രാജ്യത്ത് കൊറോണ ഏറ്റവും അപകടകരമായി മാറിയ ഇടങ്ങളിലൊന്നായ കാസര്‍കോട് ജില്ലയിലെ ആറ് പ്രദേശങ്ങള്‍ പൂര്‍ണമായും പൊലീസ് നിയന്ത്രണത്തിലാക്കി. ഈ പ്രദേശങ്ങളില്‍ ഒരു കാരണവശാലും ജനങ്ങളെ പുറത്തിറങ്ങാന്‍ അനുവദിക്കില്ല. പളളിക്കര, ഉദുമ, ചെമ്മനാട്, മധുര്‍, മെഗ്രാല്‍പുത്തൂര്‍ പഞ്ചായത്തുകളിലെയും കാസര്‍കോട് നഗരസഭയിലെയും പ്രദേശങ്ങളാണ് പ്രത്യേക നിരീക്ഷണത്തിലാക്കിയത്. ഈ പ്രദേശങ്ങളില്‍ ഉളളവര്‍ക്ക് അവശ്യസാധനങ്ങള്‍ പൊലീസ് വാങ്ങി എത്തിച്ച് നല്‍കുമെന്ന് ഐജി വിജയ് സാഖറെ വ്യക്തമാക്കി.

കനത്ത പൊലീസ് ബന്തവസ് ഉണ്ടാകും. ജനങ്ങള്‍ക്ക് അവശ്യസാധനങ്ങള്‍ വാങ്ങാന്‍ 94 97 93 57 80 എന്ന വാട്‌സാപ്പ് നമ്പറിലേക്ക് സന്ദേശമയച്ചാല്‍ മതി. പേരും ഫോണ്‍ നമ്പറും ആവശ്യമായ സാധനങ്ങളുടെ ലിസ്റ്റുമാണ് അയക്കേണ്ടത്. വീട്ടില്‍ നിന്ന് സാധനങ്ങള്‍ വാങ്ങാനെന്ന വ്യാജേന ഒന്നിലധികം ആളുകള്‍ ഒരു വീട്ടില്‍ നിന്ന് പോകുന്നത് ശ്രദ്ധയില്‍ പെട്ടിട്ടുണ്ടെന്നും ഇനി അത് അനുവദിക്കില്ലെന്നും വിജയ് സാഖറെ പറഞ്ഞു. കാറില്‍ ഡ്രൈവര്‍ കൂടാതെ ഒരാളെ മാത്രമേ അനുവദിക്കൂ. ഇരുചക്രവാഹനങ്ങളില്‍ ഒരാള്‍ മാത്രമേ പാടുളളൂ, നിര്‍ദേശങ്ങള്‍ ലംഘിക്കുന്നവരുടെ വാഹനം പിടിച്ചെടുക്കുമെന്നും പൊലീസ് അറിയിച്ചു.

അതിനിടെ, കേരളത്തില്‍ വീണ്ടും കൊവിഡ് മരണം റി്പ്പോര്‍ട്ട് ചെയ്തു. തിരുവനന്തപുരം പോത്തന്‍കോട് സ്വദേശി അബ്ദുല്‍ അസീസ് ആണ് മരിച്ചത്. 68 വയസായിരുന്നു. ഇദ്ദേഹത്തിന് രോഗം വന്നതെങ്ങനെയെന്ന് കണ്ടെത്താന്‍ ആരോഗ്യ വിഭാഗത്തിന് സാധിച്ചിട്ടില്ല. എവിടെ നിന്നാാണ് രോഗത്തിന്റെ ഉറവിടമെന്ന് കണ്ടെത്താനുള്ള അന്വേഷണം പുരോഗമിക്കുന്നതിനിടെയാണ് അബ്ദുല്‍ അസീസ് മരണത്തിന് കീഴടങ്ങിയത്. അതേസമയം, കേരളത്തില്‍ ഇന്നലെ വൈകിട്ട് വരെ 234 പേര്‍ക്കാണ് കൊറോണ വൈറസ് സ്ഥിരീകരിച്ചത്. ഇതില്‍ 20 പേര്‍ക്ക് രോഗം ഭേദമായി. കാസര്‍കോട് ജില്ലയില്‍ മാത്രം 107 പേര്‍ക്കാണ് കൊവിഡ് 19 രോഗമുണ്ടെന്ന് കണ്ടെത്തിയത്. നിലവില്‍ ഒരാള്‍ക്കാണ് ഇവിടെ രോഗം ഭേദമായത്. കണ്ണൂരാണ് തൊട്ട് പിന്നിലുളളത്. 43 പേരാണ് കണ്ണൂരിലെ രോഗബാധിതര്‍.

അതിനിടെ, രാജ്യത്തെ പത്ത് ഇടങ്ങള്‍ കൊവിഡ്-19 രോഗത്തിന്റെ പ്രഭവകേന്ദ്രങ്ങളാണെന്ന് ആരോഗ്യവിഭാഗം കണ്ടെത്തി. കേരളത്തിലെ രണ്ട് ജില്ലകളും പട്ടികയില്‍ ഉള്‍പ്പെട്ടിട്ടുണ്ട്. ഡല്‍ഹിയിലെ നിസാമുദിന്‍, ദില്‍ഷാദ് ഗാര്‍ഡന്‍, ഉത്തര്‍ പ്രദേശിലെ നോയിഡ, മീററ്റ്, രാജസ്ഥാനിലെ ഭില്‍വാര, ഗുജറാത്തിലെ അഹമ്മദാബാദ്, മഹാരാഷ്ട്രയിലെ മുംബൈ, പൂനെ, കേരളത്തിലെ കാസര്‍ഗോഡ്, പത്തനംതിട്ട എന്നീ പ്രദേശങ്ങളാണ് രാജ്യത്തെ പത്ത് കൊവിഡ് ഹോട്ട്‌സ്‌പോട്ടുകളായി കണ്ടെത്തിയിരിക്കുന്നത്. ഈ പ്രദേശങ്ങളിലാണ് ഏറ്റവും കൂടുതല്‍ കൊറോണ പോസിറ്റീവ് കേസുകള്‍ റിപ്പോര്‍ട്ട് ചെയ്തിരിക്കുന്നത്.

അതേസമയം, രാജ്യത്ത് കൊവിഡ് 19 സ്ഥിരീകരിച്ചവരുടെ എണ്ണം 1200 കടന്നിരിക്കുകയാണ്. 1,117 പേര്‍ ചികിത്സയില്‍ ഉള്ളതായി ആരോഗ്യ മന്ത്രാലയം വ്യക്തമാക്കി. കേരളത്തില്‍ ഇന്ന് ഒരു മരണം കൂടി റിപ്പോര്‍ട്ട് ചെയ്തതോടെ രാജ്യത്ത് കൊവിഡ് ബാധിച്ച് ആകെ മരിച്ചവരുടെ എണ്ണം 33 ആയി ഉയര്‍ന്നു.