ഹാര്ബര് ടെര്മിനസ് റെയില്വെ സ്റ്റേഷനില് പുതിയ ചരിത്രം, രാജ്യത്ത് ആദ്യമായി വാടകയ്ക്ക് നല്കപ്പെട്ട റെയില്വെ സ്റ്റേഷന്!
ടിക്കറ്റിതര വരുമാനം മെച്ചപ്പെടുത്താനായി റെയില്വെ ഉടമസ്ഥതയിലുളള സ്ഥലങ്ങള് സ്വകാര്യ വ്യക്തികള്ക്ക് വാടകയ്ക്ക് നല്കുന്നതിനുള്ള തീരുമാനം എടുത്തിരിക്കുകയാണ്. കുടുംബത്തിലെ ഒരു കല്യാണം റെയില്വെ സ്റ്റേഷനില് വച്ച് നടത്തണോ ? കല്യാണമെന്നല്ല ഏതു സ്വകാര്യ ചടങ്ങും ഇനി റെയില്വെ സ്റ്റേഷനില് നടത്താം.
കൊച്ചി വെല്ലിങ്ടണ് ഐലന്ഡിലെ ഹാര്ബര് ടെര്മിനസ് റെയില്വെ സ്റ്റേഷനാണ് രാജ്യത്ത് ഇത്തരത്തില് ആദ്യമായി വാടകയ്ക്ക് നല്കപ്പെട്ട റെയില്വെ സ്റ്റേഷന്.
കവാടത്തില് അതിഥികളെ വരവേല്ക്കാന് ടിക്കറ്റ് എക്സാമിനര് . വന്നു കയറുന്നവരെ കാര്യം പറഞ്ഞിരുത്താന് റെയില്വെ പോര്ട്ടര്മാര് .ടിക്കറ്റ് കൗണ്ടര്, കഫറ്റീരിയ, പുസ്തകശാല അങ്ങിനെ കൊച്ചിയുടെ ചരിത്രമുറങ്ങുന്ന ഹാര്ബര് ടെര്മിനസ് റെയില്വെ സ്റ്റേഷനില് ഒരു റെയില്വെ സ്റ്റേഷന് പൂര്ണാര്ഥത്തില് പുനരാവിഷ്കരിച്ചു .
സ്വകാര്യ വ്യവസായ ഗ്രൂപ്പിന്റെ അതിഥി സല്ക്കാരത്തിനായി റെയില്വെ സ്റ്റേഷന് വാടകയ്ക്ക് കൊടുത്തതോടെ രാജ്യത്തിന്റെ റെയില്വെ ചരിത്രത്തിലെ നിര്ണായക മാറ്റങ്ങളിലൊന്നിനു കൂടിയാണ് ഹാര്ബര് ടെര്മിനസ് റെയില്വെ സ്റ്റേഷന് വേദിയായത്.
ഈ മാതൃകയില് ഉപയോഗശൂന്യമായി കിടക്കുന്ന റെയില്വെയുടെ ഉടമസ്ഥതയിലുളള പല സ്ഥലങ്ങളും ഇനി വാടകയ്ക്ക് നല്കും. ഏതു സ്വകാര്യ ആവശ്യത്തിനും. ടിക്കറ്റ് ഇതര വരുമാനം വര്ധിപ്പിക്കുന്നതിനൊപ്പം പൗരാണിക പ്രാധാന്യമുളള സ്ഥലങ്ങള് സംരക്ഷിക്കുക കൂടിയാണ് ഈ ഉദ്യമത്തിലൂടെ റെയില്വെ ലക്ഷ്യമിടുന്നത്.
ആട്ടവും പാട്ടുമെല്ലാമായാണ് ഹാര്ബര് ടെര്മിനസ് റെയില്വെ സ്റ്റേഷനില് ആദ്യ സ്വകാര്യ ചടങ്ങ് നടന്നത്.
https://www.facebook.com/Malayalivartha
