5,000 പേരുകള്‍ രണ്ടുവട്ടം പട്ടികയില്‍. എല്ലാം സിപിഎം-ബിജെപി പ്രവര്‍ത്തകര്‍. വട്ടിയൂര്‍ക്കാവിലെ വോട്ടര്‍ പട്ടികയില്‍ വ്യാപക ക്രമക്കേടെന്ന് കോണ്‍ഗ്രസ്. പതിനയ്യായിരത്തോളം പേരുടെ പേരുകള്‍ രണ്ടു തവണ പട്ടികയിലുണ്ട്. ഇവരെല്ലാം സിപിഎം-ബിജെപി പ്രവര്‍ത്തകരാണ്. വോട്ടു മറിക്കാനുള്ള തന്ത്രമാണിതിന് പിന്നിലെന്നും ഇതിനെതിരെ തിരഞ്ഞെടുപ്പ് കമ്മീഷന് പരാതി നല്‍കുമെന്നും മുരളീധരന്‍ പറഞ്ഞു.

ഏതായാലും വട്ടിയൂര്‍ക്കാവ് ഉപതിരഞ്ഞെടുപ്പ് മൂന്നുമുന്നണിക്കും അഭിമാനപ്രശ്‌നമാണ്. മുമ്പുനടന്ന വാശിയേറിയ നിയമസഭാ തിരഞ്ഞെടുപ്പിലും ലോക്സഭാ തിരഞ്ഞെടുപ്പിലും യു.ഡി.എഫിന് പിന്നാലെ രണ്ടാമതെത്താന്‍ ബി.ജെ.പി.ക്ക് കഴിഞ്ഞു. മൂന്നാംസ്ഥാനത്തായിപ്പോയ എല്‍.ഡി.എഫ്. വോട്ടുനിലയില്‍ മറ്റ് രണ്ടുസ്ഥാനാര്‍ഥികളെക്കാളും പിന്നിലായി. പാര്‍ലമെന്റ് തിരഞ്ഞെടുപ്പില്‍ മണ്ഡലത്തിലെ 168 ബൂത്തുകളില്‍ 85-ല്‍ യു.ഡി.എഫും 79 ഇടത്ത് ബി.ജെ.പി.യും മുന്നിലെത്തിയപ്പോള്‍ നാലിടത്തുമാത്രമാണ് എല്‍.ഡി.എഫിന് ലീഡ് നേടാനായത്. നിയമസഭാതിരഞ്ഞെടുപ്പില്‍ 7622 വോട്ടിന്റെ ഭൂരിപക്ഷമാണ് യു.ഡി.എഫിന് ലഭിച്ചതെങ്കിലും പാര്‍ലമെന്റ് തിരഞ്ഞെടുപ്പില്‍ അത് 2836 ആക്കി കുറയ്ക്കാനായത് ബി.ജെ.പി.നേട്ടമായി കരുതുന്നു. കണക്കുകള്‍ ഇങ്ങനെയാണെങ്കിലും ഇപ്രാവശ്യം ശക്തമായി തിരിച്ചുവരാനാകുമെന്നാണ് എല്‍.ഡി.എഫിന്റെ കണക്കുകൂട്ടല്‍.

ഭൂരിപക്ഷസമുദായങ്ങള്‍ക്കൊപ്പംതന്നെ ന്യൂനപക്ഷവിഭാഗത്തിനും വ്യക്തമായ വോട്ടുവിഹിതം മണ്ഡലത്തിലുണ്ട്. രാഷ്ട്രീയസാഹചര്യങ്ങള്‍ക്കുപുറമേ സാമുദായിക സമവാക്യങ്ങളും ഇവിടെ വിജയത്തില്‍ നിര്‍ണായകപങ്കുവഹിക്കും. കേരള രാഷ്ട്രീയചരിത്രത്തിലെത്തന്നെ വമ്പന്‍മാരെ വാഴിച്ചും വീഴ്ത്തിയും തിരഞ്ഞെടുപ്പുപോരാട്ടങ്ങളുടെ ആവേശം എക്കാലവും കാത്തുസൂക്ഷിച്ചിട്ടുള്ള പഴയ തിരുവനന്തപുരം നോര്‍ത്തിന്റെ ഭൂരിഭാഗം പ്രദേശങ്ങളും ഉള്‍പ്പെടുന്നതാണ് ഇപ്പോഴത്തെ വട്ടിയൂര്‍ക്കാവ്. കെ. അനിരുദ്ധന്‍, ജി. കാര്‍ത്തികേയന്‍, എം. വിജയകുമാര്‍ തുടങ്ങിയ പ്രമുഖര്‍ തിരുവനന്തപുരം നോര്‍ത്തില്‍ വിജയവും പരാജയവും അഭിമുഖീകരിച്ചവരാണ്. മുരളീധരന്റെ പുതിയ നിലപാടുകള്‍, വട്ടിയൂര്‍ക്കാവിലെ വിധിയെഴുത്ത് എന്തായിരിക്കും.