കൂടത്തായി കൊലപാതക പരമ്പര... കൂടത്തായി സംഭവം സിനിമയും സീരിയലുമാക്കുന്നതിനെതിരെ കേസില്‍ സീരിയലിന്റെ സംപ്രേക്ഷണത്തിന് സ്‌റ്റേ
കൂടത്തായി കൊലപാതക പരമ്പര സിനിമയും സീരിയലുമാക്കുന്നതിനെതിരെ കേസിലെ സാക്ഷി സമര്‍പ്പിച്ച ഹര്‍ജിയിലാണ് കോടതി ഉത്തരവ്. കൊലപാതകം പശ്ചാത്തലമാക്കി ടി.വി സീരിയല്‍ സംപ്രേക്ഷണം ചെയ്യുന്നത് ഹൈകോടതി സ്‌റ്റേ ചെയ്തിരിക്കുകയാണ്. രണ്ടാഴ്ചത്തേക്കാണ് സീരിയല്‍ സ്‌റ്റേ ചെയ്തത്. കൂടത്തായിയില്‍ ജോളിയെന്ന യുവതി ഭര്‍ത്താവിനെയും ബന്ധുക്കളെയും വിഷം നല്‍കി കൊലപ്പെടുത്തിയ സംഭവത്തെ തുടര്‍ന്ന് കോടഞ്ചേരി പൊലീസ് രജിസ്റ്റര്‍ ചെയ്ത കേസിലെ മുഖ്യ സാക്ഷിയും കൂടത്തായി സ്വദേശിയുമായ ബാവ എന്ന മുഹമ്മദാണ് ഹര്‍ജി നല്‍കിയത്.കൊലപാതക പരമ്ബര ആസ്പദമാക്കി സീരിയല്‍ പ്രദര്‍ശിപ്പിക്കാന്‍ തുടങ്ങിയെന്നും ഇതേ വിഷയത്തില്‍ രണ്ട് സിനിമകള്‍ കൂടി ഒരുങ്ങുന്നുണ്ടെന്നും അന്വേഷണത്തെ ബാധിക്കുന്ന തരത്തില്‍ സീരിയല്‍ സംപ്രേഷണം ചെയ്യുന്നത് കോടതിയലക്ഷ്യമാണെന്നും ബാവ ഹരജിയില്‍ ചൂണ്ടിക്കാട്ടി. ഇപ്പോള്‍ ഇത്തരത്തില്‍ സീരിയല്‍ സംപ്രേക്ഷണം ചെയ്യുന്നത് കേസിലെ സാക്ഷികളായ തനിക്കും തന്റെ മാതാവിനും ബുദ്ധിമുട്ട് സൃഷ്ടിക്കുന്നു. കേസിലെ മറ്റ് സാക്ഷികളില്‍ പല രീതിയിലും സീരിയല്‍ സ്വാധീനം ചെലുത്തിയേക്കുമെന്നും കേസുമായി ബന്ധപ്പെട്ട അന്വേഷണം ശരിയാംവിധം നടക്കുന്നതില്‍ സീരിയല്‍ ദോഷകരമായി ബാധിക്കുമെന്നും ഹര്‍ജിക്കാരന്‍ ആരോപിച്ചു. പ്രോസിക്യൂഷനും കോടതിയില്‍ ഇതേ നിലപാട് തന്നെയാണ് സ്വീകരിച്ചത്. മൂന്ന് കേസില്‍ ഇനിയും അന്വേഷണം പൂര്‍ത്തീകരിക്കാനുണ്ട്. കേസുകളില്‍ പലതിലും അന്വേഷണം നടന്നുകൊണ്ടിരിക്കുകയാണ്. പ്രോസിക്യൂഷന്‍േറയും പ്രതികളുടേയും അവകാശങ്ങളെ ഹനിക്കുന്ന തരത്തിലാണ് സീരിയലിന്റെ സംപ്രേക്ഷണമെന്നും സീരിയലിന് യാഥാര്‍ഥ്യവുമായി ബന്ധമില്ലെന്നും പ്രോസിക്യൂഷന്‍ കോടതിയെ അറിയിച്ചു. തുടര്‍ന്നാണ് കോടതി സീരിയല്‍ സംപ്രേക്ഷണം ചെയ്യുന്നതിന് സ്‌റ്റേ ചെയ്തത്. സംസ്ഥാന സര്‍ക്കാര്‍, ഡി.ജി.പി, ഫ്‌ലവേഴ്‌സ് ടി.വി, ചലച്ചിത്ര നിര്‍മാതാക്കളായ ആന്റണി പെരുമ്പാവൂര്‍, ഡിനി ഡാനിയല്‍ തുടങ്ങിയവര്‍ക്കെതിരെയാണ് ഹര്‍ജി നല്‍കിയിട്ടുള്ളത്.
https://www.facebook.com/Malayalivartha
