സി.പി.എം ഭരിക്കുന്ന സര്വ്വകലാശാല സിന്ഡിക്കേറ്റുകളിലെ ക്രമക്കേടുകളും അഴിമതികളും പൊളിച്ചടുക്കി നേര്വഴിയിലാക്കാനും വിദ്യാര്ത്ഥി സംഘടനകളുടെ ട്രേഡ് യൂണിയന് പ്രവര്ത്തനങ്ങള് അവസാനിപ്പിക്കാനും ഗവര്ണര് ആരിഫ് മുഹമ്മദ് ഖാന്
സി.പി.എം ഭരിക്കുന്ന സര്വ്വകലാശാല സിന്ഡിക്കേറ്റുകളിലെ ക്രമക്കേടുകളും അഴിമതികളും പൊളിച്ചടുക്കി നേര്വഴിയിലാക്കാനും വിദ്യാര്ത്ഥി സംഘടനകളുടെ ട്രേഡ് യൂണിയന് പ്രവര്ത്തനങ്ങള് അവസാനിപ്പിക്കാനും ഗവര്ണര് ആരിഫ് മുഹമ്മദ് ഖാന് അരയും തലയും മുറുക്കി രംഗത്ത്. എം.ജി സര്വ്വകലാശാലയില് അപ്രതീക്ഷിത സന്ദര്ശനം നടത്തിയാണ് യൂണിവേഴ്സിറ്റി ചാന്സലര് കൂടിയായ ഗവര്ണര് ആദ്യ വെടിപൊട്ടിച്ചത്. ഇതോടെ കേരള, കണ്ണൂര്, കാലിക്കട്ട് സര്വ്വകലാശാല സിന്ഡിക്കേറ്റ് അംഗങ്ങള് ആശങ്കയിലാണ്. എം.ജിയില് മാര്ക്ക് ദാനത്തിന് ഉള്പ്പെടെ നടത്തിയ അദാലത്ത് നടപടികള് തെറ്റാണെന്ന് ഗവര്ണര് തുറന്നടിച്ചതോടെ ഉന്നതവിദ്യാഭ്യാസമന്ത്രി കെ.ടി ജലീലും വെട്ടിലായി. ഗവര്ണര് രാഷ്ട്രീയം കളിക്കുന്നു എന്നല്ലാതെ ഉന്നയിച്ച കാര്യങ്ങള്ക്ക് വ്യക്തമായ മറുപടി നല്കാന് സി.പി.എം തയ്യാറായിട്ടില്ല.
ഗവര്ണര്ക്ക് ഉന്നതവിദ്യാഭ്യാസ രംഗത്തെ വിദഗ്ധരുടെ പിന്തുണയുണ്ടെന്നും വ്യക്തമായി. സംസ്ഥാന സര്ക്കാരിന് യൂണിവേഴ്സിറ്റികള്ക്ക് നിര്ദേശങ്ങള് നല്കാന് അധികാരമില്ലെന്ന് ഉന്നത വിദ്യാഭ്യാസ കൗണ്സില് അധ്യക്ഷന് ഡോ. രാജന് ഗുരുക്കള് തന്നോട് പറഞ്ഞെന്ന് ഗവര്ണര് മാധ്യമങ്ങളോട് പ്രതികരിച്ചത് അതുകൊണ്ടാണ്. സര്ക്കാരോ ഉന്നതവിദ്യാഭ്യാസ മന്ത്രിയോ സര്വ്വകലാശാലയ്ക്കോ, സിന്ഡിക്കേറ്റിനോ നല്കുന്ന നിര്ദ്ദേശങ്ങള്ക്ക് ഭരണഘടനാപരമായി നിലനില്പ്പില്ല. സര്ക്കാരില് നിന്നോ മന്ത്രിയില് നിന്നോ എന്തൊക്കെ സമ്മര്ദ്ദങ്ങളുണ്ടായാലും നിയമവിരുദ്ധമായി ഒന്നും ചെയ്യരുതെന്നും പ്രശ്നങ്ങള് സങ്കീര്ണമാണെങ്കില് തന്നെ അറിയിക്കണമെന്നും എം.ജി യൂണിവേഴ്സിറ്റി വൈസ് ചാന്സലര് ഡോ. ബാബു തോമസിന് നിര്ദ്ദേശം നല്കി.
