സിപിഎമ്മിന്റെ പാര്‍ട്ടികോണ്‍ഗ്രസിന് മുന്നോടിയായുള്ള നിര്‍ണായ പിബിയോഗം ഇന്ന്. വിഎസ് പിബിയ്ക്ക് നല്‍കിയ കത്തുകള്‍ ഇന്ന് പരിഗണിക്കാന്‍ സാധ്യതയില്ലെന്ന് ബിബി അംഗം എസ് രാമചന്ദ്രന്‍പിള്ള പറഞ്ഞു. എന്നാല്‍ താന്‍ ഉന്നയിച്ച ആവശ്യങ്ങള്‍ ചര്‍ച്ചചെയ്യണമെന്ന് കാട്ടി വിഎസ് വീണ്ടും പിബിയ്ക്ക് കത്തയച്ചു.
വി.എസ്. അച്യുതാനന്ദന്‍ കത്തുകളിലൂടെയും അല്ലാതെയും ഉന്നയിച്ചിട്ടുള്ള വിഷയങ്ങളും അതിന്മേലുള്ള പിണറായി പക്ഷത്തിന്റെ വാദങ്ങളും പാര്‍ട്ടി കോണ്‍ഗ്രസിനു മുന്‍പ് പരിഗണിക്കേണ്ടതുണ്ടോ എന്ന് സിപിഎം പിബി ഇന്നു ചര്‍ച്ച ചെയ്‌തേക്കും. പാര്‍ട്ടി കേന്ദ്ര കമ്മിറ്റി നാളെയും മറ്റന്നാളും ചേരും. ഇതില്‍ വിഎസ് പങ്കെടുക്കുന്നുണ്ട്.
വിശാഖപട്ടണത്ത് ഏപ്രിലില്‍ നടക്കുന്ന പാര്‍ട്ടി കോണ്‍ഗ്രസില്‍ അവതരിപ്പിക്കാനുള്ള കരട് രാഷ്ട്രീയ സംഘടനാ റിപ്പോര്‍ട്ടിന് അന്തിമരൂപം നല്‍കുകയെന്നതാണ് സിസിയുടെ പ്രധാന അജന്‍ഡ. പാര്‍ട്ടി തകര്‍ന്നടിഞ്ഞതിന്റെ കാരണങ്ങള്‍ അന്വേഷിക്കുന്നതിന്റെ ഭാഗമായി കഴിഞ്ഞ ഏതാനും മാസങ്ങളില്‍ വിവിധ പഠനങ്ങള്‍ നടത്തിയിരുന്നു. അതില്‍ കാര്‍ഷികമേഖല, നഗരമേഖല-മധ്യവര്‍ഗം, വ്യവസായ മേഖല-തൊഴിലാളി പ്രശ്‌നങ്ങള്‍ എന്നിവ സംബന്ധിച്ച് പാര്‍ട്ടിയിലെ വിദഗ്ധര്‍ നടത്തിയ പഠനത്തിന്റെ റിപ്പോര്‍ട്ട് പിബിയും സിസിയും പരിഗണിക്കുന്നുണ്ട്. ഈ റിപ്പോര്‍ട്ടിലെ ഏതൊക്കെ ശുപാര്‍ശകള്‍ രാഷ്ട്രീയ സംഘടനാ റിപ്പോര്‍ട്ടില്‍ ഉള്‍പ്പെടുത്തണമെന്ന് ആലോചിക്കുന്നതിനായാണിത്.
കാര്‍ഷികമേഖലയിലെ പുതിയ മാറ്റങ്ങളെ വേണ്ട തരത്തില്‍ പാര്‍ട്ടിക്ക് ഉള്‍ക്കൊള്ളാനായിട്ടില്ല എന്നാണ് വിലയിരുത്തല്‍. നഗരമേഖലകളില്‍ തെല്ലും സ്വാധീനം ഉണ്ടാക്കാന്‍ പാര്‍ട്ടിക്ക് സാധിച്ചിട്ടില്ല. വ്യവസായ രംഗത്ത് അസംഘടിതമേഖലയുടെ പങ്കാളിത്തം വലിയ തോതില്‍ വര്‍ധിച്ചെങ്കിലും തൊഴിലാളി യൂണിയന്‍ ഉള്‍പ്പെടെയുള്ളവയ്ക്ക് അതിനൊത്ത് ഉയരാന്‍ സാധിച്ചിട്ടില്ല. മധ്യവര്‍ഗത്തിലെ മേല്‍ത്തട്ടുകാര്‍ എക്കാലത്തും പാര്‍ട്ടിവിരുദ്ധരാണ്.
എന്നാല്‍ മധ്യവര്‍ഗത്തിലെ ഇടത്തരക്കാരുടെയും താഴെത്തട്ടിലുള്ളവരുടെയും പൂര്‍ണപിന്തുണ നേടാന്‍ പാര്‍ട്ടിക്കു സാധിക്കുന്നില്ല. ഈ തിരിച്ചറിവുകളുടെ അടിസ്ഥാനത്തില്‍ പുതിയ മുദ്രാവാക്യങ്ങള്‍ക്കും പ്രക്ഷോഭങ്ങള്‍ക്കും രൂപം കൊടുക്കാനാണ് പാര്‍ട്ടി താല്‍പര്യപ്പെടുന്നത്.
പുതിയ ജനറല്‍ സെക്രട്ടറിയെ സംബന്ധിച്ച് പാര്‍ട്ടിക്കു പുറത്തു ചര്‍ച്ച സജീവമാണെങ്കിലും പിബിയിലും സിസിയിലും അത് ഇനിയും ചര്‍ച്ചയായിട്ടില്ലെന്നാണ് പാര്‍ട്ടി വൃത്തങ്ങള്‍ പറയുന്നത്.
കേരളത്തിലെ സംസ്ഥാന സമ്മേളനത്തില്‍ അവതരിപ്പിച്ച റിപ്പോര്‍ട്ടിലെ ചില ഭാഗങ്ങളെക്കുറിച്ചുള്ള വിയോജിപ്പുകള്‍ സംബന്ധിച്ച കത്തും, ആ കത്ത് ചോര്‍ന്നതിനു പിന്നാലെ പാര്‍ട്ടി സംസ്ഥാന ഘടകം നടത്തിയ പ്രസ്താവനയെ ചോദ്യം ചെയ്തുള്ള കത്തുമാണ് വിഎസിന്റേതായി സിസിക്കു മുന്നിലുള്ളത്. ആലപ്പുഴ സമ്മേളനത്തില്‍ നിന്ന് ഇറങ്ങിപ്പോയെങ്കിലും നാളത്തെ സിസിക്ക് വിഎസ് എത്തുമെന്ന് ഉറപ്പുണ്ടെന്ന് നേതാക്കള്‍ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha