ഹാരിസണിനെ പൂട്ടാന് ഉറച്ച് രാജമാണിക്യം; കോടതി തീരുമാനിച്ചാല് മുപ്പത്തിഎണ്ണായിരത്തോളം ഏക്കര് വരുന്ന ഭൂമി സര്ക്കാരിലേക്ക്
പഴുതുകള് എല്ലാം അടച്ച് ഹാരിസണെ പൂട്ടാന് രാജമാണിക്യം രംഗത്ത്. കേരളം ഞെട്ടും വിധമുള്ള ഭുമി കുംഭകോണം നടന്നിട്ടും ചെറുവില് അനക്കാതെ രാഷ്ട്രീയക്കാര്. ഹാരിസണ്സ് മലയാളം കമ്പനി അനധികൃതമായി വിറ്റ തോട്ടങ്ങള് തിരിച്ചുപിടിക്കുന്നതിന് സര്ക്കാര് നടപടി തുടങ്ങി. ഇതിന്റെ ഭാഗമായി, ഭൂമി വാങ്ങിയ വന്കിട കമ്പനികളും ട്രസ്റ്റുകളും കൈവശ ഭൂമി ഒഴിയണമെന്നുകാട്ടി സര്ക്കാര് നോട്ടീസ് അയച്ചു. ഇടുക്കി ജില്ലയിലെ ബോയ്സ്, ഗൂഡമ്പാറ എസ്റ്റേറ്റുകളും പത്തനംതിട്ട, കോട്ടയം ജില്ലയിലെ തോട്ടങ്ങളും കൊല്ലം ജില്ലയിലെ അമ്പനാട്, റിയ, കുളിര്കാട് എസ്റ്റേറ്റുകളും ഒഴിയാനാണ് നോട്ടീസ്
ഹാരിസണ്സ് വിറ്റ ബോയ്സ് എസ്റ്റേറ്റ്1665 ഏക്കര്, കോട്ടയം, പത്തനംതിട്ട ജില്ലകളിലെ തോട്ടങ്ങള്2263 ഏക്കര്, കൊല്ലം ജില്ലയിലെ അമ്പനാട് എസ്റ്റേറ്റ്2700 ഏക്കര്, റിയ എസ്റ്റേറ്റ്207 ഏക്കര് എന്നിവ ഉള്പ്പെടെ 6808 ഏക്കര് തോട്ടങ്ങള് ഹൈക്കോടതി അനുമതികൂടി ലഭിച്ചുകഴിഞ്ഞാല് സര്ക്കാര് ഏറ്റെടുക്കും. ഹാരിസണ്സിന്റെ പൂര്വ കമ്പനിയായ മലയാളം പ്ലാന്റേഷന്സ് കൈവശം വച്ചിരുന്ന ഗൂഡമ്പാറ607 ഏക്കര്, കുളിര്കാട്707 ഏക്കര് എന്നിവ കൈയേറിയ കമ്പനികളോടും സ്ഥാപനങ്ങളോടും ഭൂമി വിട്ടുനല്കണമെന്നാവശ്യപ്പെട്ടും നോട്ടീസ് നല്കിയിട്ടുണ്ട്. ഇതനുസരിച്ച് ആകെ 8148 ഏക്കര് ഭൂമികൂടി ഏറ്റെടുക്കാനാണ് സര്ക്കാര് നീക്കം. ഇതോടെ ആകെ മുപ്പത്തിഎണ്ണായിരത്തോളം ഏക്കര് വരുന്ന ഭൂമിയാണ് സര്ക്കാരിന്റെ കൈവശം എത്താന് പോകുന്നത്
സ്വാതന്ത്ര്യത്തിന് മുന്പ് ബ്രിട്ടീഷ് കമ്പനിയായിരുന്ന മലയാളം പ്ലാന്റേഷന്സിന്റെ കൈവശമുണ്ടായിരുന്ന ഭൂമിയുടെ ഉടമസ്ഥത ഇപ്പോള് നിലവിലുള്ള ഹാരിസണ്സ് മലയാളം പ്ലാന്റേഷനാണെന്ന് കമ്പനി അവകാശപ്പെടുന്നത് നിയമവിരുദ്ധമാണെന്ന് ഭൂമി ഏറ്റെടുത്തുകൊണ്ട് രാജമാണിക്യം പുറപ്പെടുവിച്ച ഉത്തരവില് വ്യക്തമാക്കുന്നുണ്ട്. 2014 ഡിസംബര് ഒന്നിന് രാജമാണിക്യം പുറപ്പെടുവിച്ച ഉത്തരവ് ഹൈക്കോടതിയുടെ പരിഗണനയിലാണ്. രാജമാണിക്യത്തിന് ഇത്തരം ഉത്തരവ് പുറപ്പെടുവിക്കാന് അധികാരമുണ്ടോ എന്ന വിഷയമാണ് കോടതി പരിശോധിക്കുന്നത്. രാജമാണിക്യത്തിന്റെ നടപടികള് കോടതി ശരിവച്ചാല് അദ്ദേഹം സ്വീകരിച്ച ഭൂമി ഏറ്റെടുക്കല് നടപടി പ്രാബല്യത്തില് വരും.
കൊല്ലം, പത്തനംതിട്ട, കോട്ടയം, ഇടുക്കി ജില്ലകളിലായി ഹാരിസണ്സിന്റെ കണക്കില്പ്പെട്ട ഭൂമിയുടെ അളവ് 38,148 ഏക്കറാണ്. ആയിരക്കണക്കിന് ഏക്കര് വനഭൂമികൂടി കൈയേറി വ്യാജ സര്വേ നമ്പരുകള് ചാര്ത്തി കമ്പനി കൈവശം വച്ചിരിക്കുന്നതായി രാജമാണിക്യം കണ്ടെത്തിയിട്ടുണ്ട്. ഈ ഭൂമിയെല്ലാം തങ്ങള്ക്ക് അവകാശപ്പെട്ടതാണെന്ന് സമര്ഥിക്കാന് ഹാരിസണ്സ് കാട്ടിയിരുന്നതുകൊല്ലം സബ്രജിസ്ട്രാര് ഓഫീസില് 1923ല് രജിസ്റ്റര് ചെയ്തതായി അവകാശപ്പെടുന്ന 1600/1923 നമ്പര് ആധാരമായിരുന്നു. അത് പൂര്ണമായും വ്യാജമായി നിര്മ്മിച്ചതാണെന്ന് വിജിലന്സ് അന്വേഷണത്തില് കണ്ടെത്തി.
ലണ്ടന് കമ്പനിയായ മലയാളം പ്ലാന്റേഷന്സ് ലിമിറ്റഡിന്റെ കൈവശമിരുന്ന തോട്ടങ്ങള് നാല് പതിറ്റാണ്ടുമുന്പ് കൈയേറിയവര്ക്കും നോട്ടീസ് നല്കി. നാല് ജില്ലകളിലായി വ്യാപിച്ചുകിടക്കുന്ന 6808 ഏക്കര് തോട്ടങ്ങളാണ് വ്യാജ പ്രമാണം ഉപയോഗിച്ച് റവന്യൂ അധികൃതരുടെ സഹായത്തോടെ ഹാരിസണ് വിറ്റിട്ടുള്ളത്. ഈ ഭൂമി പൂര്ണമായും ഒഴിയണമെന്നുകാട്ടിയാണ് സര്ക്കാര് നിയോഗിച്ച സ്പെഷല് ഓഫീസര് എം.ജി. രാജമാണിക്യം നോട്ടീസ് നല്കിയത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
