പ്രളയ ദുരിതത്തില്‍ തളര്‍ന്ന് പോയ ജനതയ്ക്ക് താങ്ങായിമാറേണ്ടവര്‍ വലിയ തേപ്പാണ് ചെയ്തത്. 2018ല്‍ പ്രളയം കേരളത്തെ വിഴുങ്ങിയപ്പോള്‍ നാടിന്റെ നാനാഭാഗത്ത് നിന്നും വിദേശങ്ങളില്‍ നിന്നും സഹായപ്രവാഹം ഒഴുകിയെത്തി. അതില്‍ ചില പുഴുക്കുത്തുകള്‍ ഉണ്ടായിരുന്നെന്നാണ് പുറത്ത് വരുന്ന റിപ്പോര്‍ട്ടുകള്‍ വ്യക്തമാക്കുന്നത്. മുഖ്യമന്ത്രിയുടെ ദുരിതാശ്വസ നിധിയിലേക്ക് 578 വണ്ടിച്ചെക്കുകളാണ് ലഭിച്ചത്. ഏതാണ്ട് ആറ് കോടി 31 ലക്ഷം രൂപയുടെ ചെക്കുകളാണിതെന്ന് ധനമന്ത്രി ഡോ.തോമസ് ഐസക് നിയമസഭയെ അറിയിച്ചു. പണം കിട്ടാന്‍ നടപടി സ്വീകരിച്ചപ്പോള്‍ അഞ്ച് കോടി 80 ലക്ഷം രൂപ കിട്ടി. 331 ചെക്കുകളില്‍ മേലുള്ള നടപടികള്‍ പുരോഗമിക്കുകയാണ്. അതില്‍ 43 വണ്ടി ചെക്കുകളില്‍ ഒരു ലക്ഷം രൂപക്ക് മുകളിലേക്കുള്ള തുകയാണ് രേഖപ്പെടുത്തിയിരിക്കുന്നത്.

2018ലെ പ്രളയത്തിനുശേഷം മുഖ്യമന്ത്രിയുടെ ദുരിതാശ്വാസ നിധിയിലേക്ക് 2019 ജൂലൈ 20വരെ ലഭിച്ചത് 4106 കോടി രൂപയാണ്. ജൂലൈ 14 വരെ ് 2008.76 കോടി രൂപ ചെലവഴിച്ചു. 457.65 കോടി പ്രളയത്തില്‍പ്പെട്ട 7.37ലക്ഷം പേര്‍ക്ക് അടിയന്തര ധനസഹായമായി നല്‍കി. 2,40000 വീടുകളുടെ പുനര്‍നിര്‍മാണത്തിന് 1318.91 കോടി നല്‍കിയെന്നും വെബ്‌സൈറ്റില്‍ പറയുന്നു. വീടുകളുടെ നിര്‍മാണത്തിന് കെയര്‍ഹോം പദ്ധതി അനുസരിച്ച് 45 കോടിയും കാര്‍ഷിക വായ്പ തിരിച്ചടയ്ക്കാന്‍ 54 കോടിയും നല്‍കി. പ്രളയം രൂക്ഷമായ സന്ദര്‍ഭത്തില്‍ ക്യാമ്പുകളിലും മറ്റിടങ്ങളിലും ഭക്ഷ്യകിറ്റ് നല്‍കാന്‍ ഭക്ഷ്യവകുപ്പ് 54 കോടി രൂപ ചെലവഴിച്ചു. പ്രളയത്തിന് ശേഷം സൗജന്യ റേഷന്‍ വിതരണത്തിനായി 9.4 കോടി രൂപയും വിനിയോഗിച്ചു.

ആദ്യത്തെ പ്രളയത്തില്‍ 15,664 വീടുകള്‍ പൂര്‍ണമായും ഇല്ലാതായി. അതില്‍ 10,840 കുടുംബങ്ങള്‍ സര്‍ക്കാര്‍ ധനസഹായം മൂന്ന് തവണകളായി നേരിട്ട് കൈപ്പറ്റി. 1,990 കുടുംബങ്ങള്‍ സഹകരണവകുപ്പിന്റെ കെയര്‍ ഹോം പദ്ധതിയില്‍ അംഗമായി. അതില്‍ 1662 വീടുകള്‍ നിര്‍മാണം പൂര്‍ത്തിയാക്കി താക്കോല്‍ കൈമാറി. സ്വന്തംപേരില്‍ വസ്തുവില്ലാതെ, പുറമ്പോക്കിലും മറ്റും താമസിച്ചവരില്‍ 889 കുടുംബങ്ങളുടെ വീട് നശിച്ചിരുന്നു. അവര്‍ക്ക് വസ്തു വാങ്ങാനും വീട് വയ്ക്കാനും മുഖ്യമന്ത്രിയുടെ ദുരിതാശ്വാസനിധിയില്‍ നിന്ന് സഹായം നല്‍കി. വീട് ഭാഗാകമായി തകര്‍ന്നവര്‍ക്കും ധനസഹായം നല്‍കി. നിര്‍മാണത്തിന്റെ ഓരോ ഘട്ടവും കണക്കാക്കിയാണ് ഗഡുക്കള്‍ അനുവദിക്കുന്നത്. പ്രകൃതി ദുരന്തങ്ങള്‍ സംഭവിക്കാന്‍ സാധ്യതയുള്ള 337 കുടുംബങ്ങള്‍ക്ക് മറ്റ് സ്ഥലങ്ങളില്‍ ഭൂമി നല്‍കി വീട് വയ്ക്കാന്‍ സഹായം നല്‍കി.

സംസ്ഥാനത്തെ സ്‌കൂളുകളില്‍ സ്ഥാപിച്ച ബോക്‌സുകളിലൂടെ 2.81 കോടിരൂപയാണ് വിദ്യാര്‍ത്ഥികള്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയത്. എന്‍.സി.സി, എന്‍.എസ്.എസ്, എസ്.പി.സി, സ്‌കൗട്ട് ആന്‍ഡ് ഗൈഡ്‌സ് തുടങ്ങിയ വിവിധ സ്‌കൂള്‍ ക്ലബുകള്‍ വഴിയും സംഭാവന നല്‍കിയിട്ടുണ്ട്. സ്‌കൂളുകളില്‍ നിന്ന് പ്രത്യേകം ഫണ്ട് നല്‍കിയതിന് പുറമേയാണിത്. തങ്ങളുടെ സ്വകാര്യ ആവശ്യങ്ങള്‍ക്കും മറ്റും സ്വരുക്കൂട്ടിവെച്ച ചില്ലറ തുട്ടികള്‍ ഉള്‍പ്പെടെ വിദ്യാര്‍ത്ഥികള്‍ ദുരിതാശ്വാസ നിധിയിലേക്ക് സന്തോഷത്തോടെ നല്‍കിയപ്പോള്‍ സമൂഹത്തില്‍ നിലയും വിലയുമുള്ള ചില വ്യക്തിത്വങ്ങള്‍ ചെക്ക് നല്‍കി ഫോട്ടോ എടുത്ത് സോഷ്യല്‍മീഡിയയിലൂടെ പ്രചരിപ്പിച്ച് കയ്യടിനേടി. എന്തെങ്കിലും കാരുണ്യപ്രവര്‍ത്തനങ്ങള്‍ ചെയ്തിട്ട് ലഭിക്കുന്ന പുണ്യം ആ കയ്യടിക്ക് കിട്ടില്ലെന്ന് ഓര്‍മിപ്പിക്കട്ടെ...