മലപ്പുറം ജില്ലയില്‍ 858 പേരെ കൂടി ഇന്നലെ കോവിഡ്-19 പ്രത്യേക നിരീക്ഷണത്തില്‍ ഏര്‍പ്പെടുത്തി. ഇതോടെ ജില്ലയില്‍ നിരീക്ഷണത്തില്‍ കഴിന്നവരുടെ എണ്ണം 14500 കവിഞ്ഞു. ജില്ലയില്‍ ഇന്നലെ പുതിയ കേസ് ഒന്നും റിപ്പോര്‍ട്ട് ചെയ്തില്ല. വരും ദിവസങ്ങളില്‍ ജില്ലയില്‍ പ്രതിരോധ പ്രവര്‍ത്തനങ്ങള്‍ കൂടുതല്‍ ഊര്‍ജിതമാക്കാന്‍ ആണ് ജില്ലാ ഭരണകൂടത്തിന്റെ തീരുമാനം.

കോവിഡ് 19 വ്യാപനം തടയുന്നതിന്റെ ഭാഗമായി മലപ്പുറം ജില്ലയില്‍ ഇന്നലെ 858 പേര്‍ക്കുകൂടി പ്രത്യേക നിരീക്ഷണം ഏര്‍പ്പെടുത്തിയതായി ജില്ലാ കലക്ടര്‍ ജാഫര്‍ മലിക് കോവിഡ് പ്രതിരോധ മുഖ്യ സമിതി അവലോകന യോഗത്തില്‍ അറിയിച്ചു. ഇതോടെ ജില്ലയില്‍ നിരീക്ഷണത്തിലുള്ളവരുടെ എണ്ണം 14,794 ആയി. ഇതില്‍ 100 പേര്‍ വിവിധ ആശുപത്രികളിലും 21 പേര്‍ കോവിഡ് കെയര്‍ സെന്ററുകളിലും നിരീക്ഷണത്തില്‍ കഴിയുന്നു. ബാക്കിയുള്ള ആളുകള്‍ വീടുകളില്‍ സ്വയം നിരീക്ഷണത്തിലുമാണ് കഴിയുന്നത്.

രോഗം ബാധിച്ച് ജില്ലയില്‍ മഞ്ചേരി മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന 12 പേരുടേയും ആരോഗ്യ നില തൃപ്തികരമാണെന്നും 624 പേര്‍ക്കാണ് ഇതുവരെ വൈറസ് ബാധയില്ലെന്ന് സ്ഥിരീകരിച്ചതെന്നും ജില്ലാ മെഡിക്കല്‍ ഓഫീസര്‍ അറിയിച്ചു.

ജില്ലയില്‍ ഇന്നലെ ആരോഗ്യ ജാഗ്രത ലംഘിച്ചതിന് തിരൂര്‍ ജില്ലാ ആശുപത്രിയിലെ അസിസ്റ്റന്റ് സര്‍ജന്‍ അലി അഷ്‌റഫിനെ ജില്ലാ മെഡിക്കല്‍ ഓഫീസര്‍ സസ്‌പെന്‍ഡ് ചെയ്തു. ഡോക്ടര്‍, നിരോധനാജ്ഞ ലംഘിച്ച് 19 ആളുകളുമായി കൂട്ടപ്രാര്‍ത്ഥനയും നമസ്‌കാരവും നടത്തിയതിനാണ് ഇയാള്‍ക്കെതിരെ നടപടി.

ജില്ലയില്‍ ഇന്നലെ പോലീസ് 127 കേസുകളായി 131 പേരെ പോലീസ് അറസ്റ്റ് ചെയ്തു 70 വാഹനങ്ങളും പിടിച്ചെടുത്തിട്ടുണ്ട് ഇതോടെ നിരോധനാജ്ഞ ലംഘിച്ച് ഇതുവരെ പോലീസ് രജിസ്റ്റര്‍ ചെയ്ത കേസുകളുടെ എണ്ണം 700 കവിഞ്ഞു. വരുംദിവസങ്ങളില്‍ പരിശോധന കൂടുതല്‍ ശക്തമാക്കാനാണ് പോലീസിന്റെ തീരുമാനം.