അവസാനം പോലീസിനെ ജയ് വിളിക്കും നോക്കിക്കോ... യുവാക്കള്ക്കെതിരേ യുഎപിഎ നിലനില്ക്കുമെന്ന് ഉറപ്പിച്ച് പോലീസ്; തെളിവുകള് ശക്തം; ഇത്രയും ആയ സ്ഥിതിയ്ക്ക് പിന്നോട്ട് പോയാല് പോലീസിന്റെ വില പോകും; ഭരിക്കുന്ന പാര്ട്ടിയുടെ അണികളെ കണ്ണുമടച്ച് അറസ്റ്റ് ചെയ്യുമോ? കൂടുതല് തെളിവുകള് പുറത്ത് വിടാനുറച്ച് പോലീസ്
മാവോയിസ്റ്റ് ലഘുലേഖ വിതരണം ചെയ്തതിന്റെ പേരില് കോഴിക്കോട് പന്തീരങ്കാവില് അറസ്റ്റിലായ യുവാക്കള്ക്കെതിരേ യുഎപിഎ നിലനില്ക്കാനുള്ള തെളിവുകളുണ്ടെന്ന് ആവര്ത്തിച്ച് പോലീസ്. വെറും ലഘുലേഖ മാത്രം വിതരണം ചെയ്തതിന്റെ പേരില് ഒരു ഭരിക്കുന്ന പാര്ട്ടിയുടെ അണികളെ പോലീസ് അറസ്റ്റ് ചെയ്ത് യുഎപിഎ നിയമം ചുമത്തുമോയെന്നാണ് ഉന്നത പോലീസ് ഉദ്യോഗസ്ഥര് ചോദിക്കുന്നത്. അതിനുള്ള ശക്തമായ തെളിവ് ശേഖരിച്ചതിന് ശേഷമാണ് യുഎപിഎ ചുമത്തിയതെന്നാണ് പോലീസ് നല്കുന്നത്. യുഎപിഎ നിലനില്ക്കില്ലെന്നും നിയമം നീക്കണമെന്നുമുള്ള വാദത്തെ ജാമ്യാപേക്ഷ പരിഗണിക്കുന്പോള് പ്രോസിക്യൂഷന് എതിര്ക്കും. സര്ക്കാര് പ്ലീഡര് ഇത്തരത്തില് കോടതിയില് നിലപാട് വ്യക്തമാക്കുമെന്നുമാണു സൂചന.
യുഎപി കേസുകളില് സെഷന്സ് കോടതികള് സാധാരണ ജാമ്യം നല്കാറില്ല. കുറ്റപത്രം തയാറായി കഴിയുന്പോഴോ 90 ദിവസ കാലാവധിക്കു ശേഷമോ ആണ് ഇത്തരം കേസുകളില് ജാമ്യം ലഭിക്കാന് സാധ്യത. സംഭവത്തില് കേസ് വിവരങ്ങള് വേഗത്തില് ഹൈക്കോടതി റിട്ടയേര്ഡ് ജഡ്ജി അധ്യക്ഷനായ യുഎപിഎ പരിശോധനാ സമിതിക്കു കൈമാറാന് പോലീസിനോടു സര്ക്കാര് നിര്ദേശിച്ചിട്ടുണ്ട്. സമിതി റിപ്പോര്ട്ടിന്റെ അടിസ്ഥാനത്തിലാകും പ്രോസിക്യൂഷന് അനുമതിയുടെ കാര്യത്തില് അന്തിമ തീരുമാനമെടുക്കുക. ഇതിനുശേഷം മാത്രമേ ഇനി കുറ്റപത്രം കോടതിയില് സമര്പ്പിക്കുന്നതടക്കമുള്ള തുടര്നടപടികള് പോലീസിനു സ്വീകരിക്കാനാകൂ.
അതേസമയം, സിപിഎം പ്രവര്ത്തകരായ യുവാക്കളെ യുഎപിഎ ചുമത്തി പോലീസ് അറസ്റ്റ് ചെയ്തതു മേലുദ്യോഗസ്ഥരുടെ അറിവോടെയെന്നാണു സൂചന. യുഎപിഎ ചുമത്തുന്നതിന് മുന്പ് ഉന്നത പോലീസ് ഉദ്യോഗസ്ഥരുടെ അനുമതി ലോക്കല് പോലീസ് തേടിയിരുന്നു. അറസ്റ്റ് രേഖപ്പെടുത്തിയതും യുഎപിഎ ചുമത്തിയതും വ്യക്തമായ നിര്ദേശത്തെത്തുടര്ന്ന് മാത്രമാണ്. യുഎപിഎ ചുമത്തുന്നതിനു മുന്നോടിയായി ഡിജിപി പുറപ്പെടുവിച്ച മാനദണ്ഡങ്ങളെല്ലാം പാലിച്ചിരുന്നതായി പന്തീരാങ്കാവ് പോലീസ് പറഞ്ഞു.
