വിഎസ് ഹിറ്റ്ലര് മാധവന് കുട്ടിയായി... ആഭാസന്മാരെ കൈയ്യാമം വയ്ക്കുംവരെ സമരവുമായി വിഎസ്; പെങ്ങള്മാരുടെ സംരക്ഷണത്തിനായുള്ള ഹിറ്റ്ലറുടെ രണ്ടാം വരവ് ഗംഭീരം
1996ല് പുറത്തിറങ്ങിയ സൂപ്പര്ഹിറ്റ് മലയാള സിനിമയാണ് സിദ്ദിഖ് സംവിധാനം ചെയ്ത ഹിറ്റ്ലര്. മമ്മൂട്ടി ടൈറ്റില് റോളില് അഭിനയിച്ച ഹിറ്റ്ലര് മാധവന് കുട്ടി മലയാളികളുടെ മനസില് ഇന്നുമുണ്ട്. പെങ്ങള്മാരുടെ സംരക്ഷണത്തിനായി വ്രതം നോറ്റിരിക്കുന്ന ഹിറ്റ്ലര് മാധവന് കുട്ടിയെ ആരും മറക്കാനിടയില്ല. സ്വന്തം ജീവിതം പോലും മറന്ന് പെങ്ങള്മാരുടെ സംരക്ഷണം ഏറ്റെടുത്ത ആ ഹിറ്റ്ലര് മാധവന് കുട്ടിയുടെ വേഷത്തിലാണ് മലയാളികളുടെ പ്രിയങ്കരനായ വിഎസ് അച്യുതാനന്ദന്.
നിയമസഭയ്ക്കകത്ത് ഏറെ അപമാനിക്കപ്പെട്ട വനിതാ എംഎല്എ മാരുടെ സംരക്ഷണം വിഎസ് ഏറ്റെടുത്തു കഴിഞ്ഞപ്പോഴാണ് പുതിയ മാനം വന്നത്. ഏറെ അപമാനിക്കപ്പെട്ട ആ എംഎല്എ മാര്ക്ക് വിഎസ് ഹിറ്റ്ലര് മാധവന് കുട്ടിയെപ്പോലെ സംരക്ഷകമായി.
സിനിമയില് മമ്മൂട്ടി 6 പെങ്ങള്മാരുമായി നടന്നു വരുന്ന ഒരു രംഗമുണ്ട്. അതേരംഗം വിഎസ് ഇന്ന് ആവര്ത്തിക്കുകയായിരുന്നു. വിഎസ് ഗവര്ണറെ കാണാന് പോയി വന്നതും 6 പെങ്ങള്മാരുമായാണ്. ഇടതുപക്ഷത്തിന്റെ വനിതാ എംഎല്എമാരായ ജമീല പ്രകാശം, ഇ.എസ്.ബിജിമോള്, അയിഷ പോറ്റി, കെ.കെ. ലതിക, കെ.എസ്.സലീഖ, ഗീത ഗോപി എന്നിവര്ക്കൊപ്പമാണ് വിഎസ് രാജ്ഭവനിലെത്തിയത്.
പെങ്ങള്മാരെ കമന്റടിക്കുന്ന ജഗദീഷ് ഉള്പ്പെടെയുള്ള പൂവാലന്മാരെ മമ്മൂട്ടി നേരിട്ട അതേ ആര്ജവത്തോടെയാണ് വിഎസ് നേരിടുന്നതും. മമ്മൂട്ടി കൈക്കരുത്ത് കൊണ്ട് നേരിട്ടപ്പോള് വിഎസ് വാക്കുകള് കൊണ്ടാണ് കരുത്ത് കാട്ടിയത്.
സരിതയോട് കാണിച്ച അനുകമ്പ പോലും വനിത എംഎല്എമാരോട് കാട്ടിയില്ലെന്ന് വി.എസ്. കുറ്റപ്പെടുത്തി. സോണിയ ഗാന്ധിയുടെ നേതൃത്വത്തില് മാര്ച്ച് നടത്തിയതിനെ എങ്ങനെയാണ് കാണുന്നത്. രാഹുല് പോരാ, പ്രിയങ്ക വേണമെന്ന് പറയുന്നവര് വനിതകളെ ചാവേറുകള് എന്നു വിളിക്കുന്നുവെന്നും അദ്ദേഹം കൂട്ടിച്ചേര്ത്തു. കൂടാതെ, എംഎല്എമാര്ക്കു വേണ്ടിയും കേരളത്തിലെ നല്ലവരായ സ്ത്രീകള്ക്കുവേണ്ടിയും നിയമപരമായി ചെയ്യാന് കഴിയാവുന്നത് എല്ലാം ചെയ്യുമെന്നും വിഎസ് പറഞ്ഞു.
വനിതാ എംഎല്എമാരെ ചാവേര് എന്നു വിളിക്കാന് മുഖ്യമന്ത്രിക്ക് നാണമില്ലേയെന്നു വിഎസ് ചോദിച്ചു. പുരുഷനും സ്ത്രീയും സമമാണെന്ന് ഗാന്ധിജി പറഞ്ഞിട്ടുണ്ട്. ചാവേറാക്കി എന്നു പറയുന്നവര് ഗാന്ധിജിയുടെ ആത്മകഥ വായിക്കണമെന്നും വിഎസ് പറഞ്ഞു.
നിയമസഭയില് നടന്ന പ്രതിഷേധത്തിനിടെ വനിതാ എംഎല്എമാരെ ആക്രമിച്ചതിനെതിരെ ക്രിമിനല് ചട്ടപ്രകാരം നടപടിയെടുക്കണമെന്ന് വി.എസ്. ഗവര്ണര് പി. സദാശിവത്തോടു ആവശ്യപ്പെട്ടു.
യുഡിഎഫ് അംഗങ്ങള്ക്കെതിരെ നടപടിയെടുക്കാന് ഗവര്ണര് സ്പീക്കറോടും സര്ക്കാരിനോടും നിര്ദേശം നല്കണം. പരാതി ലഭിച്ചിട്ടും പൊലീസിനു കൈമാറാതെ സ്പീക്കര് നിയമലംഘനം നടത്തി. വനിതാ എംഎല്എമാര്ക്കെതിരെ ഉണ്ടായത് ലൈംഗികാതിക്രമം തന്നെയാണെന്നും വിഎസ് ഗവര്ണറെ അറിയിച്ചു. വനിതാ എംഎല്എമാര്ക്കെതിരെ സഭയിലുണ്ടായ അവഹേളനം വിഎസും എംഎല്എമാരും ഗവര്ണറെ അറിയിച്ചു. നിയമപരമായി ചെയ്യാന് കഴിയുന്നത് ചെയ്യുമെന്ന് ഗവര്ണര് ഉറപ്പു നല്കിയതായി വിഎസ് പറഞ്ഞു.
വിഎസിന്റെ ഹിറ്റ്ലര് മാധവന് കുട്ടി അങ്ങനെ മലയാളികളുടെ മനസ് കീഴടക്കുകയാണ്. ഒപ്പം പേടിയോടെ പൂവാലന്മാരും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
