കര്‍ണാടകയില്‍ നിന്ന് സംസ്ഥാനത്തെ വിവിധ ജില്ലകളിലേക്കു വന്ന 73 നഴ്‌സിങ് വിദ്യാര്‍ഥികളും 3 കോളജ് സ്റ്റാഫും 2 ദിവസത്തെ ബസ് യാത്രയ്‌ക്കൊടുവില്‍ ജന്മനാടിന്റെ അതിരു താണ്ടിയെങ്കിലും അതിര്‍ത്തി മാറി കയറിയതിനാല്‍ 13 മണിക്കൂറിലേറെ വാളയാറില്‍ കുടുങ്ങി. ജനപ്രതിനിധികളുടെ ഇടപെടലിനൊടുവില്‍ ഇവര്‍ക്ക് താല്‍ക്കാലിക പാസ് അനുവദിച്ച് നാടുകളിലേക്ക് എത്തിച്ചു.

കര്‍ണാടകയിലെ ബീദര്‍ ജില്ലയിലുള്ള നിദ നഴ്‌സിങ് ഇന്‍സ്റ്റിറ്റ്യൂട്ടിലെ വിദ്യാര്‍ഥികളില്‍ പലരും ഡിസംബറിലാണ് അവസാനമായി നാട്ടില്‍ വന്നത്. ഈ ഫെബ്രുവരിയില്‍ അവധി കിട്ടിയെങ്കിലും രോഗം വ്യാപിച്ചതോടെ നാട്ടിലേക്ക് പോവാനായില്ല. ഇതിനിടെയാണ് സര്‍ക്കാരിന്റെ ഇളവിലൂടെ നാട്ടിലേക്ക് വഴി തുറന്നത്. എന്നാല്‍ ടാക്‌സി വാഹനത്തിനു പലരുടെയും കയ്യില്‍ പണമുണ്ടായിരുന്നില്ല.

മുത്തങ്ങ, കുമളി ചെക് പോസ്റ്റുകളിലൂടെ സംസ്ഥാനത്തേക്ക് പ്രവേശിക്കാനാണ് ഇവര്‍ അനുമതി വാങ്ങിയത്. കര്‍ണാടക ബീദര്‍ ജില്ലാ ഭരണകൂടം ഇവര്‍ക്ക് അനുവദിച്ച കര്‍ണാടക സര്‍ക്കാരിന്റെ 2 ബസുകളില്‍ പ്രതീക്ഷയോടെ യാത്ര തുടര്‍ന്നെങ്കിലും ബസ് ജീവനക്കാര്‍ വാഹനമെത്തിച്ചതു വാളയാര്‍ വഴിയായിരുന്നു. അതോടെ വിദ്യാര്‍ഥികള്‍ വീണ്ടും പ്രയാസത്തിലായി. പുതിയ പാസെടുക്കാതെ അതിര്‍ത്തി വിടില്ലെന്നും ഉദ്യോഗസ്ഥര്‍ അറിയിച്ചു. പുലര്‍ച്ചെ ഒരു മണിക്കെത്തിയ അവര്‍ ഉച്ചവരെ അതിര്‍ത്തിയില്‍ കുടുങ്ങി.

വിദ്യാര്‍ഥികള്‍ കുടുങ്ങിയ വിവരം നാട്ടിലറിയിച്ചതോടെ മന്ത്രിമാരായ എ.കെ. ബാലന്‍, കെ. കൃഷ്ണന്‍കുട്ടി ഉള്‍പ്പെടെയുള്ള ജനപ്രതിനിധികള്‍ ഇടപ്പെട്ടു. ഇതോടെ ഉച്ചയോടെ എല്ലാവര്‍ക്കും എമര്‍ജന്‍സി പാസ് ലഭ്യമാക്കി. വീണ്ടും ശുഭപ്രതീക്ഷയോടെ വൈകിട്ടോടെ നാടുകളിലേക്ക് മടക്കം. അതിര്‍ത്തിയില്‍ കുടുങ്ങിയ ഇവര്‍ക്ക് ബിജെപി, യൂത്ത് കോണ്‍ഗ്രസ് പ്രവര്‍ത്തകര്‍ ഭക്ഷണമെത്തിക്കുകയും ചെയ്തിരുന്നു.