കോട്ടയം താഴത്തങ്ങാടിയില് വീട്ടമ്മയെ കൊലപ്പെടുത്തിയ സംഭവത്തില് 23കാരന് അറസ്റ്റില്; ചെങ്ങളത്തെ പെട്രോള് പമ്പില് നിന്ന് ലഭിച്ച ദൃശ്യങ്ങള് നിര്ണായകമായി; തെളിവില്ലായിരുന്ന കേസ് പൊലീസ് മണിക്കൂറുകള്ക്കുള്ളില് തെളിയിച്ചതിങ്ങനെ...
കോട്ടയം താഴത്തങ്ങാടിയില് വീട്ടമ്മയെ കൊലപ്പെടുത്തിയ കേസില് താഴത്തങ്ങാടി സ്വദേശിയായ 23കാരനെയുവാവിനെ പൊലീസ് കസ്റ്റഡിയിലെടുത്ത് അറസ്റ്റ് രേഖപ്പെടുത്തി. കൃത്യത്തിന് ശേഷം കാറുമായി കടന്ന പ്രതിയുടെ ദൃശ്യങ്ങള് ചെങ്ങളത്തെ പെട്രോള് പമ്പില് നിന്ന് ലഭിച്ചതാണ് കേസില് വഴിത്തിരിവായത്. പ്രതിയെ ചോദ്യം ചെയ്യുന്നതിനിടെയാണ് അറസ്റ്റ് രേഖപ്പെടുത്തിയത്
കൊല്ലപ്പെട്ട ഷീബയുമായും മെഡിക്കല് കോളജില് ചികിത്സയില് കഴിയുന്ന അബ്ദുല് സാലിയുമായും അടുപ്പമുള്ളയാളാണ് കൊലപാതകിയെന്ന് പൊലീസ് അന്വേഷണത്തിന്റെ ആദ്യഘട്ടത്തില് ഉറപ്പിച്ചിരുന്നു. ഇതിന്റെ അടിസ്ഥാനത്തിലായിരുന്നു അന്വേഷണം. വീട്ടില് നിന്ന് മോഷണംപോയ കാറിനെ ചുറ്റിപറ്റിയുള്ള അന്വേഷണം കൃത്യമായി പ്രതിയില് തന്നെ എത്തി. കൊലയ്ക്ക് ശേഷം കാറുമായി രക്ഷപ്പെട്ട പ്രതി ചെങ്ങളത്തെ പമ്പിലെത്തി 500 രൂപയ്ക്ക് പെട്രോള് അടിച്ചു. ദൃശ്യം പരിശോധിച്ച് പെട്രോള് പമ്പ് ജീവനക്കാരെ ചോദ്യം ചെയ്തതിലൂടെ പ്രതി മലയാളിയാണെന്നും ഉറപ്പിച്ചു.
ബന്ധുക്കളില് നിന്നുള്ള വിവരങ്ങളുടെ കൂടി അടിസ്ഥാനത്തിലാണ താഴത്തങ്ങാടി മുഹമ്മദ് ബിലാലിനെ കസ്റ്റഡിയിലെടുക്കുന്നത്. ഇയാള് നിലവില് കൊച്ചിയിലാണ് താമസം. കൊല നടന്ന സ്ഥലത്തു നിന്നു ലഭിച്ച ച്യൂയിംഗം ഡിഎന്എ പരിശോധനയ്ക്ക് അയച്ചു ഇത് കേസില് നിര്ണായക തെളിവാകും. കേസില് കൂടുതല് പേരുടെ പങ്കിനെ കുറിച്ചും പൊലീസ് അന്വേഷിക്കുന്നുണ്ട്.
മോഷണം ലക്ഷ്യമിട്ടാണ് പ്രതി കൊല്ലപ്പെട്ട ഷീബയുടെ വീട്ടിലെത്തിയത്. ഇയാള്ക്ക് കുടുംബവുമായി സാമ്പത്തിക ഇടപാടുകള് ഉണ്ടായിരുന്നില്ല.എന്നാല് പ്രതിയുടെ കുടുംബത്തിന് സാമ്പത്തിക പ്രശ്നമുണ്ടായപ്പോള് ഷീബ സഹായിച്ചിരുന്നു. പരിചയമുണ്ടായിരുന്നതിനാല് ഷീബ വാതില് തുറക്കുകയും കുടിക്കാന് വെള്ളം നല്കുകയും ചെയ്തു. തുടര്ന്ന് പ്രതി ഷീബയുടെ ഭര്ത്താവ് സാലിയുമായി സംസാരിച്ചിരുന്നു. അല്പം കഴിഞ്ഞതോടെ അയാളെ പ്രതി ആക്രമിച്ചു.ഇതുകണ്ട് ഷീബ എത്തിയതോടെ പ്രതി അവരുടെ നേരെ തിരിഞ്ഞു.അടിയേറ്റ ഇരുവരും വീണതോടെ അലമാരയില് ഉണ്ടായിരുന്ന സ്വര്ണം കൈക്കലാക്കി. തുടര്ന്ന് ഷീബയുടെ ശരീരത്തിലുണ്ടായിരുന്ന സ്വര്ണവും എടുത്തു.
പിന്നീട് തെളിവുനശിപ്പിക്കാനായി ഗ്യാസ് സിലിണ്ടര് തുറന്നുവിടുകയും ഷീബയുടെയും സാലിയുടെയും ശരീരത്തില് കമ്പിചുറ്റി വൈദ്യുതി പ്രവഹിക്കുകയും ചെയ്തു.തുടര്ന്നാണ് കാര് കൈക്കലാക്കി രക്ഷപ്പെട്ടത്.കൊച്ചിയില് നിന്നാണ് പ്രതിയെ പൊലീസ് പിടികൂടിയത്. പ്രതിയുമായി കാക്കനാട്ട് തെളിവെടുപ്പ് ഇപ്പോള് നടക്കുകയാണ്. മോഷ്ടിച്ചസ്വര്ണം ഇവിടെ നിന്ന് കണ്ടെടുത്തിട്ടുണ്ട്. കാര് കണ്ടെത്താനുള്ള ശ്രമത്തിലാണിപ്പോള്.അറസ്റ്റിലായ മുഹമ്മദ് ബിലാല് നേരത്തേ ചില ക്രിമിനല്കേസില് പ്രതികകളായിട്ടുണ്ട്. പ്രതി ഒറ്റയ്ക്കാണ് കുറ്റം നടത്തിയതെന്നാണ് പൊലീസ് പറയുന്നത്.
"https://www.facebook.com/Malayalivartha