ജേക്കബ് ജോബിനിട്ടും പണി വരുന്നു: ഡിജിപിയെ ബ്ലാക്ക് മെയില് ചെയ്തു രക്ഷപ്പെടാന് നോക്കിയതിന് വകുപ്പു തല നടപടിക്ക് ശിപാര്ശ
അതിബുദ്ധി കാട്ടി ഡിജിപിയെ ബ്ലാക്ക് മെയില് ചെയ്തു രക്ഷപ്പെടാന് നോക്കിയ ജേക്കബ് ജോബും ഊരാക്കുടുക്കില്. സുരക്ഷാജീവനക്കാരന് ചന്ദ്രബോസിനെ കൊലപ്പെടുത്തിയ കേസില് വിവാദവ്യവസായി നിസാമുമായി ബന്ധപ്പെടുത്തി ഡിജിപി കെ എസ് ബാലസുബ്രമണ്യനെ ബ്ലാക്ക്മെയില് ചെയ്യാന് മുന് കമ്മിഷണര് ജേക്കബ് ജോബ് ശ്രമിച്ചെന്ന് കണ്ടെത്തി ഇന്റലിജന്സ് മേധാവി എ ഹേമചന്ദ്രന്റെ റിപ്പോര്ട്ട് സര്ക്കാരിന് കൈമാറി. ഡി.ജി.പിയെ സമ്മര്ദ്ദത്തിലാക്കി തന്റെ സസ്പെന്ഷന് റദ്ദാക്കി പൊലീസില് തിരിച്ചുകയറുകയായിരുന്നു ജോബിന്റെ ലക്ഷ്യം
ഡി.ജി.പിയെ അവമതിക്കാനുള്ള ഗൂഢാലോചനയുമുണ്ടായി. ജേക്കബ് ജോബിനെതിരേ വകുപ്പുതല നടപടി എടുക്കണമെന്നുമുള്ള ഹേമചന്ദ്രന്റെ അന്വേഷണ റിപ്പോര്ട്ട് ആഭ്യന്തരവകുപ്പ് ശരിവച്ചാണ് സര്ക്കാരിന് കൈമാറിയത്. തൃശൂര് കമ്മിഷണര് ഓഫീസിലെ പൊലീസുകാരനേയും ജോബ് ഫോണില് വിളിച്ച് റെക്കാര്ഡ് ചെയ്തു. തന്നെ സസ്പെന്ഡ് ചെയ്തതിന്റെ വിരോധം തീര്ക്കാന് ഡി. ജി. പിയെ സമൂഹത്തില് അപമാനിക്കുകയും ജോബിന്റെ ലക്ഷ്യമായിരുന്നുവെന്നും ഹേമചന്ദ്രന്റെ റിപ്പോര്ട്ട് പറയുന്നു. നിസാമുമായുള്ള രഹസ്യകൂടിക്കാഴ്ചയില് കൈക്കൂലി വാങ്ങിയ പൊലീസുകാരുടെ വിവരങ്ങള് ജോബിന് ലഭിച്ചിരുന്നു. അവര്ക്കെതിരേ നടപടിയെടുക്കാതെ സംരക്ഷിക്കാന് ശ്രമിച്ചത് സംശയാസ്പദമാണ്. കേസുകളില് നിന്ന് നിസാം ഒഴിവായതില് കമ്മിഷണറുടെ പങ്കും അന്വേഷിക്കണം. കൂടാതെ വകുപ്പുതലത്തില് വിശദമായ അന്വേഷണം വേണമെന്നും ഇന്റലിജന്സ് മേധാവി ശുപാര്ശ ചെയ്തു.
വിവാദ വ്യവസായി മുഹമ്മദ് നിസാമിനെ സംരക്ഷിക്കാനായി ഡിജിപിയെ വരെ ഭീഷണിപ്പെടുത്തി സ്വന്തം തടിയൂരാന് ശ്രമിച്ച ജേക്കബ് ജോബ് താന് കുഴിച്ച കുഴിയില് തന്നെ വീണു. നിസാമിന്റെ കേസില് ആരോപണ വിധേയനായതോടെ ഡിജിപിയെ ബ്ലാക്ക് മെയില് ചെയ്തു രക്ഷപ്പെടാന് നോക്കിയത് ജേക്കബ് ജോബിനു വിനയായിരിക്കുകയാണ്.
ഐ.പി.എസ് ഉദ്യോഗസ്ഥന്റെ അച്ചടക്കമാണ് ജേക്കബ് ജോബ് ലംഘിച്ചത്. അഖിലേന്ത്യാ സര്വീസ് ചട്ടപ്രകാരമുള്ള നടപടികളൊന്നും പാലിക്കാന് ജേക്കബ് ജോബ് തയ്യാറായില്ല. സസ്പെന്ഷനിലാണെങ്കിലും ഐ.പി.എസുകാര് അച്ചടക്കം പാലിക്കണം. ഡി.ജി.പിയെ ആരോപണങ്ങളില് കുടുക്കാന് മുന് ഡി.ജി.പി കൃഷ്ണമൂര്ത്തിയുമായി നടത്തിയ ഫോണ് സംഭാഷണം റെക്കാര്ഡ് ചെയ്തതും പുറത്തുവിട്ടതും ഗുരുതരമായ അച്ചടക്കലംഘനമാണ്. ഡി.ജി.പിയെ ഭീഷണിപ്പെടുത്തി കാര്യം നേടുകയായിരുന്നു ലക്ഷ്യം.
വകുപ്പുതല നടപടിക്ക് മുന്നോടിയായി ജേക്കബ് ജോബിന് ചാര്ജ്ജ്മെമോ നല്കും. സര്ക്കാര് നിര്ദ്ദേശിക്കുന്ന ഉന്നത ഉദ്യോഗസ്ഥന് ജോബിനെതിരേ അന്വേഷണം നടത്തും. അന്വേഷണം പൂര്ത്തിയാകും വരെ ജോബിന്റെ സസ്പെന്ഷന് തുടരും. 2018 മാര്ച്ച് വരെയാണ് ജേക്കബ് ജോബിന് കാലാവധിയുള്ളത്. എന്നാല് അതിനു മുമ്പു തന്നെ സര്വീസില് നിന്ന് പുറത്താകുമെന്ന സൂചനയാണ് പൊലീസ് വൃത്തങ്ങളില് നിന്ന് ലഭിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha
