കേരള പോലീസിന് അന്വേഷിച്ചിട്ടും അന്വേഷിച്ചിട്ടും പിടികിട്ടാത്ത ഒരു മനസായി കൂടത്തായി കൊലപാതക കേസിലെ ജോളി ജോസഫ് മാറുകയാണ്. 17 വര്‍ഷം കൊണ്ട് കുടുംബത്തിലെ ഓരോരുത്തരായി സ്വാഭാവിക മരണത്തിന് വിട്ട ജോളി എല്ലാവര്‍ക്കും പ്രിയങ്കരിയായിരുന്നു. നാട്ടുകാര്‍ക്ക് എന്നും സ്‌നേഹഭാജനവും അവരുടെ കുട്ടികള്‍ക്ക് മാതൃകയുമായിരുന്നു ജോളി. ജോളിയെക്കണ്ട് പഠിക്കുവെന്ന് സ്‌നേഹപൂര്‍വം മാതാപിതാക്കള്‍ ശാസിക്കുന്നത് അന്നാട്ടില്‍ പതിവാണ്. എന്നാല്‍ വ്യാജ പ്രൊഫസര്‍ ജോളിയുടെ കഥ കൊലപാതകത്തില്‍ മാത്രമല്ല സര്‍ക്കാരിനെ കബളിപ്പിക്കാനും ശ്രമിച്ചതായി തെളിയുന്നു. കൂട്ട കൊലപാതകങ്ങള്‍ക്കിടയില്‍ വന്ന് ചേരുന്ന സമ്പത്തിന് പുറമേ ഇന്‍ഷുറന്‍സ് പോളിസിയിലൂടെയും പണം നേടാന്‍ ശ്രമിച്ചിരുന്നെന്ന വെളിപ്പെടുത്തലാണ് പുറത്താകുന്നത്.


കൊല്ലപ്പെടുന്നതിന്റെ ഏതാനും ദിവസം മുമ്പേ റോയി തോമസിന്റെ പേരില്‍ ഇന്‍ഷുറന്‍സ് പോളിസി എടുത്തതായ വിവരമാണ് പോലീസിന് ലഭിച്ചത്. 15 ലക്ഷം രൂപയുടെ പോളിസി എടുത്തത് സംബന്ധിച്ച് പോലീസ് അന്വേഷണം തുടങ്ങി. പണം തട്ടാന്‍ ജോളി തന്നെയാണ് ഇതും ആസൂത്രണം ചെയ്തതെന്നാണ് പ്രാഥമിക സൂചന. റോയി തോമസ് കൊല്ലപ്പെട്ട അതേ മാസം തന്നെയാണ് പോളിസിയെടുത്തത്. പോളിസിയുടമ മരണപ്പെട്ടാല്‍ ഇന്‍ഷുര്‍ ചെയ്ത സംഖ്യയുടെ മൂന്നിരട്ടി തുക കിട്ടുന്ന ട്രിപ്പിള്‍ കവര്‍ പോളിസിയാണിത്. ഇതുപ്രകാരം റോയി മരിച്ചാല്‍ നോമിനിക്ക് 45 ലക്ഷം രൂപ കിട്ടും. നോമിനിയായി ജോളിയെയും മക്കളെയുമാണ് ചേര്‍ത്തിരുന്നത്. പോളിസിയെടുക്കാനും പണം അടയ്ക്കാനുമെല്ലാം മുന്‍കൈയെടുത്തത് ജോളിയാണെന്നാണ് പോലീസിനു കിട്ടിയ പ്രാഥമികസൂചന.

ഇതുസംബന്ധിച്ച വിവരങ്ങള്‍ അടുത്ത ദിവസം തന്നെ എല്‍.ഐ.സി.യുമായി ബന്ധപ്പെട്ട് പോലീസ് ശേഖരിക്കും. റോയി മരണപ്പെട്ട ശേഷം തുക ക്ലെയിം ചെയ്യാനും ശ്രമം നടന്നിരുന്നു. റോയിയുടെ പോസ്റ്റുമോര്‍ട്ടത്തില്‍ സയനൈഡിന്റെ അംശം കണ്ടെത്തിയതിനാല്‍ മരണത്തെ ആത്മഹത്യയായാണ് അന്ന് കണക്കാക്കിയത്. അതുകൊണ്ടുതന്നെ ഇന്‍ഷുറന്‍സ് തുക കിട്ടിയില്ല.

അന്നമ്മയുടെയും ടോം തോമസിന്റെയും മരണം പോലെയാണ് ജോളി റോയിയുടെ മരണവും ആസൂത്രണം ചെയ്തതത്. റോയിയുടെ മരണകാരണം ഹൃദായാഘാതമാണെന്ന് ജോളി എല്ലാവരോടും പറഞ്ഞത്. എന്നാല്‍ റോയിയുടെ അമ്മാവന്‍ മാത്യുവിന്റെയും മറ്റും നിര്‍ബന്ധത്താല്‍ മൃതദേഹം പോസ്റ്റുമോര്‍ട്ടം ചെയ്യേണ്ടിവന്നു. ഇതോടെയാണ് ജോളിയുടെ പദ്ധതി പൊളിഞ്ഞതെന്നാണ് സംശയം.

റോയിയുടെ പേരില്‍ ജോളിയാണോ പോളിസി എടുത്തത്, പണമടച്ചത് ആര് തുടങ്ങിയ കാര്യങ്ങളാണ് പോലീസ് അന്വേഷിക്കുന്നത്. ജോളിയുടെ പങ്ക് ഇതില്‍ തെളിഞ്ഞാല്‍ റോയി വധക്കേസിലെ പ്രധാനതെളിവായി ഇതും മാറുമെന്ന പ്രതീക്ഷയിലാണ് പോലീസ്.

അതേസമയം കൂടത്തായി കൊലപാതക കേസില്‍ പ്രതികളുടെ റിമാന്‍ഡ് കാലാവധി നീട്ടിയിട്ടുണ്ട്. ജോളി ഉള്‍പ്പെടെ മൂന്ന് പേരുടെ റിമാന്‍ഡ് കാലാവധിയാണ് 14 ദിവസത്തേക്ക് നീട്ടിയത്. താമരശ്ശേരി കോടതിയാണ് റോയ് കൊലക്കേസിലെ ഒന്നാം പ്രതി ജോളി, രണ്ടാം പ്രതി മാത്യൂ, മൂന്നാം പ്രതി പ്രജു കുമാര്‍ എന്നിവരുടെ റിമാന്‍ഡ് കാലാവധി ഈ മാസം 16 വരെയാക്കികൊണ്ടുള്ള ഉത്തരവ് പുറപ്പെടുവിച്ചത്.

റോയ് തോമസിന്റെ കൊലപാതകത്തില്‍ സിലിയുടെ സഹോദരന്‍ സിജോയുടെ രഹസ്യമൊഴി അന്വേഷണ സംഘം രേഖപ്പെടുത്തും. അതേ സമയം ഷാജുവിന്റെ മകള്‍ ആല്‍ഫൈന്റെ കൊലപാതകത്തില്‍ ജോളിയെ വീണ്ടും ചോദ്യം ചെയ്തു. വടകര എസ് പി ഓഫീസില്‍ വെച്ചാണ് ചോദ്യം ചെയ്തത്. നിലവില്‍ ആല്‍ഫൈന്‍ കൊലകേസിലെ പോലീസ് കസ്റ്റഡിയിലാണ് ജോളി.