‍ക്കാവ്.

കോണ്‍ഗ്രസും ബി.ജെ.പിയും ആര്‍.എസ്.എസും തമ്മിലുള്ള അവിശുദ്ധ ബന്ധത്തിന്റെ തെളിവാണിതെന്ന ആരോപണവുമായി എല്‍.ഡി.എഫ് രംഗത്തെത്തിയിട്ടുണ്ട്. വട്ടിയൂര്‍ക്കാവില്‍ അപ്രധാന സ്ഥാനാര്‍ത്ഥിയെ ബി.ജെ.പി രംഗത്തിറക്കിയതും ഇതുകൊണ്ടാണെന്നും സി.പി.എം ആരോപിക്കുന്നു. ആര്‍.എസ്.എസ് വോട്ടുകളല്ല, ആരുടെയും വോട്ടുകള്‍ വേണമെന്നുള്ള നിലപാടിലാണ് കോണ്‍ഗ്രസ്. വ്യക്തികളുടെ വോട്ടാണ് ആവശ്യപ്പെട്ടതെന്ന് അവര്‍ വിശദീകരിക്കുന്നു. വര്‍ഗീയവാദികളുടെ വോട്ട് വേണ്ടെന്ന നിലപാടിലാണ് സി.പി.എം. പരസ്യമായി ആര്‍.എസ്.എസ് വോട്ടുകള്‍ ആവശ്യപ്പെട്ടത് ശരിയായില്ലെന്ന് ചില കോണ്‍ഗ്രസ് നേതാക്കള്‍ക്ക് അഭിപ്രായമുണ്ട്. മണ്ഡലത്തില്‍ യു.ഡി.എഫ് മറ്റുള്ളവരെ അപേക്ഷിച്ച് മുന്നേറുമ്പോള്‍ ഇത്തരത്തില്‍ വിവാദങ്ങള്‍ ഉണ്ടാകുന്നത് തിരിച്ചടിയാകുമെന്നും അവര്‍ വിലയിരുത്തുന്നു.

വട്ടിയൂര്‍ക്കാവില്‍ യു.ഡി.എഫ് സ്ഥാനാര്‍ത്ഥിയെ പ്രഖ്യാപിച്ച് പ്രചരണവുമായി മുന്നോട്ട് പോയിട്ട് ദിവസങ്ങള്‍ കഴിഞ്ഞാണ് ശശി തരൂര്‍ പ്രചരണത്തിനെത്തിയത്. തെരഞ്ഞെടുപ്പ് പരിപാടികളില്‍ തരൂര്‍ അടക്കമുള്ള നേതാക്കള്‍ എത്താത്തതിനെതിരെ സ്ഥാനാര്‍ത്ഥി കെ.മോഹന്‍കുമാര്‍ രംഗത്തെത്തിയിരുന്നു. തുടര്‍ന്നാണ് തരൂരും കെ.മുരളീധരനും മണ്ഡലത്തിലെത്തിയത്. ഭരണകക്ഷിയായ സി.പി.എമ്മും കേന്ദ്രത്തില്‍ അധികാരത്തിലുള്ള ബി.ജെ.പിയും പണം വാരിക്കോരി നല്‍കിയാണ് പ്രവര്‍ത്തനങ്ങള്‍ നടത്തുന്നത്. അതിന് മുന്നില്‍ യു.ഡി.എഫിന് പിടിച്ച് നില്‍ക്കണമെങ്കില്‍ കോണ്‍ഗ്രസ് നേതാക്കള്‍ മണ്ഡലത്തിലെത്തി ജനങ്ങളോട് രാഷ്ട്രീയ കാര്യങ്ങള്‍ വിശദീകരിക്കണമെന്നും സ്ഥാനാര്‍ത്ഥി ആവശ്യപ്പെട്ടിരുന്നു. എന്നാല്‍ മണ്ഡലത്തിലെത്തിയ തരൂര്‍ ഇത്തരത്തിലൊരു കെണി ഒപ്പിക്കുമെന്ന് ആരും പ്രതീക്ഷിച്ചില്ല.