ഓടിക്കൊണ്ടിരുന്ന സ്കൂട്ടറിനു മുകളിലൂടെ വൈദ്യുതികമ്പി പൊട്ടി വീണ് യുവതിക്ക് ദാരുണാന്ത്യം... ഭര്ത്താവും മകളും അത്ഭുതകരമായി രക്ഷപ്പെട്ടു
ഓടിക്കൊണ്ടിരുന്ന സ്കൂട്ടറിന് മുകളിലേക്ക് വൈദ്യുതികമ്പി പൊട്ടിവീണ് യുവതിക്ക് ദാരുണാന്ത്യം. കോട്ടയം തലയോലപ്പറമ്പിലാണ് സംഭവം. കടുത്തുരുത്തി ആപ്പാഞ്ചിറ പൂഴിക്കോല് ഉള്ളാടംകുന്നേല് പ്രശാന്തിന്റെ ഭാര്യ രശ്മി (35) ആണ് മരിച്ചത്. സ്കൂട്ടറിന് മുകളിലേയ്ക്ക് പൊട്ടിവീണ വൈദ്യുതി കമ്പിയില്നിന്ന് ഷോക്കേറ്റാണ് യുവതി മരിച്ചത്.
ഭര്ത്താവും മകളും അപകടത്തില് നിന്ന് പരിക്കുകളോടെ അത്ഭുതകരമായി രക്ഷപ്പെട്ടു. സ്കൂട്ടര് ഓടിച്ചിരുന്ന പ്രശാന്തിനും, ഇളയ മകള് അഭിമന്യക്കും പൊള്ളലേറ്റിട്ടുണ്ട്. ഇരുവരേയും മുട്ടുചിറയിലെ സ്വകാര്യ ആശുപത്രിയില് പ്രവേശിപ്പിച്ചു.ഇന്നലെ വൈകിട്ട് 4.30 ഓടെ കീഴൂര്ആപ്പാഞ്ചിറ റോഡില് കളരിക്കല്താഴെ ട്രാന്സ്ഫോര്മറിന് സമീപമായിരുന്നു അപകടം.
പൊട്ടിവീണ വൈദ്യുതി കമ്പി മന്നുപേരുടെയും ദേഹത്ത് ചുറ്റിയതോടെ നിയന്ത്രണംവിട്ട സ്കൂട്ടര് സമീപത്തെ വാഴത്തോട്ടത്തിലേക്ക് മറിഞ്ഞുവീഴുകയായിരുന്നു. പ്രശാന്തും അഭിമന്യയും പച്ചക്കറി കൃഷിക്കായി ഒരുക്കിയിരുന്ന മണ്കൂനയിലേക്കും, രശ്മി വെള്ളക്കെട്ടിലേക്കുമാണ് തെറിച്ച് വീണത്. രശ്മിയുടെ കൈയില് ചുറ്റി കിടക്കുന്ന നിലയിലായിരുന്നു വൈദ്യുതി കമ്പി. കരച്ചില്കേട്ട് ഇതുവഴിയെത്തിയ പ്രദേശവാസികള് ഇവരെ രക്ഷിക്കാന് പാടത്തേക്കിറങ്ങിയെങ്കിലും ഷോക്കേറ്റു. തുടര്ന്ന് ട്രാന്സ്ഫോര്മറിന്റെ ഫ്യൂസ് ഊരി മാറ്റിയാണ് മൂവരേയും കരയ്ക്ക് കയറ്റിയത്. ഉടന് തന്നെ ആശുപത്രിയിലെത്തിച്ചെങ്കിലും രശ്മിയുടെ ജീവന് രക്ഷിക്കാനായില്ല.
https://www.facebook.com/Malayalivartha