സ്വാതന്ത്യ്രസമര സേനാനിയും ഗാന്ധി ശിഷ്യനുമായിരുന്ന ചാത്തോത്ത് രൈരു നായര് അന്തരിച്ചു
പ്രമുഖ സ്വാതന്ത്യ്രസമര സേനാനിയും ഗാന്ധി ശിഷ്യനും വ്യാപാരിയുമായിരുന്ന ചാത്തോത്ത് രൈരു നായര് (99) കോഴിക്കോട് ജില്ലാ സഹകരണ ആശുപത്രിയില് അന്തരിച്ചു. വെള്ളിയാഴ്ച രാത്രി 7.15-ന് ആയിരുന്നു അന്ത്യം. സംസ്കാരം പിന്നീട്.
പിണറായിയിലെ ഇടത്തരം കര്ഷക കുടുംബത്തില് അധ്യാപകനായിരുന്ന തേര്ളയില് രൈരു നായരുടെയും ചാത്തോത്ത് മാധവിയമ്മയുടെയും മകനായി 1922 ഫെബ്രുവരി 10-ാം തീയതിയാണ് ജനിച്ചത്. ഗാന്ധിജി തലശ്ശേരിയില് എത്തിയപ്പോള് കാണാന് കഴിയാത്തതിന്റെ നിരാശ മാറ്റാന്, എട്ടാം ക്ലാസില് പഠിക്കുമ്പോള് രൈരു നായര് നാടുവിട്ട് വാര്ധയിലെത്തി. ഗാന്ധിജിയെ കാണാനും ഇടപഴകാനും അവസരം ലഭിച്ചു. 8 മാസം മഗന്വാടി സേവാഗ്രാമത്തില് കൈത്തൊഴിലുമായി കഴിഞ്ഞു.
പിന്നീട് തിരിച്ചെത്തി പഠനം പൂര്ത്തിയാക്കി. 1955-ല് മലേഷ്യയിലെത്തി ഇന്ഷുറന്സ് മേഖലയില് ജോലി ചെയ്തു. തിരികെ വന്ന് കോഴിക്കോട്ട് ഇംഗ്ലിഷ് മരുന്നു കട തുടങ്ങി. 1982-ല് കട നിര്ത്തി. മേലൂരിലെ വീട്ടില് വിശ്രമ ജീവിതത്തിലായിരുന്നു ഏറെനാള്.
ഇടതുപക്ഷ നേതാക്കളായ എകെജി, ഇ.കെ.നായനാര്, എന്.ഇ. ബലറാം തുടങ്ങിയവരുമായി അടുത്ത സൗഹൃദമുണ്ടായിരുന്നു. മുഖ്യമന്ത്രി പിണറായി വിജയനുമായും അടുത്ത ആത്മബന്ധമുണ്ടായിരുന്നു.
ഭാര്യ നാരായണി. മക്കള്: പ്രദീപ് കുമാര് (ബിസിനസ്, മലേഷ്യ), പ്രവീണ (ബെംഗളൂരു), പ്രസന്ന (ബിസിനസ്, ഊട്ടി), ഡോ. പ്രീത ചാത്തോത്ത് (റിട്ട. സീനിയര് മാനേജര്, വേള്ഡ് ബാങ്ക്, വാഷിങ്ടന്), തനൂജ (ഡിഫന്സ്, ഓസ്ട്രേലിയ). മരുമക്കള്: ഭാരതി, സുരേഷ് ചന്ദ്രമേനോന് (റിട്ട. ഉദ്യാഗസ്ഥന് ബിഇഎംഎല്, ബെംഗളൂരു), പരേതനായ വിങ് കമാന്ഡര് ഡേവിഡ് ഡോസണ്, (ഊട്ടി), പുരുഷോത്തം ബച്ചാനി (ബിസിനസ്, വാഷിങ്ടന്), എന്.ജി.ജി. നായര് (എന്ജിനീയര്, ഓസ്ട്രേലിയ).
https://www.facebook.com/Malayalivartha