സംസ്ഥാനത്തെ ഞെട്ടിച്ച് വീണ്ടും അതിക്രൂരമായ കൊലപാതകം, ആലപ്പുഴ ചെങ്ങന്നൂരിനടുത്ത് കൊഴുവല്ലൂരില് തനിച്ച് താമസിക്കുകയായിരുന്ന വൃദ്ധ ദമ്പതികളെയാണ് കൊലപ്പെടുത്തിയ നിലയില് കണ്ടെത്തിയത്
സംസ്ഥാനത്തെ ഞെട്ടിച്ച് വീണ്ടും അതിക്രൂരമായ കൊലപാതകം. ആലപ്പുഴ ചെങ്ങന്നൂരിനടുത്ത് കൊഴുവല്ലൂരില് തനിച്ച് താമസിക്കുകയായിരുന്ന വൃദ്ധ ദമ്പതികളെയാണ് കൊലപ്പെടുത്തിയ നിലയില് കണ്ടെത്തിയത്. കൊഴുവല്ലൂര് പാറച്ചന്ത ജംഗ്ഷന് അടുത്തുള്ള ആഞ്ഞിലിമൂട്ടില് വീട്ടില് കെ.പി.ചെറിയാന് എന്ന കുഞ്ഞുമോന് (75), ഭാര്യ ലില്ലി (70) എന്നിവരെയാണ് കൊല്ലപ്പെട്ട നിലയില് ഇന്ന് രാവിലെ കണ്ടെത്തിയത്. മണ്വെട്ടിയും കമ്പിപ്പാരയും ഉപയോഗിച്ച് തലയ്ക്കടിച്ചാണ് കൊലപ്പെടുത്തിയതെന്ന് നാട്ടുകാര് പറയുന്നു. കൊല്ലപ്പെട്ട ദമ്പതികളുടെ മക്കള് വിദേശത്താണ്. ഇന്നലെ പറമ്പില് പുല്ല് ചെത്താന് ബംഗ്ലാദേശികളായ രണ്ട് കുടിയേറ്റ തൊഴിലാളികള് എത്തിയിരുന്നു. അവരെ കേന്ദ്രീകരിച്ച് അന്വേഷണം നടക്കുകയാണെന്ന് പൊലീസ് അറിയിച്ചു.
ഇന്നലെ രാത്രി വീട്ടില് ലൈറ്റ് കാണാത്തതിനെ തുടര്ന്ന് അയല്വാസികള് ഇന്ന് രാവിലെ എത്തിയപ്പോള് പാല് കൊണ്ടുവന്ന കുപ്പി വതില്ക്കല് ഇരിക്കുന്നത് കണ്ടു. തുടര്ന്ന് ഇവരും അടുത്ത ബന്ധുവുമായ എം.എം ചാണ്ടിയും നടത്തിയ പരിശോധനയിലാണ് കൊലപാതകം നടന്ന വിവരം നാട്ടുകാര് അറിഞ്ഞത്. ലില്ലിയെ വീട്ടിനുള്ളിലും ചെറിയാനെ ഔട്ട് ഹൗസിലുമാണ് കൊല്ലപ്പെട്ടനിലയില് കണ്ടെത്തിയത്. പക്ഷാഘാതം വന്നതിനെ തുടര്ന്ന് ഒരു വശം തളര്ന്ന കുഞ്ഞുമോന് രോഗം ഭേദമായിവരുകയായിരുന്നു. അതോടെ രാവിലെ നടക്കാന് പോകുമായിരുന്നു. ഇന്ന് രാവിലെ കുഞ്ഞുമോന് നടക്കാന് ഇറങ്ങിയുമില്ല. അതോടെയാണ് കൂടുതല് സംശയം തോന്നിയത്.
രാത്രി മുറ്റത്തും മറിയ്ക്കകത്തും ലൈറ്റിടാതിരുന്നത് ശ്രദ്ധിച്ചിരുന്നെങ്കിലും ഇരുവരും നേരത്തെ ഉറങ്ങിയതാകാമെന്ന് കരുതിയെന്ന് ചാണ്ടി പറഞ്ഞു. വീടിന് പുറകുവശത്ത് അടുക്കളവാതില് തുറന്ന നിലയിലായിരുന്നു. അതുവഴി വീടിനകത്ത് കയറി നോക്കിയപ്പോഴാണ് ലില്ലിയുടെ മൃതദേഹം ചോരയില് കുളിച്ച് കിടക്കുന്നത് കണ്ടത്. മൃതദേഹത്തില് മണ്വെട്ടിയുടെ ഭാഗങ്ങള് ഒടിഞ്ഞനിലയില് ഉണ്ടായിരുന്നു. അതോടെ ചാണ്ടി വെണ്മണി പൊലീസിനെ വിവരം അറിയിച്ചു. അവരെത്തി ഔട്ട്ഹൗസ് പരിശോധിച്ചപ്പോഴാണ് കുഞ്ഞമോനെയും കൊല്ലപ്പെട്ട നിലയില് കണ്ടെത്തിയത്. കുഞ്ഞുമോന്റെ തലയ്ക്ക് കമ്പി വടികൊണ്ട് അടിച്ചാണ് കൊലപ്പെടുത്തിയതെന്ന് മനസ്സിലാക്കുന്നു. മൃതദേഹത്തിന് അടുത്ത് നിന്ന് കമ്പി വടി കണ്ടെടുത്തിട്ടുണ്ട്.
പൊലീസും വിരലടയാള വിദഗ്ദ്ധരും ഫോറന്സിക് സംഘവും സ്ഥലത്തെത്തി പരിശോധന നടത്തി. എസ്.പി കെ.എം.ടോമി, ഡിവൈ.എസ്.പിമാരായ അനീഷ്.വി.കോര, ആര്.ബിനു, ചെങ്ങന്നൂര് സി.ഐ എം.ഷിബുലാല് എന്നിവര് കൊലപാതകം നടന്ന വീട്ടിലെത്തി പരിശോധന നടത്തി. വീട്ടില് നിന്ന് പണമോ, ആഭരണങ്ങളോ മറ്റ് വിലപിടിപ്പുള്ള വസ്തുക്കളോ നഷ്ടപ്പെട്ടോ എന്ന് പരിശോധിച്ചുവരുകയാണ്. ജോലിക്കെത്തിയ ബംഗ്ലാദേശികളുടെ പണിസാധനങ്ങള് വീടിന് പിന്നില് നിന്ന് കണ്ടെത്തി. ഇവരെ കേന്ദ്രീകരിച്ചാണ് അന്വേഷണം നടക്കുന്നത്. ഇവര് ഇന്ന് പണിക്കെത്തിയിട്ടില്ല. എവിടെയാണ് ഇവര് താമസിക്കുന്നതെന്ന് കണ്ടെത്തിയിട്ടുണ്ട്. ബിഭു ചെറിയാന്, ബിന്ദു, പരേതയായ ബീന എന്നിവരാണ് കൊല്ലപ്പെട്ട ദമ്പതികളുടെ മക്കള്. മരുമക്കള്: ഷൈനി, രഞ്ജു.
https://www.facebook.com/Malayalivartha