പരീക്ഷകളും ഫലങ്ങളും അതത് സമയത്ത് നടത്തുകയും സര്ട്ടിഫിക്കറ്റുകള് കൃത്യസമയത്ത് വിതരണം നടത്തുകയും ചെയ്യുന്നതില് എം.ജി സര്വ്വകലാശാലയ്ക്ക് വീഴ്ച പറ്റിയെന്നും ഗവര്ണര് വ്യക്തമാക്കി. സര്വ്വകലാശാല സിന്ഡിക്കേറ്റും യൂണിയന്ഭരിക്കുന്ന വിദ്യാര്ത്ഥി സംഘടനകളും നടത്തുന്ന ക്രമക്കേടുകളും മറ്റും ഇനി നടത്താന് അനുവദിക്കില്ലെന്ന ശക്തമായ സൂചനയാണ് ഗവര്ണര് നല്കിയിരിക്കുന്നത്. പല കോളജുകളിലും എ.ബി.വി.പി അടക്കമുള്ള വിദ്യാര്ത്ഥിപ്രസ്ഥാനങ്ങള്ക്ക് പ്രവര്ത്തിക്കാന് സ്വാതന്ത്ര്യമില്ലെന്നും എസ്.എഫ്.ഐയുടെ ഏകാധിപത്യമാണ് ഭൂരിപക്ഷം കോളജുകളിലും നടക്കുന്നതെന്നും വ്യാപകപരാതിയുണ്ട്. ഇക്കാര്യങ്ങള് ബി.ജെ.പി നേതാക്കള് ഗവര്ണറെ ധരിപ്പിച്ചിട്ടുണ്ട്. മുന് ഗവര്ണര് ജസ്റ്റിസ് പി.സദാശിവത്തെ ഇക്കാര്യങ്ങള് ബി.ജെ.പി നേതാക്കള് നേരിട്ട്് അറിയിക്കുകയും പരാതി നല്കുകയും ചെയ്തിട്ട് യാതൊരു നടപടിയും എടുത്തിരുന്നില്ല.
എംജിയിലെ പ്രശ്നങ്ങളുടെ കാരണം ഭരണസംവിധാനത്തിലെ പിഴവാണെന്ന് ഗവര്ണര് തുറന്നടിച്ചത് വൈസ്ചാന്സലര്ക്ക് വലിയ നാണക്കേടാണ് ഉണ്ടാക്കിയിരിക്കുന്നത്. ക്രീയാത്മക വിമര്ശനങ്ങളാണ് ഗവര്ണര്ണര് നടത്തിയതെന്നും സംസ്ഥാനത്തെ യൂണിവേഴ്സിറ്റികളുടെ പ്രവര്ത്തനം കൂടുതല് കാര്യക്ഷമമാക്കാന് ടാസ്ക് ഫോഴ്സ് രൂപീകരിക്കും. പരീക്ഷാ നടത്തിപ്പ് ഉള്പ്പെടെയുള്ള കാര്യങ്ങള് കാര്യക്ഷമമാക്കാന് അധ്യാപകരുടെ നിര്ദേശങ്ങള് സമര്പ്പിക്കാന് ഗവര്ണര് ആവശ്യപ്പെട്ടിട്ടുണ്ട്. അങ്ങനെ എല്ലാ തരത്തിലും അടിമുടിമാറ്റമാണ് ഗവര്ണര് ലക്ഷ്യമിടുന്നത്. ഇത് സര്ക്കാരിനെയും സി.പി.എമ്മിനെയും മാത്രമല്ല കോണ്ഗ്രസിനെയും ആശങ്കയിലാഴ്ത്തുന്നുണ്ട്. വര്ഷങ്ങളായി ഇവരുടെ നിയന്ത്രണത്തിലാണ് സംസ്ഥാനത്തെ സര്വ്വകലാശാലകള്.
https://www.facebook.com/Malayalivartha
