രണ്ട് കുട്ടികളെക്കൂടി കൊല്ലാന്‍ കൂടത്തായി കൊലപാതക പരമ്പരയിലെ പ്രതി ജോളി ശ്രമിച്ചിരുന്നെന്ന് റൂറല്‍ എസ്.പി കെ ജി സൈമണ്‍ . പൊന്നാമറ്റത്തെയും ഈ കുടുംബവുമായി ബന്ധമുള്ള മറ്റൊരു വീട്ടിലെയും കുട്ടികളെ കൊല്ലാന്‍ അടുത്തകാലത്ത് ശ്രമിച്ചിട്ടുണ്ട്. ഈ സാഹചര്യങ്ങള്‍കൂടി കണക്കിലെടുത്താണ് അറസ്റ്റ് ചെയ്തത്. റോയിയുടെ മരണത്തില്‍ മാത്രമാണ് തെളിവുകള്‍ ലഭിച്ചത്. അത് മാത്രം ഒരു എഫ്‌ഐആറില്‍ അന്വേഷിക്കും.
കേസില്‍ ഇതുവരെ മൂന്നുപേരെയാണ് അറസ്റ്റ് ചെയ്തിരിക്കുന്നത്. ജോളിക്കു പുറമേ, ജ്വല്ലറി ജീവനക്കാരനും റോയിയുടെ മാതൃസഹോദരപുത്രനുമായ മഞ്ചാടിയില്‍ എം.എസ്. മാത്യു സ്വര്‍ണപ്പണിക്കാരന്‍ താമരശേരി തച്ചംപൊയില്‍ സ്വദേശി മുള്ളന്പലത്തില്‍ പ്രജുകുമാര്‍ എന്നിവരാണ് അറസ്റ്റിലായത്. ഇവര്‍ റിമാന്‍ഡിലാണ്.

ഈ കേസില്‍ പ്രത്യേക ശ്രദ്ധ അനിവാര്യമാണ്. തെറ്റ് ചെയ്തവരെല്ലാം ശിക്ഷിക്കപ്പെടും. വ്യത്യസ്ത എഫ്.ഐ.ആര്‍ വേണോ എന്ന് നിയമപരമായി ആലോചിച്ച് ചെയ്യും.ജോളിയുടെ ഭൂമി, പണ ഇടപാടുകളില്‍ അന്വേഷണം ഇപ്പോള്‍ പ്രധാനമല്ലെന്ന് എസ്.പി വ്യക്തമാക്കി. അന്വേഷണ സംഘത്തിനെറ എണ്ണം ഉടന്‍ കൂട്ടും. എല്ലാ കൊലപാതകങ്ങളും ഒരു എഫ്.ഐ.ആറില്‍ ആക്കിയാല്‍ നിലനില്‍ക്കുമെന്ന വിശ്വാസം അന്വേഷക സംഘത്തിനുണ്ടെന്നും കെ ജി സൈമണ്‍ കൂട്ടിച്ചേര്‍ത്തു.

2002 ഓഗസ്റ്റ് 22നാണ് കേസിനാസ്പദമായ ആദ്യ മരണം. റിട്ട.വിദ്യാഭ്യാസവകുപ്പ് ഉദ്യോഗസ്ഥനായ കൂടത്തായി പൊന്നാമറ്റം ടോം തോമസിന്റെ ഭാര്യയും റിട്ട.അധ്യാപികയുമായ അന്നമ്മ (57) ആട്ടിന്‍സൂപ്പ് കഴിച്ചയുടന്‍ കുഴഞ്ഞുവീണു മരിക്കുകയായിരുന്നു. ആറ് വര്‍ഷങ്ങള്‍ക്കു ശേഷം 2008 ഓഗസ്റ്റ് 26ന് ടോം തോമസും(66) മരിച്ചു. മൂന്നു വര്‍ഷത്തിനു ശേഷം 2011 സെപ്റ്റംബര്‍ 30ന് മകന്‍ റോയ് തോമസ്(40)മരിച്ചു. ബാത്ത്‌റൂമില്‍ കയറി ബോധംകെട്ടുവീണു എന്നായിരുന്നു ഭാര്യ ജോളിയുടെ മൊഴി. മൂന്നു വര്‍ഷത്തിനുശേഷം 2014 എപ്രില്‍ 24ന് അന്നമ്മയുടെ സഹോദരനും വിമുക്തഭടനുമായ മാത്യു മഞ്ചാടിയില്‍ (67) മരിച്ചു.

അതേ വര്‍ഷം മേയ് മൂന്നിനു ടോം തോമസിന്റെ അനുജന്‍ സക്കറിയയുടെ മകന്‍ ഷാജു സക്കറിയയുടെ ഒന്നര വയസുള്ള മകള്‍ ആല്‍ഫൈനും മരിച്ചു. ആദ്യകുര്‍ബാന വിരുന്നില്‍ പങ്കെടുത്തുകൊണ്ടിരിക്കുന്‌പോള്‍ ഭക്ഷണം ശ്വാസനാളത്തില്‍ കുടുങ്ങിയതാണെന്നായിരുന്നു ബന്ധുക്കള്‍ പറഞ്ഞത്.
മരണ പരന്പരയില്‍ അവസാനത്തേതു ഷാജു സക്കറിയായുടെ ഭാര്യ സിലി സെബാസ്റ്റ്യന്റേത് (ഫിലി-42). ആയിരുന്നു. 2016 ജനുവരി 11നാണ് അവര്‍ മരിച്ചത്. അതും ഭക്ഷണം കഴിച്ച് അധികം വൈകാതെയായിരുന്നു. ജോളിയുടെ മടിയില്‍ കിടന്നാണ് സിലി അന്ത്യശ്വാസം വലിച്ചത്. 2011-ല്‍ മരിച്ച റോയി തോമസിന്റെ മൃതദേഹം ഒഴികെ എല്ലാ മൃതദേഹങ്ങളും പോസ്റ്റ്‌മോര്‍ട്ടം ചെയ്യാതെയാണു സംസ്‌കരിച്ചത്.