ജില്ലാ പോലീസ് മേധാവിയുടെ അനുമതി വാങ്ങണമെന്നാണു ഡിജിപിയുടെ നിര്ദേശം. ഇതു പ്രകാരം സിറ്റി പോലീസ് കമ്മീഷണര് എ.വി.ജോര്ജിന്റെ അനുമതി പന്തീരാങ്കാവ് പോലീസ് വാങ്ങിയിരുന്നു. എഫ്ഐആര് തയാറാക്കിയതും കമ്മീഷണറുടെയും മറ്റും അനുമതിയോടെ തന്നെയാണ്. സിപിഎം പ്രവര്ത്തകരായതിനാല് കമ്മീഷണര് ഐജിയെയും ഐജി എഡിജിപിയെയും ഡിജിപിയെയും ഇക്കാര്യം അറിയിച്ചിരുന്നു. തുടര്ന്നാണ് അറസ്റ്റ് നടപടികളിലേക്കു പോലീസ് നീങ്ങിയത്.
മുഖ്യമന്ത്രി കോഴിക്കോട് എത്തുന്നതിനു മണിക്കൂറുകള്ക്കു മുന്പാണ് അറസ്റ്റ്. അതിനാല് യുഎപിഎ ചുമത്തുന്നതും മറ്റും വിവാദത്തിനിടയാക്കുമെന്നു പോലീസിന് അറിയാമായിരുന്നു. ഇതോടെ മേലുദ്യോഗസ്ഥരുടെ അനുമതി വാങ്ങിയ ശേഷമായിരുന്നു അറസ്റ്റ് രേഖപ്പെടുത്തിയത്.
അതേസമയം മാവോയിസ്റ്റ് ബന്ധം ആരോപിച്ച് യു.എ.പി.എ. ചുമത്തി അറസ്റ്റ് ചെയ്ത അലന് ഷുഹൈബിനെതിരെ കൂടുതല് തെളിവുകളും ചിത്രങ്ങളും പോലീസ് പുറത്ത് വിട്ടിരിക്കുകയാണ്. നിരോധിത സംഘടനകളില്പ്പെട്ടവര്ക്കൊപ്പം അലന് ഷുഹൈബ് നില്ക്കുന്ന ചിത്രങ്ങളാണ് അന്വേഷണസംഘം പുറത്തുവിട്ടത്.
അലന് ഷുഹൈബിന്റെ നാലുവര്ഷം മുമ്പ് വരെയുള്ള ചിത്രങ്ങള് ഇതില് ഉള്പ്പെടുന്നു. കോഴിക്കോട് സംഘടിപ്പിച്ച ചില പ്രതിഷേധ പരിപാടികളുടെ ചിത്രങ്ങളും ഇതിലുണ്ട്. പ്രായപൂര്ത്തിയാകുന്നതിന് മുമ്പ് തന്നെ അലന് ഷുഹൈബ് ഇത്തരം സംഘടനകളുമായി ബന്ധപ്പെട്ട് പ്രവര്ത്തിച്ചിരുന്നുവെന്നാണ് പോലീസിന്റെ കണ്ടെത്തല്. ഇക്കാര്യം സ്കൂള് അധികൃതരും പോലീസിനെ അറിയിച്ചിരുന്നു. എന്നാല് കുട്ടിയെന്നുള്ള പരിഗണന നല്കിയാണ് പോലീസ് അന്ന് നടപടികളിലേക്ക് കടക്കാതിരുന്നത്. പക്ഷേ, അന്നുമുതല് തന്നെ അലന് ഷുഹൈബ് പോലീസിന്റെയും ഇന്റലിജന്സിന്റെയും നിരീക്ഷണത്തിലായിരുന്നു. അതാണ് ഇപ്പോള് അറസ്റ്റില് കലാശിച്ചതെന്നും വ്യക്തമാക്കുന്നു.
https://www.facebook.com/Malayalivartha
